ឯកអគ្គរដ្ឋទូតសហរដ្ឋអាមេរិកប្រចាំនៅសហភាពអឺរ៉ុបលោក Gordon Sondland នៅថ្ងៃពុធនេះនឹងក្លាយជាសាក្សីដ៏ល្បីល្បាញបំផុតបង្ហាញខ្លួននៅខាងមុខសភាតំណាងរាស្រ្តសហរដ្ឋអាមេរិកនៅពេលដែលសភាតំណាងរាស្រ្តធ្វើសវនាការសាធារណៈស្តីពីការស៊ើបអង្កេតដកប្រធានាធិបតីត្រាំចេញពីតំណែង។
លោក Sondland មានគម្រោងផ្តល់កសិណសាក្សីនៅព្រឹកថ្ងៃពុធនេះ បន្ទាប់មកលោកស្រី Laura Cooper មន្រ្តីក្រសួងការពារប្រទេសនិងលោក David Hale អនុរដ្ឋមន្រ្តីការបរទេសនៅថ្ងៃពុធពេលថ្ងៃត្រង់។ លោកស្រី Fiona Hill អតីតទីប្រឹក្សាសេតវិ មាននិងលោក David Holmes មន្រ្តីការបរទេសប្រចាំអាជីពត្រូវផ្តល់កសិណសាក្សីនៅថ្ងៃព្រហស្បតិ៍។
កាលពីថ្ងៃអង្គារម្សិលម៉ិញ លោកស្រី Jennifer Williams អ្នកជំនួយការអនុប្រធានាធិបតីសហរដ្ឋអាមេរិកលោក Mike Pence និងលោកវរសេនីយទោ Alexander Vindman ជាអ្នកជំនាញខាងប្រទេសអ៊ុយក្រែនរបស់ក្រុមប្រឹក្សាសន្តិសុខជាតិ លោក Kurt Volker អតីតបេសកជនពិសេសសហរដ្ឋអាមេរិកប្រចាំនៅប្រទេសអ៊ុយក្រែននិងលោក Tim Morrison អតីតមន្រ្តីក្រុមប្រឹក្សាសន្តិសុខជាតិបានផ្តល់កសិណសាក្សី។
ពួកលោកទាំង៩នាក់នេះ បានផ្តល់កសិណសាក្សីក្នុងការប្រជុំសម្ងាត់អំពីការខំប្រឹងប្រែងរបស់ប្រធានាធិបតីត្រាំដាក់សម្ពាធលើប្រទេសអ៊ុយក្រែនឲ្យស៊ើបអង្កេតគូប្រជែងខាងនយោបាយរបស់លោកត្រាំគឺលោក Joe Biden អតីតអនុប្រធានាធិបតីនិងលោក Hunter ជាកូនប្រុសរបស់លោកដែលបានធ្វើជាសមាជិកក្រុមប្រឹក្សានាយករបស់ក្រុមហ៊ុនឧស្ម័នអ៊ុយក្រែន និងការស៊ើបអង្កេតពីការបង្កើតទ្រឹស្តីឃុបឃិតចំពោះការបោះឆ្នោតប្រធានាធិបតីសហរដ្ឋអាមេរិកនៅឆ្នាំ២០១៦។ សាក្សី៣នាក់នៃសាក្សីទាំងអស់៩នាក់ បានស្តាប់ការនិយាយទូរស័ព្ទនៅថ្ងៃទី២៥ ខែកក្កដារវាងលោកប្រធា នាធិបតីត្រាំនិងប្រធានាធិបតីរបស់អ៊ុយក្រែន៕