លោកស្រី Maud De Boer-Buquicchio អ្នករាយការណ៍ពិសេសរបស់អង្គការសហប្រជាជាតិទទួលបន្ទុកផ្នែកកេងប្រវ័ញ្ចផ្លូវភេទ និងការជួញដូរកុមារម្នាក់ បានអំពាវនាវបែបនេះទៅរដ្ឋាភិបាលប្រទេសឡាវ បន្ទាប់ពីការធ្វើទស្សនកិច្ចជាផ្លូវការរបស់លោកស្រី ខណៈដែលរដ្ឋាភិបាលប្រទេសឡាវកំពុងចាត់វិធានការផ្លូវច្បាប់ និងយុទ្ធនាការនានាដើម្បីដោះស្រាយបញ្ហារំលោភបំពាន និងជួញដូរកុមារ។
លោកស្រី Maud De Boer-Buquicchio បានគាំទ្រវិធានការនានារបស់ក្រសួងការងារ និងសន្តិសុខសង្គមរបស់ប្រទេសឡាវ ដោយមានការគាំទ្រពីអង្គការ UNICEF និង អង្គការក្រៅរដ្ឋាភិបាលនានា ដើម្បីបង្កើតបណ្តាញការពារកុមារនៅតាមភូមិ និង ស្រុកនានា។ ក៏ប៉ុន្តែ លោកស្រីបាននិយាយថា បណ្តាញទាំងនេះនៅតែមានលក្ខណៈរាយប៉ាយ ហើយពឹងផ្អែកលើអ្នកស្ម័គ្រចិត្ត។
លោកស្រីបានអំពាវនាវឲ្យមានកិច្ចខិតខំប្រឹងប្រែងបន្ថែមទៀត ក្នុងការកំណត់ និង បង្ការការរំលោភបំពានផ្លូវភេទកម្រិតខ្ពស់ទៅលើក្មេងស្រី និង ការកេងប្រវ័ញ្ចកម្លាំងពលកម្មទៅលើក្មេងប្រុស។
លោកស្រី De Boer-Buquicchio បានប្រាប់ VOA ថា «ផ្អែកលើបទសម្ភាសន៍នានារបស់ខ្ញុំ ជាមួយនឹងជនរងគ្រោះ និងអ្នកពាក់ព័ន្ធក្នុងការការពារកុមារ និងអ្នកដែលមានភស្តុតាង ខ្ញុំអាចនិយាយថា មានបញ្ហាច្រើនណាស់នៅគ្រប់វិស័យនៃការជួញដូរកុមារ»។
ប្រទេសឡាវនៅតែស្ថិតក្នុងលំដាប់ថ្នាក់ទី២ក្នុងលក្ខខណ្ឌតាមឃ្លាំមើលរបស់សហរដ្ឋអាមេរិក នៃការតាមដាននិងប្រឆាំងការជួញដូរមនុស្ស។ បើទោះជាប្រទេសឡាវមិនបានសម្រេចនូវស្តង់ដាកម្រិតអប្បបរិមាក្នុងការកាត់បន្ថយការជួញដូរមនុស្សក៏ដោយ ក៏ប្រទេសនេះខិតខំប្រឹងប្រែងយ៉ាងខ្លាំងដើម្បីដោះស្រាយបញ្ហានេះ។
រដ្ឋាភិបាលប្រទេសឡាវមិនបានធ្វើអត្ថាធិប្បាយសម្រាប់សេចក្តីរាយការនេះទេ ប៉ុន្តែរបាយការណ៍របស់ក្រសួងការបរទេសអំពីការជូញដូរមនុស្សស្តីពីប្រទេសឡាវសម្រាប់ឆ្នាំ២០១៧ បានសង្កត់ធ្ងន់ទៅលើកិច្ចខិតខំប្រឹងប្រែងលើការពង្រឹងការអនុវត្តន៍ច្បាប់របស់ប្រទេសឡាវដែលមានលក្ខណៈតិចតួច និងការអនុម័តច្បាប់ប្រឆាំងនឹងការជួញដូរមនុស្សនៅឆ្នាំ២០១៥ និង ការចាប់ខ្លួនហើយផ្តន្ទាទោសទៅលើឈ្មួញជួញដូរមនុស្សប៉ុន្មាននាក់។
របាយការណ៍ដដែលនេះបានឲ្យដឹងថា ប្រទេសឡាវបានផ្តោតទៅលើវិធានការបង្ការ ដោយបង្កើនកម្មវិធីយល់ដឹងពីការប្រឆាំងនឹងការជួញដូរមនុស្ស តាមរយៈបណ្តាញសារព័ត៌មានដែលគ្រប់គ្រងដោយរដ្ឋ និងទំនាក់ទំនងជាមួយនឹងមេដឹកនាំតាមខេត្ត និង សមាជិកសហគមន៍ពីគ្រោះថ្នាក់នៃការជួញដូរមនុស្ស។
