អង្គការយូនីសេហ្វ (UNICEF) ដែលជាអង្គការអន្តរជាតិធ្វើការលើកកម្ពស់សិទ្ធិនិងសុខុមាលភាពកុមារ បានអំពាវនាវឲ្យមានសកម្មភាពរួមគ្នាទប់ស្កាត់ការរករឿងឈ្លោះ និងបៀតបៀនលើយុវជនកម្ពុជាដែលកំពុងប្រើប្រាស់អ៊ីនធឺណេត។
ក្នុងទិវាសុវត្ថិភាពអ៊ីនធឺណេត នៅថ្ងៃទី៥ ខែកុម្ភៈ ឆ្នាំ២០១៩នេះ អង្គការយូនីសេហ្វ បានចេញសេចក្តីប្រកាសព័ត៌មានមួយ ដោយរំឭកដល់ការពិនិត្យមើលទ្បើងវិញនូវការយកចិត្តទុកដាក់អំពីសិទ្ធិប្រើប្រាស់ប្រព័ន្ធឌីជីថលរបស់កុមារ ក្រោយរយៈពេល៣០ឆ្នាំនៃការអនុម័តអនុសញ្ញាស្តីពីសិទ្ធិកុមារ និងការបង្កើតប្រព័ន្ធអ៊ីនធឺណេត។
អង្គការយូនីសេហ្វបានបញ្ជាក់ក្នុងសេចក្តីប្រកាសព័ត៌មាននោះថា នៅថ្ងៃអង្គារនេះ យូនីសេហ្វបានប្រកាសឲ្យដឹងជាមុនអំពីគ្រោះថ្នាក់ដែលបង្កឡើងដោយអំពើហិង្សា ការរករឿងឈ្លោះ និងការបៀតបៀនតាមប្រព័ន្ធអ៊ីនធឺណេតចំពោះយុវជន ដែលមានអាយុចាប់ពី១៥ទៅ២៥ឆ្នាំចំនួន៨៥,៧ភាគរយ ដែលកំពុងប្រើប្រាស់អ៊ីនធឺណេតនៅកម្ពុជា។ អង្គការអន្តរជាតិផ្នែកកុមារមួយនេះ ក៏បានអំពាវនាវឲ្យមានសកម្មភាពរួមគ្នាដើម្បីឆ្លើយតប និងទប់ស្កាត់អំពើហិង្សាលើកុមារ និងយុវជននៅតាមប្រព័ន្ធអ៊ីនធឺណេត។
សេចក្តីប្រកាសព័ត៌មានរបស់អង្គការយូនីសេហ្វដដែលបានស្រង់សម្តីរបស់អ្នកស្រីណាតាសា ផាឌីសុន នាយិកាស្តីទីយូនីសេហ្វប្រចាំកម្ពុជាតាមន័យដើមថា៖
«យើងបានដឹងពីកុមារនិងយុវជននៅទូទាំងសកលលោកយ៉ាងច្បាស់ថា ប្រព័ន្ធអ៊ីនធឺណេតបានក្លាយជាប្រព័ន្ធគ្មានក្តីមេត្តា។ ហេតដូច្នេះហើយបានជាក្នុងទិវាសុវត្ថិភាពអ៊ីនធឺណេតនៅថ្ងៃនេះ យូនីសេហ្វបានចូលរួមជាមួយកុមារ និងយុវជន សំណូមពរឲ្យគ្រប់គ្នាមានក្តីសណ្តាសប្រណីដល់គ្នាទៅវិញទៅមក នៅតាមប្រព័ន្ធអនឡាញ និងអំពាវនាវឲ្យចាត់វិធានការកាន់តែម៉ឺងម៉ាត់បន្ថែមទៀត ដើម្បីធ្វើឲ្យអ៊ីនធឺណេតក្លាយទៅជាប្រព័ន្ធកាន់តែមានសុវត្ថិភាពសម្រាប់គ្រប់គ្នា»។
