មេបញ្ជាការយោធាជាន់ខ្ពស់សហរដ្ឋអាមេរិកម្នាក់ថ្លែងថា កងកម្លាំងស.រ.អា.ទទួលខុសត្រូវចំពោះ «ការទម្លាក់គ្រាប់បែកខុស» លើមន្ទីពេទ្យមួយនៅទីក្រុង Kunduz ប្រទេសអាហ្វហ្គានីស្ថាន ដែលបានសម្លាប់អស់មនុស្ស២២នាក់។
លោកឧត្តមសេនីយ John Campbell បានថ្លែងប្រាប់គណៈកម្មាធិការសភាមួយ ក្នុងរដ្ឋធានីវ៉ាស៊ីនតោនថា កងកម្លាំងអាហ្វហ្គានីស្ថានបានស្នើសុំឲ្យមានការទម្លាក់គ្រាប់បែកលើមន្ទីពេទ្យដែលចាត់ចែងដោយអង្គការសប្បុរសធម៌អន្តរជាតិឈ្មោះ ក្រុមគ្រូពេទ្យគ្មានព្រំដែន ពីព្រោះថាក្រុមបះបោរតាលីបង់បានបាញ់ចេញពីទីនោះ។
ប៉ុន្តែលោកបានថ្លែងថា ស.រ.អា.បានធ្វើការទម្លាក់គ្រាប់បែកអស់រយៈពេល៣០នាទី បន្ទាប់ពីបានពិនិត្យមើលសំណើរនោះរួមមក។
លោកថ្លែងថា «សេចក្តីសម្រេចដើម្បីផ្តល់ការទម្លាក់គ្រាប់បែកតាមយន្តហោះនោះ ជាសេចក្តីសម្រេចរបស់ស.រ.អា. ធ្វើឡើងតាមលំដាប់ថ្នាក់នៃកងបញ្ជាការយោធាស.រ.អា.» ហើយលោកបានបន្ថែមទៀតថា «ស.រ.អា.មិនមានចេតនាទម្លាក់គ្រាប់បែកលើមន្ទីពេទ្យទេ។»
លោក Campbell ដែលដឹកនាំកងកម្លាំងអង្គការអូតង់ក្នុងប្រទេសអាហ្វហ្គានីស្ថាននោះ បដិសេធមិនពិភាក្សាល្អិតល្អន់អំពីការទម្លាក់គ្រាប់បែកនោះទេ ពីព្រោះស.រ.អា.និងអង្គការអូតង់កំពុងបន្តស៊ើបអង្កេតរឿងនេះ។
នៅឯសេតវិមាន អ្នកនាំពាក្យ Josh Earnest បានហៅការទម្លាក់គ្រាប់បែកនោះថា ជាសោកនាដកម្មយ៉ាងធ្ងន់ធ្ងរមួយ ហើយថាស.រ.អា.ចាត់ទុកថាជារឿងធំ៕