លោកស្រី De Boer-Buquicchio បាននិយាយថា ការអញ្ជើញលោកស្រីឲ្យធ្វើទស្សនកិច្ច និងស៊ើបអង្កេតនៅប្រទេសឡាវ បានបង្ហាញពីសញ្ញាណក្នុងការបើកចំហ និង ការបង្កើតទំនាក់ទំនងឲ្យបានកាន់តែច្រើនជាមួយនឹងសហគមន៍អន្តរជាតិ។ លោកស្រីបានថ្លែងថា៖ «ខ្ញុំយល់ថា ទាំងនេះជាដំណើការដែលផ្តល់ផលវិជ្ជមានយ៉ាង ខ្លាំង»។
ក្រុមអ្នកគាំទ្រសិទ្ធិកុមារបាននិយាយថា ប្រទេសឡាវគឺជាប្រភពដ៏សំខាន់សម្រាប់ការជួញដូរកុមារ ជាពិសេសការបញ្ចូនកុមារទៅប្រទេសជិតខាងគឺប្រទេសថៃ ដើម្បីធ្វើការនៅតាមភោជនីយដ្ឋាន បារ និង ឧស្សាហកម្មផ្លូវភេទ។
ប៉ុន្តែ លោកស្រី De Boer-Buquicchio បាននិយាយថា ការស៊ើបអង្កើតរបស់លោកស្រីក៏បានចង្អុលបង្ហាញ ពីការរំលោភបំពានទៅលើកុមារតាមរយៈការជួញដូរកុមារនៅក្នុងប្រទេសឡាវផ្ទាល់ និង ការកេងប្រវ័ញ្ចផ្លូវភេទនៅក្នុងទីក្រុងធំៗ និងនៅតំបន់សេដ្ឋកិច្ចពិសេសទូទាំងប្រទេសឡាវ។
តំបន់សេដ្ឋកិច្ចពិសេសទាំងនេះ បានទាក់ទាញការវិនិយោគទុនពីបរទេស ជាពិសេសពីប្រទេសចិន និងពីតំបន់ក្បែរព្រំដែនប្រទេសចិនដែលល្បីពីកាស៊ីណូ ការលាងលុយកខ្វក់ ពេស្បាចារ និង ល្បែងស៊ីសង។
លោកស្រីបានបន្ថែមថា កុមារបានក្លាយទៅជាប្រភពនៃកូនក្រមុំក្មេង សម្រាប់ពាណិជ្ជករចិននៅប្រទេសឡាវ។
លោកស្រី De Boer-Buquicchio បានថ្លែងថា៖
«នៅពេលយើងនិយាយពីការជួញដូរមនុស្សឆ្លងប្រទេស យើងគួរដឹងថាមានករណីមួយចំនួន ពីអាពាហ៍ពិពាហ៍កុមារទាំងបង្ខំជាមួយនឹងពាណិជ្ជករ ជាពិសេសពាណិជ្ជករចិន ដោយក្រុមគ្រួសាររបស់កុមារទាំងនោះបានដឹងឭ ឬក៏មិនបានដឹងលឺក៏ដោយ ដែលករណីទាំងនេះកើតឡើងនៅផ្នែកខាងជើងនៃប្រទេស»។
ប្រទេសឡាវនៅតែជាប្រទេសក្រីក្រជាងគេក្នុងចំណោមប្រទេសឯទៀតនៅអាស៊ីអាគ្នេយ៍ ដែលមនុស្សជំទង់ជាញឹកញាប់មានកាតព្វកិច្ចជួយទ្រទ្រង់គ្រួសាររបស់ពួកគេតាមរយៈការធ្វើការ ឬ រៀបការដើម្បីទទួលបានចំណងដៃ។
លោកស្រី De Boer-Buquicchio បាននិយាយថា កុមារអាចមានអាយុក្មេងៗត្រឹម១១ឆ្នាំជាជនរងគ្រោះពីការជួញដូរ និង អាពាហ៍ពិពាហ៍កុមារ ធ្វើឲ្យអាយុរបស់ជនរងគ្រោះកាន់តែក្មេងជាងកាលពីមុន។
លោកស្រីបានបន្តថា៖
«បច្ចុប្បន្ន កុមារជនរងគ្រោះកាន់តែក្មេងជាងមុន ដូច្នេះបើទោះជាករណីជួញដូរឆ្លងប្រទេសមានការថយចុះ ប៉ុន្តែអាយុនៃជនរងគ្រោះមានអាយុកាន់តែក្មេងជាងកាលពីមុន។ ហើយនេះគឺជានិន្នាការដ៏គួរឲ្យព្រួយបារម្ភមួយ»។
របាយការណ៍ជួញដូរមនុស្សរបស់ក្រសួងការបរទេសសហរដ្ឋអាមេរិក ក៏បានព្រមានថាការរំលោភបំពានផ្លូវភេទកុមារដោយអ្នកទេសចរ ពីចក្រភពអង់គ្លេស ប្រទេសអូស្ត្រាលី និងសហរដ្ឋអាមេរិក ធ្វើដំណើរទៅប្រទេសឡាវដើម្បីសំដៅទៅរកកុមារ។