ក្រុមប្រជាពលរដ្ឋដែលប្រើប្រាស់អ៊ីនធឺណេតនៅកម្ពុជា គឺមានអាយុកាន់តែតិចទៅៗ។ ក្នុងចំណោមកុមារអាយុ១៥ឆ្នាំទាំងអស់គឺមាន៤,៥ភាគរយកំពុងប្រើប្រាស់អ៊ីនធឺណេត។ ខណៈដែលសិស្សមានអាយុកាន់តែច្រើន កាន់តែងាយប្រឈមនឹងការសម្លុតគំរាមតាមប្រព័ន្ធអ៊ីនធឺណេត បើធៀបនឹងសិស្សដែលមានអាយុតិចជាង ហើយកុមារគឺជាក្រុមដែលងាយរងគ្រោះពីព័ត៌មានគ្រោះថ្នាក់ ការកេងប្រវ័ញ្ច ការរំលោភបំពានផ្លូវភេទ និងការសម្លុតគំរាមតាមប្រព័ន្ធអ៊ីនធឺណេតផងដែរ។
ការបៀតបៀនតាមប្រព័ន្ធអ៊ីនធឺណេតអាចបង្កឲ្យមានការឈឺចាប់យ៉ាងធ្ងន់ធ្ងរ ហើយវាអាចកើតលើមនុស្សជាច្រើននាក់។ សកម្មភាពនិងព័ត៌មានបៀតបៀនទាំងនោះនៅតែមានវត្តមាននៅលើប្រព័ន្ធអនឡាញដោយគ្មានពេលកំណត់ ពោលគឺនៅតែតាមធ្វើបាបជនរងគ្រោះតាមប្រព័ន្ធអនឡាញពេញមួយជីវិត។
សេចក្តីប្រកាសព័ត៌មាននោះបញ្ជាក់អំពីផលប៉ះពាល់តាមន័យដើមថា៖
«ជនរងគ្រោះដោយសារការបៀតបៀនតាមប្រព័ន្ធអ៊ីនធឺណេតអាចរងផលប៉ះពាល់ដោយទំនងជាឈានទៅប្រើប្រាស់គ្រឿងស្រវឹង គ្រឿងញៀន និងគេចមិនចូលរៀនជាងសិស្សដទៃទៀត។ ពួកគេក៏ច្រើនតែទទួលបានពិន្ទុទាប និងផ្តល់តម្លៃឲ្យខ្លួនឯងទាប ក៏ដូចជាជួបប្រទះនឹងបញ្ហាសុខភាពជាច្រើន។ ក្នុងស្ថានភាពធ្ងន់ធ្ងរ ការបៀតបៀនតាមប្រព័ន្ធអ៊ីនធឺណេតអាចនាំឲ្យមានការធ្វើអត្តឃាតក៏មាន»។
លោកមាស ប៊ុនលី មន្រ្តីទំនាក់ទំនងព័ត៌មានរបស់អង្គការយូនីសេហ្វ ប្រាប់ VOA នារសៀលថ្ងៃអង្គារនេះថា ការបៀតបៀនតាមប្រព័ន្ធអ៊ីនធឺណែតនៅកម្ពុជាកើតមានឡើងជាច្រើនរូបភាព ដូចជាការជេរប្រមាថ ការវាយប្រហារ ការបង្អាប់បន្ទោសជាដើម។ លោកបន្ថែមថា ករណីទាំងនេះធ្វើឲ្យប៉ះពាល់យ៉ាងខ្លាំងដល់អ្នកប្រើប្រាស់អ៊ីនធឺណែតដែលរងការវាយប្រហារ។
ដោយបញ្ជាក់ពីមូលហេតុដែលកម្ពុជាមានការបៀតបៀនតាមប្រព័ន្ធអ៊ីនធឺណេតច្រើនយ៉ាង លោកមាស ប៊ុនលី បន្ថែមដូច្នេះថា៖
«នៅសាលារៀនក៏មិនទាន់មានការបង្រៀន នៅក្នុងសង្គមក៏មិនទាន់មានការជជែកគ្នា ឬក៏បង្រៀនគ្នាឲ្យដឹងថា តើយើងត្រូវប្រើប្រាស់របៀបណាដើម្បីឲ្យមានប្រយោជន៍ ហើយនៅពេលយើងទទួលរងផលប៉ះពាល់អវិជ្ជមានហ្នឹង យើងត្រូវធ្វើយ៉ាងម៉េច? អ៊ីចឹងយើងឃើញថា វានៅថ្មីមែនទែន ហើយដោយសារតែហេតុនេះហើយ យើងគួរតែយកចិត្តទុកដាក់ ហើយការយកចិត្តទុកដាក់នេះមិនមែនទាមទារតែខាងរដ្ឋាភិបាលទេគឺគ្រប់គ្នាតែម្តង»។
