កាលពីថ្ងៃព្រហស្បតិ៍ គណៈកម្មាធិការស៊ើបអង្កេតរបស់រដ្ឋសភាសហរដ្ឋអាមេរិកគ្រប់គ្រងដោយគណបក្សសាធារណរដ្ឋបានបើកការស៊ើបអង្កេតអំពីការចោទប្រកាន់ប្រឆាំងលោកប្រធានាធិបតី Joe Biden ដោយប្រធានគណៈកម្មាធិការនេះបាននិយាយថា ពលរដ្ឋអាមេរិកាំងស័ក្តិសមដឹងថាតើលោកប្រធានាធិបតីបានចំណេញផ្ទាល់ខ្លួនពីប្រាក់ ២០លានដុល្លារ ដែលកូនលោកឈ្មោះ Hunter បានទទួលពីកិច្ចព្រមព្រៀងធុរកិច្ចនៅក្រៅប្រទេសឬទេ។
នៅក្នុងការថ្លែងពេលបើកធ្វើការស៊ើបអង្កេតនេះ លោក James Comer ប្រធានគណៈកម្មាធិការត្រួតពិនិត្យនិងទទួលខុសត្រូវនៃរដ្ឋសភាអាមេរិកបានចោទប្រកាន់ថាសមាជិក៩នាក់នៃគ្រួសារលោក Biden បានទទួលប្រាក់សុទ្ធពីកិច្ចព្រមព្រៀងរបស់លោក Hunter Biden នៅក្នុងប្រទេសអ៊ុយក្រែននិងប្រទេសចិនពីឆ្នាំ ២០១៤ ដល់ឆ្នាំ ២០១៩។
លោក Comer បានសួរថា «តើគ្រួសារលោក Biden លក់ដូរអ្វី? ជនជាតិអាមេរិកាំងទាមទារឱ្យមានការទទួលខុសត្រូវខ្ពស់សម្រាប់វប្បធម៌នៃអំពើពុករលួយនេះ»។
តែលោក Comer មិនបានចោទប្រកាន់លោកប្រធានាធិបតី Biden ដោយផ្ទាល់ថាលោកបានធ្វើខុសទេ ហើយលោកប្រធានាធិបតីបាននិយាយថា លោកគ្មានទាក់ទិននឹងការព្រមព្រៀងរបស់កូនប្រុសលោកនៅក្រៅប្រទេសទេ ហើយលោកក៏មិនបានផលប្រយោជន៍ពីកិច្ចព្រមព្រៀងទាំងនេះឡើយ។ កាលពីប៉ុន្មានសប្តាហ៍មុននេះ លោកបានសើចនឹងការនិយាយថា គណនេយ្យធនាគារលោកមានទឹកប្រាក់កើនជាងមុនដោយសារមានការបញ្ចូលលុយពីកូនប្រុសលោក ដោយលោកបានសួរថា«តើប្រាក់កាសនេះនៅឯណា?»
តែមានភស្តុតាងថាកូនប្រុសអាយុ ៥៣ ឆ្នាំរូបនេះរបស់ប្រធានាធិបតី ជួនកាលបានហៅទូរសព្ទទៅឪពុកលោកពីភោជនីយដ្ឋាន នៅពេលលោកបរិភោគអាហារយប់ជាមួយពួកសហការីធុរកិច្ច ប្រហែលដើម្បីបង្ហាញពួកគេអំពីអំណាចនយោបាយរបស់គ្រួសារលោកនៅរដ្ឋធានី Washington។
តែយ៉ាងណាក៏ដោយ ក៏លោក Devon Archer សហការីម្នាក់របស់លោក Hunter Biden បានផ្តល់សក្ខីកម្មថា ការនិយាយគ្នាតាមទូរសព្ទពីចម្ងាយរវាងឪពុកនិងកូននេះទាក់ទងនឹងអាកាសធាតុឬភូមិសាស្ត្រនៅកន្លែងដាច់ស្រយាលដែលលោក Hunter Biden និងពួកដៃគូធុរកិច្ចរបស់លោកកំពុងបរិភោគអាហារ មិនមែននិយាយគ្នាអំពីកិច្ចការជំនួញទេ។
លោក Jamie Raskin អ្នកប្រជាធិបតេយ្យនាំមុខគេនៅក្នុងគណៈកម្មាធិការស៊ើបអង្កេតនេះបាននិយាយជាដំបូងនៅក្នុងការស៊ើបអង្កេតរបស់គណបក្សសាធារណរដ្ឋថា «គ្មានភស្តុតាងណាមួយប្រឆាំងនឹងលោកប្រធានាធិបតី Biden ឡើយ»៕