អ៊ុយក្រែនបាននិយាយកាលពីថ្ងៃអង្គារថាខ្លួនមិនមានចំណាប់អារម្មណ៍នៅក្នុងការកាន់កាប់ទឹកដីដែលខ្លួនបានដណ្តើមនៅតំបន់ Kursk របស់រុស្ស៊ីក្នុងរយៈពេលយូរទេ ក៏ប៉ុន្តែ នៅក្នុងពេលនេះ វាអាចធ្វើឱ្យមានការស្មុគ្រស្មាញដល់ការខំប្រឹងប្រែងរបស់រដ្ឋាភិបាលក្រុងមូស្គូដើម្បីបញ្ជូនកងទ័ពកាន់តែច្រើនឡើងទៅកាន់សមរភូមិមុខនៅផ្នែកខាងកើតនៃប្រទេសអ៊ុយក្រែន។
អ្នកនាំពាក្យក្រសួងការបរទេសអ៊ុយក្រែនលោក Georgiy Tykhy បានប្រាប់ពួកអ្នកយកព័ត៌មាននៅក្នុងរដ្ឋធានីកៀវថា«មិនដូចរុស្ស៊ីទេ អ៊ុយក្រែនមិនត្រូវការទ្រព្យសម្បត្តិរបស់ពលរដ្ឋផ្សេងទៀតទេ។ អ៊ុយក្រែនមិនចាប់អារម្មណ៍នៅក្នុងការកាន់កាប់ទឹកដីតំបន់ Kursk ទេ ក៏ប៉ុន្តែយើងចង់ការពារអាយុជីវិតរបស់ពលរដ្ឋយើង»។
លោក Tykhy បានការពារសកម្មភាពរបស់អ៊ុយក្រែនថាជា«ការត្រឹមត្រូវតាមច្បាប់»។
ប្រធានាធិបតីអ៊ុយក្រែនលោក Volodymyr Zelenskyy បាននិយាយថា«ការណ៍នេះត្រូវបានបញ្ជាក់ថាកិច្ចប្រតិបត្តិការនៅក្នុងតំបន់ Kursk ជួយសមរភូមិមុខ ពីព្រោះវាមិនអនុ ញ្ញាតឱ្យរុស្ស៊ីផ្ទេរអង្គភាពបន្ថែមទៅកាន់តំបន់ Donetsk ដែលមានការស្មុគស្មាញដល់ភស្តុភាយោធារបស់ខ្លួន»។
លោកប្រធានាធិបតី Zelenskyy បាននិយាយទៀតថារុស្ស៊ីបានប្រើតំបន់ Kursk ដើម្បីចាប់ផ្តើមវាយប្រហារឆ្លងកាត់ព្រំដែនជាង២ពាន់ដងលើទឹកដីអ៊ុយក្រែនចាប់តាំងពីខែមិថុនាមក។ លោកប្រធានាធិបតីបាននិយាយទៀតថាកងទ័ពអ៊ុយក្រែនបានកាន់កាប់តំបន់មួយចំនួនដែលត្រូវបានប្រើប្រាស់ដោយរុស្ស៊ីដើម្បីចាប់ផ្តើមវាយប្រហារបែបនេះក្នុងអំឡុងនៃការវាយលុករយៈពេលមួយសប្តាហ៍ដែលបានកាន់កាប់ដីទំហំ១ពាន់គីឡូម៉ែត្រការ៉េ។
កងទ័ពអ៊ុយក្រែនបានដណ្តើមកន្លែងតាំងទីលំនៅជាង២០នៅក្នុងការវាយប្រហារដ៏ធំបំផុតមួយដោយកងទ័ពបរទេសនៅលើទឹកដីរុស្ស៊ីចាប់តាំងពីសង្គ្រាមលោកលើកទី២មក។ រុស្ស៊ីបាននិយាយកាលពីថ្ងៃអង្គារថាខ្លួនបានបញ្ចៀសការវាយប្រហារថ្មីនៅក្នុងតំបន់ Kursk ក៏ប៉ុន្តែមនុស្សជាង១២ម៉ឺននាក់បានរត់គេចចេញពីតំបន់នោះ៕
ព័ត៌មានខ្លះនៃសេចក្តីរាយការណ៍នេះដកស្រង់ពីទីភ្នាក់ងារសារព័ត៌មាន AFP និង Reuters