ចាប់តាំងពីកម្ពុជាមានការប្រើប្រាស់ប្រព័ន្ធអ៊ីនធឺណេតកាន់តែទូលំទូលាយ គេឃើញការបង្ហោះសារផ្សេងៗលើបណ្តាញសង្គមមួយចំនួន ជាពិសេសលើបណ្តាញសង្គមហ្វេសប៊ុកដែលមានអ្នកប្រើប្រាស់ប្រមាណជា៧លាននាក់ តែងមានការប្រើប្រាស់ពាក្យសម្តីអសុរោះ និងការរិះគន់ផ្សេងៗ។
ថ្មីៗនេះ គេឃើញបុរសម្នាក់ដែលត្រូវបានគេហៅថា ជាបុរសភេទទី៣ បានបង្ហោះវីដេអូនិយាយប្រមាថលើជាតិសាសន៍ខ្មែរ។ ក្រោយការបង្ហោះវីដេអូនោះ អ្នកប្រើហ្វេសប៊ុកមួយចំនួនបានជេរប្រមាថលើបុរសម្នាក់នោះវិញ ដោយមានទាំងការព្រមានប្រើហិង្សាលើបុរសភេទទី៣នោះជាដើម។
ក្នុងកម្មវិធី Hello VOA កាលពីថ្ងៃច័ន្ទ លោកប៉ា ច័ន្ទរឿន ប្រធានមជ្ឈមណ្ឌលទស្សនវិជ្ជាអនុវត្តន៍ និងសីលធម៌កម្ពុជានិងជាអ្នកនិពន្ធសៀវភៅ«ក្រមសីលធម៌សម្រាប់អ្នកប្រើប្រាស់អ៊ីនធឺណេត» លើកឡើងថា សីលធម៌ក្នុងសង្គមកម្ពុជាកំពុងស្ថិតក្នុងវិបត្តិដែលគួរឲ្យព្រួយបារម្ភ ដោយសារប្រជាជនខ្វះការអប់រំផ្នែកសីលធម៌។ លោកបន្ថែមថា ការពង្រឹងសីលធម៌ប្រជាពលរដ្ឋ និងសីលធម៌សង្គម ត្រូវធ្វើឡើងតាមរយៈការអប់រំ ដោយមានការចូលរូមពីរដ្ឋាភិបាល និងបុគ្គលខ្លួនឯងផ្ទាល់។
ចំណែកអ្នកនាំពាក្យក្រសួងអប់រំ លោករស់ សុវាចា ប្រាប់ VOA ថា ក្រសួងអប់រំកម្ពុជាមានគោលនយោបាយក្នុងការពង្រឹងសីលធម៌សង្គម និងពលរដ្ឋ ឲ្យកាន់តែមានភាពប្រសើរឡើង តាមរយៈការបញ្ជូលការពង្រឹងសីលធម៌ទៅក្នុងកម្មវិធីសិក្សា និងអប់រំផ្សេងៗ។
គេហទំព័ររបស់និយ័តករទូរគមនាគមន៍កម្ពុជាបញ្ជាក់ថា គិតត្រឹមខែមេសាឆ្នាំ២០១៨នេះ កម្ពុជាមានអ្នកប្រើប្រាស់អ៊ីនធឺណិតជិត១១លាននាក់ និងមានអ្នកប្រើបណ្តាញទំនាក់ទំនងសង្គមហ្វេសប៊ុកប្រមាណជា៧លាននាក់។
ទិន្នន័យពីយូណេស្កូបង្ហាញថា ការបៀតបៀនតាមប្រព័ន្ធអ៊ីនធឺណេតក្នុងប្រទេសដែលមានចំណូលខ្ពស់ ភាគរយនៃកុមារនិងក្មេងជំទង់ដែលរងផលប៉ះពាល់ពីការរករឿងឈ្លោះតាមប្រព័ន្ធអ៊ីនធឺណេតមានចាប់ពី៥ទៅ២១ភាគរយ ហើយកុមារីហាក់បីដូចជាទទួលរងគ្រោះពីការធ្វើបាបតាមប្រព័ន្ធអ៊ីនធឺណេតច្រើនជាងកុមារា។ សម្រាប់កម្ពុជា ក្នុងចំណោមក្មេងស្រីអាយុពី១៥ទៅ២៤ឆ្នាំទាំងអស់ មានចំនួន៨៤,៤ភាគរយកំពុងប្រើប្រាស់ប្រព័ន្ធអ៊ីនធឺណេត ហើយកុមារាដែលស្ថិតក្នុងក្រុមអាយុដូចគ្នានេះគឺមាន៩១,៥ភាគរយ៕