អ៊ុយក្រែនបានថ្លែងកាលពីថ្ងៃអង្គារថា ខ្លួនវាយប្រហារលើឃ្លាំងគ្រាប់រំសេវនៅតំបន់ Bryansk ប្រទេសរុស្ស៊ីក្នុងការវាយប្រហារមួយនៅមុនរៀបភ្លឺ។ នេះជាការវាយប្រហារមួយដែលភាគីសង្គ្រាមថាជាលើកដំបូងដែលមានពាក់ព័ន្ធនឹងមីស៊ីលផ្លោងរយៈចម្ងាយឆ្ងាយផ្ដល់ដោយអាមេរិក។
ភាគីទាំងពីរប្រកែកគ្នាពីប្រសិទ្ធភាពនៃការវាយប្រហារនេះ ដែលធ្វើឡើង២ថ្ងៃបន្ទាប់ពីប្រធានាធិបតីសហរដ្ឋអាមេរិកលោក Joe Biden បានកែគោលនយោបាយអាមេរិកនិងបានយល់ព្រមឱ្យប្រើប្រាស់មីស៊ីលរយៈចម្ងាយឆ្ងាយ ខណៈការឈ្លានពានរបស់រុស្ស៊ីលើអ៊ុយក្រែនឈានដល់ថ្ងៃទី១០០០។
ក្រសួងការពារជាតិរុស្ស៊ីបានថ្លែងក្នុងសេចក្ដីថ្លែងការណ៍ថា៖ «កងកម្លាំងប្រដាប់អាវុធអ៊ុយក្រែនកាលពីយប់មិញបានវាយប្រហារលើអគារមួយនៅតំបន់Bryansk» ដោយប្រើប្រាស់ប្រព័ន្ធរ៉ុក្កែតមីស៊ីល ATACMS ផលិតដោយអាមេរិក ប៉ុន្តែកងកម្លាំងរុស្ស៊ីបានបាញ់ទម្លាក់បាន៥គ្រាប់ហើយបាញ់កម្ទេចគ្រាប់ទី៦។ រុស្ស៊ីថាកម្ទេចកំទីមីស៊ីលដែលត្រូវបានបាញ់ទម្លាក់ទាំងនោះបានបង្កឱ្យឆេះអគារយោធា ប៉ុន្តែមិនបង្កឱ្យមានការស្លាប់បាត់បង់ជីវិតឬរបួសនោះទេ។
មន្ត្រីយោធាអ៊ុយក្រែនបាននិយាយក្នុងសារមួយបង្ហោះលើបណ្ដាញសង្គមហ្វេសប៊ុកថា កងកម្លាំងរបស់ខ្លួនបាន«បង្កការឆាបឆេះបំផ្លិចបំផ្លាញ»លើ«ឃ្លាំងរំសេវរបស់រុស្ស៊ី»នៅតំបន់ Bryanskដែលស្ថិតនៅចម្ងាយប្រមាណ១០០គីឡូម៉ែត្រពីព្រំដែនអ៊ុយក្រែន។
សេចក្តីថ្លែងការណ៍បានឱ្យដឹងថា ការវាយប្រហារនេះបានបង្កឱ្យមានការផ្ទុះជាបន្ទាប់បន្សំនិងការផ្ទុះនានាចំនួន១២ នៅក្នុងតំបន់ទីដៅ» ប៉ុន្តែមិនបានបញ្ជាក់ថាមីស៊ីលចម្ងាយឆ្ងាយ ATACMS ត្រូវបានប្រើប្រាស់ឬក៏អត់នោះទេ។ ប៉ុន្តែមន្ត្រីអ៊ុយក្រែនម្នាក់ដែលថ្លែងដោយសុំមិនបញ្ចេញឈ្មោះបានបញ្ជាក់ថាពិតជាបានប្រើប្រាស់អាវុធរបស់អាមេរិកនេះមែន។
លោក Biden បានប្តូរជំហររបស់លោកបន្ទាប់ពីកូរ៉េខាងជើងបានបញ្ជូនកងទ័ព១ម៉ឺននាក់ទៅកាន់រុស្ស៊ីដើម្បីជួយរុស្ស៊ីនៅតំបន់ Kursk ដែលអ៊ុយក្រែនដណ្តើមការកាន់កាប់បានកាលពីខែសីហា។
ខណៈដែលអ៊ុយក្រែនឥឡូវមានសមត្ថភាពដើម្បីបាញ់មីស៊ីលរយៈចម្ងាយឆ្ងាយទៅកាន់រុស្ស៊ី ប្រធានាធិបតីរុស្ស៊ីលោក Vladimir Putin កាលពីថ្ងៃអង្គារបានចុះហត្ថលេខាលើគោលការណ៍នុយក្លេអ៊ែរដែលត្រូវបានកែសម្រួលឡើងវិញដែលបានបញ្ជាក់ថា ការវាយប្រហារទៅលើរុស្ស៊ីដោយប្រទេសណាមួយដែលគាំទ្រដោយប្រទេសមាននុយក្លេអ៊ែរនោះត្រូវបានចាត់ទុកថាជាការវាយប្រហាររួមមួយហើយអាចបង្កទៅជាការឆ្លើយតបដោយនុយក្លេអ៊ែរ។
នៅពេលអ្នកនាំពាក្យរដ្ឋាភិបាលរុស្ស៊ីលោក Dmitry Peskov ត្រូវបានសាកសួរថាតើគោលការណ៍ដែលត្រូវបានកែសម្រួលឡើងវិញនេះត្រូវបានចេញផ្សាយដើម្បីជាការឆ្លើយតបទៅនឹងការអនុញ្ញាតរបស់អាមេរិកឱ្យអ៊ុយក្រែនប្រើអាវុធរយៈចម្ងាយឆ្ងាយនោះឬ លោកPeskov បានថ្លែងថា គោលការណ៍នេះដាក់ចេញ «ទាន់ពេលវេលា» ហើយថាលោក Putin ចង់ធ្វើបច្ចុប្បន្នភាពលើគោលការណ៍នេះឱ្យសមស្របទៅតាម«ស្ថានការណ៍បច្ចុប្បន្ន»។ នេះបើតាមសេចក្ដីរាយការណ៍របស់សារព័ត៌មានthe Associated Press ៕
អ៊ុយក្រែនបើកការវាយប្រហារដំបូងដោយប្រើប្រាស់មីស៊ីលរយៈចម្ងាយឆ្ងាយផ្ដល់ដោយអាមេរិកទៅលើរុស្ស៊ី
ទាហានអ៊ុយក្រែនបាញ់កាំភ្លើងធំទៅកាន់រុស្ស៊ីកាលពីថ្ងៃទី១៨ វិច្ឆិកា ឆ្នាំ២០២៤។