ភ្នំពេញ៖ អង្គការឃ្លាំមើលសិទ្ធិមនុស្ស Human Rights Watch ឲ្យដឹងថា រដ្ឋាភិបាលកម្ពុជាត្រូវតែចាត់វិធានការដើម្បីបញ្ចប់ការរំលោភរបស់នគរបាលទៅលើនារីរកស៊ីផ្លូវភេទ។ របាយការណ៍ថ្មីមួយរៀបរៀងដោយអង្គការនេះបានរកឃើញថា ស្រីពេស្យានៅកម្ពុជាទទួលរងការចាប់ខ្លួនតាមអំពើចិត្ត ឃុំខ្លួនខុសច្បាប់ ការវាយដំ និងការរំលោភដោយអាជ្ញាធរ។
អង្គការសិទ្ធិមនុស្សឲ្យដឹងថា ការស្រាវជ្រាវរបស់ខ្លួនត្រូវបានធ្វើឡើងដោយផ្អែកលើការសម្ភាសស្រ្តីរកស៊ីផ្លូវភេទចំនួន ៩០នាក់ កាលពីឆ្នាំកន្លងទៅ ហើយលាតត្រដាងបញ្ហាដែលធ្ងន់ធ្ងរនៅរាជធានីភ្នំពេញ។
អេលែន ភាសាន់ (Elaine Pearson) ជាប្រធានស្តីទីអង្គការឃ្លាំមើលសិទ្ធិមនុស្ស Human Rights Watch ប្រចាំទ្វីបអាស៊ី។ លោកស្រីមានប្រសាសន៍ថា មានកត្តាមួយចំនួននៅពីក្រោយការចាប់ខ្លួន និងការឃុំឃាំងខុសច្បាប់ដែលត្រូវបានធ្វើឡើងចំពោះស្រ្តីរកស៊ីផ្លូវភេទ និងការបំពារបំពានផ្សេងៗទៀតក្រោយពីការឃុំខ្លូន។ លោកស្រីថ្លែងដូច្នេះថា៖
«យើងរកឃើញថា ច្បាប់ប្រឆាំងការជួញដូរមនុស្សឆ្នាំ២០០៨ រួមចំណែកធ្វើឲ្យមានការរំលោភបំពាននេះ ពីព្រោះវាអាចផ្តល់លេសដើម្បីចាប់ខ្លួនស្រ្តីរកស៊ីផ្លូវភេទ។ ប៉ុន្តែយើងរកឃើញថា វាក៏អាចកើតឡើងដោយសារអភិបាលខេត្តក្រុងបញ្ជាឲ្យបង្ក្រាបអំពើអបាយមុខ និងពេស្យាកម្ម ដែលជាកិច្ចខិតខំប្រឹងប្រែងយូរៗម្តង ដើម្បីសម្អាតផ្លូវ និងថែរក្សាសណ្តាប់ធ្នាប់សង្គមផងដែរ»។
លោកស្រី ភាសាន់ មានប្រសាសន៍ថា រដ្ឋាភិបាលគួរតែលប់ចោលមាត្រាមួយចំនួននៃច្បាប់ប្រឆាំងការជួញដូរមនុស្សដែលក្រុមនគរបាលប្រើប្រាស់ដើម្បីចាប់ស្រ្តីរកស៊ីផ្លូវភេទ។
អង្គការ Human Rights Watch ឲ្យដឹងថា រដ្ឋាភិបាលត្រូវតែចែកឲ្យដាច់រវាងអ្នករកស៊ីផ្លូវភេទ និងជនរងគ្រោះនៃការជួញដូរមនុស្ស។
អង្គការនេះក៏ចង់ឲ្យមានការបិទមជ្ឈមណ្ឌលឃុំឃាំងទាំងឡាយ ជាទីដែលការរំលោភបំពានបានកើតឡើងដែរ។ អង្គការនេះក៏ឲ្យដឹងទៀតថា ស្រ្តីរកស៊ីផ្លូវភេទ អាចមានស្ថានភាពប្រសើរជាងនេះប្រសិនបើត្រូវបានឃុំទុកនៅក្នុងទីកន្លែងដែលចាត់ចែងដោយអង្គការក្រៅរដ្ឋាភិបាល ដែលអង្គការនេះយល់ថា មានការចាត់ចែងបានប្រសើរជាងកន្លែងដែលគ្រប់គ្រងដោយក្រសួងសង្គមកិច្ច។ លោកស្រីភាសាន់ថ្លែងថា៖
