សហរដ្ឋអាមេរិកនិយាយថាខ្លួនបានបញ្ជូនវ៉ាក់សាំងកូវីដ១៩ចំនួន២លាន៥សែនដូសទៅឲ្យកោះតៃវ៉ាន់ដែលនេះជាចំនួនកើនឡើងយ៉ាងខ្ពស់លើសពីការសន្យាលើកដំបូងដែលមានចំនួនត្រឹមតែ៧៥ម៉ឺនដូសតែប៉ុណ្ណោះ។
ប្រធានាធិបតីកោះតៃវ៉ាន់អ្នកស្រី Tsai Ing-wen លើកឡើងថាការបង្កើនការបរិច្ចាគវ៉ាក់សាំងនេះគឺជា«កាយវិការមិត្តភាពមួយ»។ប្រធានាធិបតីអាមេរិកលោក Joe Biden ធ្លាប់បាននិយាយថារដ្ឋបាលរបស់លោកនឹងផ្តល់វ៉ាក់សាំងកូវីដ១៩ចំនួន៨០លានដូសទៅឲ្យប្រទេសនានានៅក្នុងពិភពលោក។
វ៉ាក់សាំងនេះជាផ្នែកមួយនៃចំនួន៥០០លានដូសដែលសហរដ្ឋអាមេរិកបានប្តេជ្ញាចិត្តនឹងបរិច្ចាគទៅឲ្យកន្លែងប្រមាណជិត១០០នៅក្នុងរយៈពេល២ឆ្នាំខាងមុខនេះ។
រដ្ឋបាលរបស់លោកBidenមានគម្រោងនឹងផ្តល់វ៉ាក់សាំងចំនួន២០០លានដូសក្នុងឆ្នាំនេះនិង៣០០លានដូសទៀតនៅឆ្នាំ២០២២ខាងមុខឲ្យប្រទេសចំនួន៩២និងសហភាពអាហ្វ្រិកផងដែរ។
ការប្រកាសនេះធ្វើឡើងបន្ទាប់ពីពលរដ្ឋអាមេរិកចំនួនប្រមាណ៤៥%បានទទួលការចាក់វ៉ាក់សាំងគ្រប់ដូស។នេះបើយោងទៅលើស្ថិតិរបស់សាកលវិទ្យាល័យ Johns Hopkins។
ផ្ទុយទៅវិញប្រទេសឥណ្ឌាដែលមានប្រជាពលរដ្ឋប្រមាណ១.៣០០លាននាក់នោះបានចាក់វ៉ាក់សាំងទៅឲ្យពលរដ្ឋរបស់ខ្លួនទើបសម្រេចបានតែជាង៣%ប៉ុណ្ណោះ។
ក្រសួងសុខាភិបាលឥណ្ឌាបាននិយាយកាលពីថ្ងៃអាទិត្យថាប្រទេសឥណ្ឌាមានអ្នកឆ្លងជំងឺកូវីដ១៩ថ្មីជាង៥៨.០០០នាក់ក្នុងរយៈពេល២៤ម៉ោងចុងក្រោយនិងធ្វើឲ្យប្រទេសនេះមានអ្នកឆ្លងសរុបទាំងអស់រហូតមកដល់ពេលនេះឡើងដល់ជិត៣០លាននាក់ហើយ។សហរដ្ឋអាមេរិកនៅតែស្ថិតជាប្រទេសលំដាប់ទីមួយដែលមានអ្នកឆ្លងជំងឺកូវីដ១៩សរុបច្រើនបំផុតនៅក្នុងពិភពលោកគឺចំនួន៣៣.៥០០.០០០នាក់៕