ការហ្វឹកហ្វឺនជំនាញប្រើយន្តហោះប្រយុទ្ធ F-16 ដល់ក្រុមអ្នកបើកយន្តហោះអ៊ុយក្រែន កំពុងបានចាប់ផ្តើមនៅក្នុងប្រទេសប៉ូឡូញ បន្ទាប់ពីមានការយល់ព្រមពីសហរដ្ឋអាមេ រិកមក។ នេះបើតាមលោក Josep Borrell ប្រធានគោលនយោបាយការបរទេសរបស់សហភាពអឺរ៉ុបដែលបាននិយាយនៅថ្ងៃអង្គារនេះ ហើយដែលត្រូវបានស្រង់ផ្សាយដោយទីភ្នាក់ងារសារព័ត៌មាន AFP។
លោក Borrell បានថ្លែងនៅក្នុងកិច្ចប្រជុំថ្នាក់រដ្ឋមន្ត្រីការពារជាតិសហភាពអឺរ៉ុបដូចនេះថា«ខ្ញុំសប្បាយរីករាយដែលនៅទីបំផុតការបណ្តុះបណ្តាលដល់ក្រុមអ្នកបើកយន្តហោះប្រយុទ្ធF-16 របស់អ៊ុយក្រែនបានចាប់ផ្តើមធ្វើនៅក្នុងប្រទេសជាច្រើន។ វាត្រូវប្រើពេលវេលា ប៉ុន្តែកាន់តែឆាប់កាន់តែល្អនៅក្នុងរឿងនេះ»។
មន្ត្រីកាទូតអឺរ៉ុបម្នាក់ ដែលនិយាយក្នុងលក្ខខណ្ឌមិនបញ្ចេញឈ្មោះ បានបញ្ជាក់ប្រាប់ ទីភ្នាក់ងារព័ត៌មាន AFP ថា ការហ្វឹកហ្វឺននៅក្នុងប្រទេសប៉ូឡូញនោះ បានចាប់ផ្តើមឡើងហើយ។
ក្រសួងការពារជាតិប៉ូឡូញក្នុងរដ្ឋធានីវ៉ាសូវីបានបដិសេធមិនធ្វើអត្ថាធិប្បាយជុំវិញរឿងនេះ។
ការបណ្តុះបណ្តាលនេះត្រូវបានចាប់ផ្តើមធ្វើឡើងក្រោយប្រធានាធិបតីសហរដ្ឋអាមេ រិកកាលពីសប្តាហ៍មុនបានផ្តល់ភ្លើងខៀវដល់ក្រុមអ្នកបើកយន្តហោះអ៊ុយក្រែនឱ្យទទួលការហ្វឹកហ្វឺនក្នុងការប្រើប្រាស់យន្តហោះប្រយុទ្ធដែលផលិតក្នុងសហរដ្ឋអាមេ រិក ដែលអ៊ុយក្រែននិយាយថាខ្លួនត្រូវការវាជាចាំបាច់សម្រាប់ប្រយុទ្ធទប់ទល់នឹងការឈ្លានបានរបស់រុស្ស៊ីនោះ។
ប្រទេសប៉ូឡូញដែលជាប្រទេសក្បែរខាងអ៊ុយក្រែន និងជាអ្នកគាំទ្រអ៊ុយក្រែនដ៏ខ្លាំងបំផុតមួយនោះ ធ្លាប់បាននិយាយអស់ពេលជាច្រើនខែមកហើយថា ខ្លួនត្រៀមខ្លួនជាស្រេចដើម្បីហ្វឹកហ្វឺនដល់ក្រុមអ្នកបើកយន្តហោះអ៊ុយក្រែន លើការប្រើប្រាស់យន្តហោះចម្បាំងទាំងនេះ។
ប្រទេសនេះបានក្លាយជាមជ្ឈមណ្ឌលដ៏សំខាន់មួយ សម្រាប់ការបណ្តុះបណ្តាលកងទ័ពអ៊ុយក្រែន និងការផ្គត់ផ្គត់សព្វាវុធដល់រដ្ឋាភិបាលក្រុងកៀវផងដែរ៕
មន្ត្រីជាន់ខ្ពស់សហភាពអឺរ៉ុប៖ ការហ្វឹកហ្វឺនប្រើយន្តហោះប្រយុទ្ធ F-16 ដល់កងកម្លាំងអ៊ុយក្រែន កំពុងចាប់ផ្តើមនៅប៉ូឡូញ
យន្តហោះប្រយុទ្ធ F-16