«យើងយល់ថា ស្រី្តរកស៊ីផ្លូវភេទមិនគួរត្រូវបានបញ្ជូនទៅមជ្ឈមណ្ឌលឃុំឃាំង ជាទីដែលគេអាចប្រឈមនឹងគ្រោះថ្នាក់ដោយអំពើហឹង្សា និងការបំពារបំពានផ្សេងៗនោះទេ។ ហើយពិតណាស់ថា មជ្ឈមណ្ឌលទាំងនោះមិនបានដើរតួនាទីផ្តល់ការកសាងខ្លួនឡើងវិញទាល់តែសោះដល់ស្រ្តីទាំងនេះ។ មានមធ្យោបាយផ្សេងៗទៀតជាច្រើនក្នុងការផ្តល់សេវាឲ្យអ្នករកស៊ីផ្លូវភេទ និងមានអង្គការក្រៅរដ្ឋាភិបាលជាច្រើនដែលមានលទ្ធភាពក្នុងការផ្តល់ជំនួយ។ ដូច្នេះយើងសូមអំពាវនាវដល់រដ្ឋាភិបាល ឲ្យធ្វើការជាមួយនឹងអង្គការទាំងនោះដើម្បីដោះស្រាយបញ្ហានេះ»។
អង្គការ Human Rights Watch ក៏ចង់ឲ្យមានការស៊ើបអង្កេតពេញលេញមួយចំពោះការចោទប្រកាន់អំពីការរំលោភដោយមន្រ្តីនគរបាល និងមន្រ្តីរដ្ឋាភិបាលមួយចំនួនទៀត។ លោកស្រី ភាសាន់ មានប្រសាសន៍ថា ប្រទេសផ្តល់ជំនួយ ដែលបានផ្តល់ថវិកាដើម្បីប្រយុទ្ធនឹងអំពើជួញដូរមនុស្ស និងបង្ហាត់នគរបាល ក៏ត្រូវតែចូលរួមដើរតួនាទីរបស់ខ្លួនដែរ។ លោកស្រីបន្តថា៖
«ដូច្នេះ យើងសូមអំពាវនាវដល់ប្រទេសផ្តល់ជំនួយទាំងឡាយឱ្យគាំទ្រអនុសាសន៍ទាំងនេះ ហើយពិនិត្យឡើងវិញនូវជំនួយថវិការបស់ខ្លួនទៅឲ្យក្រសួងសង្គមកិច្ច និងនគរបាល រហូតដល់មានកិច្ចខិតខំប្រឹងប្រែងរបស់គេក្នុងការស៊ើបអង្កេតទៅលើការបំពារបំពានទាំងនេះ និងមានការបិទមជ្ឈមណ្ឌលឃុំឃាំង»។
រដ្ឋាភិបាលបដិសេធថា ខ្លួនមិនបានផ្តោតទៅលើករណីស្រ្តីរកស៊ីផ្លូវភេទ ដោយមិនត្រឹមត្រូវនោះទេ ហើយរដ្ឋាភិបាលឲ្យដឹងថា ខ្លួននឹងធ្វើការស៊ើបអង្កេតការចោទប្រកាន់នៃការរំលោភបំពាន ដែលត្រូវបានប្តឹងមកខ្លួន។
លោកស្រី ជូ ប៊ុនឡេង គឺជារដ្ឋលេខាធិការក្រសួងមហាផ្ទៃ ទទួលបន្ទុកកិច្ចការប្រយុទ្ធនឹងការជួញដូរមនុស្ស។ លោកស្រីមានប្រេសាសន៍ថា រដ្ឋាភិបាលចង់ដឹងការរំលោភបំពានបែបនេះ ប៉ុន្តែត្រូវការឲ្យអ្នកប្តឹងប្រាប់ឈ្មោះអ្នកដែលថាមានកំហុស ដើម្បីធានាដល់ការស៊ើបអង្កេតប្រកបដោយប្រសិទ្ធិភាពមួយ។
លោកស្រីមានប្រសាសន៍ថា នគរបាលត្រូវស្ថិតនៅក្រោមច្បាប់ ហើយនឹងត្រូវនាំទៅកាត់ទោស ប្រសិនបើការចោទប្រកាន់នៃការរំលោភបំពាននោះមានភស្តុតាងនៅចំពោះមុខតុលាការ៕
ប្រែសម្រួលដោយ អ៊ឹម សុធារិទ្ធ
