ចៅក្រមតុលាការសហព័ន្ធម្នាក់ កាលពីថ្ងៃព្រហស្សតិ៍បានពន្យារពេលការសម្រេចលើសំណើរបស់អតីតប្រធានាធិបតីសហរដ្ឋអាមេរិកលោក Donald Trump ដែលសុំឱ្យមានការពិនិត្យលើឯកសារ ដែលភ្នាក់ងារស៊ើបអង្កេតសហព័ន្ធ FBI បានរឹបអូសយកពីគេហដ្ឋានរបស់លោក ក្នុងរដ្ឋ Florida ក្នុងអំឡុងពេលនៃការឆែកឆេរផ្ទះលោកកាលពីខែមុន។
កាលពីសប្តាហ៍មុន មេធាវីរបស់លោក Trump បានស្នើឱ្យចៅក្រមតុលាការសហព័ន្ធក្នុងរដ្ឋ Florida លោកស្រី Aileen Cannon តែងតាំងអ្នកជំនាញពិសេសម្នាក់ ដើម្បីសម្រេចថា តើក្នុងចំណោមឯកសារដែលភ្នាក់ងារ FBI រឹបអូសយកទាំងនោះ មានឯកសារណាខ្លះ ជាឯកសារដែលមានអភ័យឯកសិទ្ធិដែលគួរតែត្រូវប្រគល់ជូនដល់លោក Trump វិញនោះ។
ក្រសួងយុត្តិធម៌សហរដ្ឋអាមេរិក បានប្រឆាំងជំទាស់នឹងសំណើនេះ ដោយនិយាយថាខ្លួនបានធ្វើការពិនិត្យរបស់ខ្លួនលើឯកសារទាំងនោះរួចរាល់អស់ហើយ ហើយថា ការតែងតាំងអ្នកជំនាញពិសេសណាម្នាក់ នឹងរារាំងដល់ការស៊ើបអង្កេតលើការរក្សាទុកឯកសារសម្ងាត់របស់លោក Trump។ អ្នកជំនាញពិសេសជាមនុស្សឯករាជ្យ ដែលមិនជាប់ពាក់ព័ន្ធជាមួយភាគីទាំងសងខាងក្នុងរឿងក្តីក្តាំ ដែលត្រូវតែងតាំងដោយតុលាការនៅក្នុងករណីពិសេស ដើម្បីពិនិត្យមើលឯកសារដែលអាចស្ថិតនៅក្រោមអភ័យឯកសិទ្ធិរវាងមេធាវី និងកូនក្តី ឬ អភ័យឯកសិទ្ធិផ្សេងទៀត ដើម្បីធានាថាក្រុមអ្នកស៊ើបអង្កេត មិនមើលឯកសារទាំងនោះដោយមិនត្រឹមត្រូវនោះឡើយ។
លោកស្រី Cannon កាលពីសប្តាហ៍មុនបានបង្ហើបថា លោកស្រីមានទំនោរចង់អនុញ្ញាតតាមសំណើរបស់លោក Trump ក៏ប៉ុន្តែក្រោយពីបានស្តាប់ការជជែកទាញហេតុផលរបស់ក្រុមមេធាវីលោក Trump និង ក្រុមមេធាវីដើមចោទរបស់រដ្ឋាភិបាលរួចមក លោកស្រីបានថ្លែងថា លោកស្រីនឹងធ្វើសេចក្តីសម្រេច «នៅពេលសមស្របមួយ»។
អ្វីដែលនាំឱ្យមានការខ្វែងគំនិតគ្នានោះ គឺឯកសារសម្ងាត់ជាង១០០ ដែលត្រូវបានរកឃើញ ក្នុងអំឡុងពេលឆែកឆេររបស់ភ្នាក់ងារ FBI ក្នុងគេហដ្ឋានរបស់លោក Trump ដែលជាផ្នែកមួយនៃការស៊ើបអង្កេតរបស់រដ្ឋាភិបាលសហព័ន្ធដើម្បីចង់ដឹងថា តើឯកសាររបស់រដ្ឋាភិបាលបានស្ថិតនៅទីនោះដោយរបៀបណានោះ។
នៅក្រោមច្បាប់ចែងពីឯកសារប្រធានាធិបតី លោក Trump ត្រូវប្រគល់ឯកសារសេតវិមានទាំងអស់របស់លោក ទៅឱ្យបណ្ណសារដ្ឋានជាតិ នៅពេលដែលលោកចប់តំណែងជាប្រធានាធិបតី កាលពីខែមករាឆ្នាំ២០២១៕