ការជួញដូរកុមារពីប្រទេសឡាវ បានផ្តោតសំខាន់ទៅលើប្រទេសជិតខាងគឺប្រទេសថៃ ដោយសារមួយផ្នែកនៃចំណងវប្បធម៌រវាងប្រទេសទាំងពីរ។
ប្រទេសថៃ និង ប្រទេសឡាវបានស្វែងរកដំណោះស្រាយទៅលើបញ្ហាទាំងនេះ តាមរយៈកិច្ចព្រមព្រៀងទ្វេភាគី និងអនុស្សរណៈយោគយល់នានា។ ប៉ុន្តែលោកស្រី De Boer-Buquicchio បានថ្លែងថាវិធានការទាំងនេះនៅតែមានការខ្វះខាត។
លោកស្រីបានថ្លែងថា៖
«ច្បាប់ប្រឆាំងការជួញដូរមនុស្សត្រូវបានអនុម័តហើយ។ អនុស្សារណៈយោគយល់ក៏មានហើយ ប៉ុន្តែការអនុវត្តន៍ច្បាប់ និងប្រសិទ្ធិភាពនៃវិធានការបង្ការ និង ជំនួយពិសេសគឺមិនទាន់មានគ្រប់គ្រាន់នៅឡើយទេ»។
លោកស្រីបានបន្ថែមថា កុមារដែលរំពឹងទុកថានឹងធ្វើការនៅតាមភោជនីយដ្ឋាន និងគេហដ្ឋាន ភាគច្រើនមិនបានដឹងពីអ្វីដែលនឹងកើតឡើងនៅពេលពួកគេឆ្លងព្រំដែនទៅប្រទេសថៃឡើយ។
លោកស្រីបានថ្លែងថា៖
«ឈ្មួញជួញដូរមនុស្សដឹងថា កុមារមិនមានការគាំពារទេ នៅក្នុងន័យដែលពួកគេមិនដឹងពីបែបបទក្នុងការឆ្លងដែន ហើយជាការពិតដែលពួកគេមិនបានទៅយកឯកសារសម្គាល់អត្តសញ្ញាណនានាទេ ដូច្នេះចំណុចនេះហើយ កុមារទាំងនេះងាយនឹងរងគ្រោះពីការជួញដូរណាស់ ពួកគេងាយនឹងចាញ់ការបញ្ឆោត»។
នៅប្រទេសថៃ អាជ្ញាធរឃាត់ខ្លួនជនអន្តោប្រវេសន៍ខុសច្បាប់ រួមទាំងកុមារ ក្នុងអំឡុងការចុះឆែកឆេរនៅតាមភោជនីយដ្ឋាន និង ផ្ទះបន ដោយឃាត់ខ្លួនពួកគេនៅមន្ទីរឃុំឃាំងជនអន្តោប្រវេសន៍ មុនពេលបញ្ចូនពួកគេត្រឡប់ទៅប្រទេសឡាវវិញ។
លោកស្រី De Boer-Buquicchio បាននិយាយថា កម្មវិធីមាតុភូមិនិវត្តន៍នានា គឺមិនគ្រប់គ្រាន់ដើម្បីការពារ និង គាំទ្រកុមារទេ។
លោកស្រីបានថ្លែងថា៖
«ពេលយើងនិយាយពីការធ្វើមាតុភូមិនិវត្តន៍ មានចន្លោះខ្វះខាតធំៗអំពីជំនួយ។ នៅពេលពួកគេត្រឡប់ទៅប្រទេសឡាវវិញ ជាថ្មីម្តងទៀត កុមារមិនដឹងថាទៅរកជំនួយពីអ្នកណា មិនដឹងពីសិទ្ធិរបស់ពួកគេ ពេលខ្លះមានអំពើពុករលួយនៅតាមព្រំដែនទៀតផង ដូច្នេះហើយការជួបជុំជាមួយក្រុមគ្រួសាររបស់ពួកគេវិញ គឺមានបញ្ហាច្រើនណាស់»។
ក្នុងអំឡុងកិច្ចពិភាក្សាទ្វេភាគីជាមួយប្រទេសថៃអំពីការជួញដូរមនុស្សកាលពីខែកក្កដាកន្លងទៅនេះ លោក Khamkhane Phinsavanh ប្រធានក្រសួងការងារ និងសន្តិសុខសង្គមរបស់ប្រទេសឡាវ បានសន្យាថានឹងតាមមើលជនរងគ្រោះទាំងនោះដែលត្រូវបានបញ្ចូនត្រឡប់មកប្រទេសឡាវវិញ ដើម្បីជួយពួកគេឲ្យត្រឡប់មករួមរស់ក្នុងសង្គមជាធម្មតាវិញ និងរស់នៅជាមួយក្រុមគ្រួសាររបស់ពួកគេ៕
ប្រែសម្រួលដោយ លឹម ហ្គេចហៀង