លោក Jake Sullivan ទីប្រឹក្សាសន្តិសុខជាតិអាមេរិកបានឲ្យដឹងកាលពីថ្ងៃព្រហស្បតិ៍ថាលោកប្រធានាធិបតីសហរដ្ឋអាមេរិក Joe Biden និងប្រធានាធិបតីតួកគីលោក Recep Tayyip Erdogan បានព្រមព្រៀងគ្នាក្នុងកិច្ចប្រជុំនៅសប្ដាហ៍នេះថាប្រទេសតួកគីនឹងកាន់តួនាទីដឹកនាំការពារសុវត្ថិភាពនៅអាកាសយានដ្ឋានរដ្ឋធានីកាប៊ុលខណៈសហរដ្ឋអាមេរិកដកកងទ័ពចេញពីប្រទេសអាហ្វហ្គានីស្ថាន។ នេះបើយោងតាមទីភ្នាក់ងារសារព័ត៌មាន Reuters។
យ៉ាងណាក៏ដោយមេដឹកនាំទំាងពីរមិនអាចដោះស្រាយបញ្ហាយូរមកហើយដែលប្រទេសតួកគីទិញប្រព័ន្ធមីស៊ីលធុន S-400 ពីប្រទេសរ៉ុស្ស៊ីដែលលោក Sullivan និយាយថាជាជម្លោះដ៏ជូរចត់ដែលធ្វើឲ្យទំនាក់ទំនងរវាងសម្ព័ន្ធមិត្តអង្គការអូតង់ទាំងពីរនេះមានភាពល្អក់កករ។លោកបន្ថែមថាកិច្ចពិភាក្សាអំពីបញ្ហានេះនឹងត្រូវបន្ត។
លោក Sullivan បានប្រាប់អ្នកសារព័ត៌មានថាលោក Biden និងលោក Erdogan បានពិភាក្សាអំពីបញ្ហាប្រទេសអាហ្វហ្គានីស្ថាន។លោកថា លោក Erdogan ស្វែងរកការគាំទ្រមួយចំនួនពីអាមេរិកដើម្បីរក្សាសុវត្ថិភាពអាកាសដ្ឋានក្នុងរដ្ឋធានីកាប៊ុលហើយលោក Bidenបានបេ្ដជ្ញាថានឹងផ្ដល់ការគាំទ្រនោះ។
ប្រទេសតួកគីនិងសហរដ្ឋអាមេរិកមានការខ្វែងគំនិតគ្នាលើបញ្ហាជាច្រើនដែលរួមមានរដ្ឋាភិបាលក្រុងអង់ការ៉ាទិញអាវុធពីប្រទេសរុស្ស៊ីនិងភាពខុសគ្នានៃគោលនយោបាយនៅក្នុងប្រទេសស៊ីរីនិងតំបន់មេឌីទែរ៉ាណេខាងកើតហើយជំនួបផ្ទាល់ជាលើកដំបូងរវាងលោកទាំងពីរផ្តល់ក្តីសង្ឃឹមតិចតួចណាស់។
កិច្ចសហប្រតិបត្តិការដែលមានសក្តានុពលមួយគឺរដ្ឋាភិបាលទីក្រុងអង់ការ៉ាបានផ្តល់ការការពារនិងធ្វើប្រតិបត្តិការអាកាសយានដ្ឋានរដ្ឋធានីកាប៊ុលបន្ទាប់ពីកងកម្លាំងសហរដ្ឋអាមេរិកនិងអូតង់ដកខ្លួនចេញនៅប៉ុន្មានសប្តាហ៍ខាងមុខនេះ។
សុវត្ថិភាពនៃអាកាសយានដ្ឋាននេះសំខាន់ណាស់សម្រាប់ការធ្វើប្រតិបត្តិការបេសកកម្មការទូតនៅប្រទេសអាហ្វហ្គានីស្ថាន ស្របពេលកងទ័ពលោកខាងត្រូវបានដកចេញ។
កាលពីសប្ដាហ៍មុនអ្នកនាំពាក្យក្រុមតាលីបង់បាននិយាយថាប្រទេសតួកគីគួរតែដកកងទ័ពរបស់ខ្លួនចេញពីប្រទេសអាហ្វហ្គានីស្ថានក្រោមកិច្ចព្រមព្រៀងឆ្នាំ២០២០សម្រាប់ការដកកងទ័ពសហរដ្ឋអាមេរិក៕