មន្ត្រីនៃឧត្តមស្នងការអង្គការសហប្រជាជាតិសម្រាប់ជនភៀសខ្លួននៅរសៀលថ្ងៃព្រហស្បតិ៍នេះ បានចុះទៅដល់ភូមិដាច់ស្រយាលមួយដែលជាគេសង្ស័យថា មានជនជាតិដើមតំបន់ភ្នំវៀតណាមចំនួន១៣នាក់កំពុងសម្ងំលាក់ខ្លួន។ ក៏ប៉ុន្តែពុំមានជនភៀសខ្លួនណាម្នាក់ត្រូវបានរកឃើញនោះទេ។
លោក ឆាយ ធី អ្នកសម្របសម្រួលរបស់សមាគមអាដហុកប្រចាំខេត្តរតនគីរី ដែលបានអមដំណើរជាមួយមន្ត្រីអង្គការសហប្រជាជាតិចំនួនពីររូប បានឲ្យដឹងថា មន្ត្រីទាំងពីររូបនេះបានចំណាយពេលប្រមាណជាកន្លះម៉ោងក្នុងការចុះអង្កេតផ្ទាល់នៅក្នុងភូមិស្នងហៃ ឃុំសេដា ដែលស្ថិតនៅចម្ងាយប្រមាណជាង៥០គីឡូម៉ែត្រពីទីរួមខេត្ត។
«យើងបានមកដល់ទីតាំងដែលមានសេចក្តីរាយការណ៍ថា មានការហ៊ុំព័ទ្ធពីប៉ូលិសនៅក្នុងតំបន់មួយដែលគេសង្ស័យថា ជនភៀសខ្លួនលាក់ខ្លួននៅទីនោះ។ ប៉ុន្តែមិនបានឃើញអ្វីទាំងអស់»។
មន្ត្រីអង្គការសហប្រជាជាតិចំនួនបួនរូប ក្នុងនោះមានបរទេសពីររូប និងជនជាតិកម្ពុជាចំនួនពីររូប មកពីឧត្តមស្នងការអង្គការសហប្រជាជាតិសម្រាប់ជនភៀសខ្លួន (UNHCR)និងមកពីការិយាល័យឧត្តមស្នងការអង្គការសហប្រជាជាតិសម្រាប់សិទ្ធិមនុស្សនៅកម្ពុជា បានទៅដល់ខេត្តរតនគីរីកាលពីថ្ងៃពុធម្សិលមិញនេះ ដើម្បីពិនិត្យស្ថានភាពជាក់ស្តែងពីជនជាតិដើមភាគតិចម៉ុងតាញ៉ាវៀតណាម។ ជនជាតិចារ៉ាយវៀតណាមទាំងនេះត្រូវគេរាយការណ៍មកថា បានគេចខ្លួនពីការធ្វើទុក្ខបុកម្នេញរបស់អាជ្ញាធរវៀតណាម ហើយបានមកដល់ក្នុងព្រៃនៃខេត្តរតនគីរីចាប់តាំងពីចុងខែតុលាមកម្ល៉េះ។
មន្ត្រីអង្គការសហប្រជាជាតិទទួលបន្ទុកផ្នែកសិទ្ធិមនុស្សបានជួបជាមួយស្នងការរងប៉ូលិសខេត្តរតនគីរីនៅរសៀលថ្ងៃដដែលនេះ។ នេះបើយោងតាមប្រភពពីមន្ត្រីសិទ្ធិមនុស្ស និងលោកស្នងការឧត្តមសេនីយ៍ត្រី ងួន កឿន។ ប៉ុន្តែមិនមានព័ត៌មានដែលលេចធ្លាយពីការជជែកគ្នានោះទេ។
ឧត្តមស្នងការអង្គការសហប្រជាជាតិបានស្នើសុំការអនុញ្ញាតពីក្រសួងមហាផ្ទៃក្នុងការចុះពិនិត្យស្ថានភាពជនភៀសខ្លួនវៀតណាមនេះ ប៉ុន្តែក្រសួងមហាផ្ទៃមិនបានផ្តល់ចម្លើយជាផ្លូវការនោះទេ។
កាលពីថ្ងៃអង្គារ ឧត្តមស្នងការអង្គការសហប្រជាជាតិសម្រាប់ជនភៀសខ្លួន (UNHCR) បានសម្តែងកង្វល់ចំពោះស្ថានភាពជនជាតិដើមភាគតិច ដែលគេចខ្លួនពីតំបន់ខ្ពង់រាបវៀតណាមនេះ បន្ទាប់ពីមានសេចក្តីរាយការណ៍ដែលថា កងប៉ូលិសកម្ពុជាបើកប្រតិបត្តិការតាមចាប់ពួកគេ និងត្រូវបញ្ជូនពួកគេទៅឲ្យអាជ្ញាធរប្រទេសវៀតណាមវិញ។
អង្គការសហប្រជាជាតិទទូចឲ្យរដ្ឋាភិបាលកម្ពុជាបញ្ឈប់សកម្មភាពនេះហើយបានស្នើឲ្យមានការសហការរួមគ្នាដើម្បីចុះពិនិត្យក្រុមជនជាតិដើមភាគតិចទាំងនេះ។ ក៏ប៉ុន្តែបើយោងតាមលោកឆាយ ធី អ្នកសម្របសម្រួលរបស់សមាគមសិទ្ធិមនុស្សអាដហុក បានឲ្យដឹងថា ពុំមានការសហការពីក្រុមអាជ្ញាធរក្នុងការចុះពិនិត្យស្ថានភាពជនភៀសខ្លួននៅថ្ងៃនេះទេ។
លោកឧត្តមសេនីយ៍ត្រី ងួន កឿន ស្នងការនគរបាលខេត្តរតនគីរី អះអាងនៅថ្ងៃនេះថា កងនគរបាលនៅតែស្វែងរកជនភៀសខ្លួនវៀតណាមបន្តទៀតនៅឡើយ។
«យើងនៅបន្តរក តែរកមិនឃើញ»។
លោក ស្រីវីវាន តាន់ អ្នកនាំពាក្យឧត្តមស្នងការអង្គការសហប្រជាជាតិសម្រាប់ជនភៀសខ្លួនប្រចាំតំបន់ មានប្រសាសន៍តាមសារអេឡិចត្រូនិកឬអ៊ីម៉ែលថា លោកស្រីមិនបានដឹងអំពីព័ត៌មានថ្មីៗរបស់ជនភៀសខ្លួនទាំងនេះទេ។
ជនជាតិដើមភាគតិចទាំង១៣នាក់នេះត្រូវគេរាយការណ៍ថា បានគេចខ្លួនពីការធ្វើទុក្ខបុកម្នេញរបស់អាជ្ញាធរវៀតណាមផ្នែកសេរីភាពសាសនា សេរីភាពក្នុងការប្រើប្រាស់អ៊ីនធើណែតនិងសិទ្ធិដីធ្លី ហើយពួកគេបានភៀសខ្លួនចូលក្នុងព្រៃនៃខេត្តរតនគីរីដើម្បីស្វែងរកសិទ្ធិជ្រកកោណនៅប្រទេសទី៣។
ក្នុងចំណោមជនភៀសខ្លួនទាំងនោះមានស្ត្រីម្នាក់ផងដែលទើបនឹងចេញពីពន្ធនាគាររបស់រដ្ឋការក្រុងហាណូយ៕