រដ្ឋមន្ត្រីការបរទេសសហរដ្ឋអាមេរិកលោក Antony Blinken កាលពីថ្ងៃព្រហស្បតិ៍ បានប្រកាសផ្តល់មូលនិធិ ២៥ លានដុល្លារអាមេរិកដល់គម្រោងអភិវឌ្ឍវិស័យកសិកម្មរយៈពេល ៥ ឆ្នាំ នៅក្នុងប្រទេសកម្ពុជា ដើម្បីលើកកម្ពស់សន្តិសុខស្បៀងអាហារ និងកំណើនសេដ្ឋកិច្ចរបស់កម្ពុជា។ នេះបើយោងតាមការប្រកាសរបស់ទីភ្នាក់ងារសហរដ្ឋអាមេរិកដើម្បីការអភិវឌ្ឍអន្តរជាតិ ហៅកាត់ថា USAID។
គម្រោងនេះដែលមានឈ្មោះថា Harvest III ជាផ្នែកមួយនៃគម្រោងសន្តិសុខស្បៀងអាហាររយៈពេល ១២ ឆ្នាំរបស់សហរដ្ឋអាមេរិកនៅក្នុងប្រទេសកម្ពុជា ដែលដឹកនាំដោយទីភ្នាក់ងារ USAID ដោយធ្វើការសហការជាមួយកសិករខ្មែរ និងភាគីជាដៃគូក្នុងវិស័យស្បៀងអាហារ ដើម្បីពង្រីកទីផ្សារកសិកម្មកម្ពុជា។ លោក Blinken បានលើកឡើងថា គម្រោងនេះនឹងយកចិត្តទុកដាក់ផងដែរលើកសិផលកម្ពុជា ដូចជាត្រី និងគ្រាប់ធញ្ញជាតិ។
លោក Antony Blinken បានថ្លែងថានៅក្នុងកម្មវិធីពាណិជ្ជកម្មកសិកម្មមួយ នៅរាជធានីភ្នំពេញថា៖ «តម្រូវការទាំងនេះចាំបាច់។ ប្រជាជនកម្ពុជាជាច្រើននាក់នៅតែរស់នៅក្នុងស្ថានភាពគ្មានស្បៀងអាហារគ្រប់គ្រាន់។ ហើយកុមារកម្ពុជាជាច្រើននាក់កំពុងខ្វះអាហាររូបត្ថម្ភផងដែរ»។ លោកត្រូវបានដកស្រង់សម្តីដូច្នេះពីកាសែត The New York Times។
រដ្ឋមន្ត្រីការបរទេសសហរដ្ឋអាមេរិកលោក Antony Blinken លើកដៃសំពះស្វាគមន៍ ក្នុងអំឡុងពេលលោកចូលរួមក្នុងកម្មពិធីពាណិជ្ជកម្មកសិកម្ម នៅមជ្ឈមណ្ឌល AmCam Exchange ក្នុងរាជធានីភ្នំពេញ កាលពីថ្ងៃព្រហស្បតិ៍ ទី ៤ ខែសីហា ឆ្នាំ ២០២២។
លោករដ្ឋមន្ត្រី Blinken ក៏បានសង្កត់ធ្ងន់ថា គម្រោង Harvest III នេះនឹងជួយឲ្យកសិករកម្ពុជា ទទួលបានសេវាផ្តល់ផ្ទះកញ្ចក់សម្រាប់ដាំដុះដែលជួយដល់ដំណាំកសិកម្មរបស់ពួកគេ និងជួយឲ្យពួកគេចែកចាយកសិផលរបស់ពួកគេទៅកាន់ទីផ្សារកាន់តែធំនៅក្នុងប្រទេស និងក្រៅប្រទេសផងដែរ។ បន្ថែមលើនេះ គម្រោងនេះនឹងជួយដល់ស្ត្រីនិងយុវជនកម្ពុជា ឲ្យទទួលបានប្រយោជន៍ច្រើនជាងមុនពីការបណ្តាក់ទុនលើវិស័យកសិកម្មរបស់កម្ពុជា។
រដ្ឋមន្ត្រីការបរទេសអាមេរិក Antony Blinken ត្រូវបានដកស្រង់សម្តីពីកាសែត The New York Times ថា៖ «យើងត្រូវតែដឹងអំពីវិធីធ្វើកសិកម្មក្រោមអាកាសធាតុគ្រប់ប្រភេទ គ្រប់ចំណូល ដើម្បីធ្វើឲ្យបណ្តាប្រទេសជាច្រើនអាចមានសមត្ថភាពរឹងមាំដើម្បីផលិតស្បៀងអាហារដោយខ្លួនឯង។ ហើយជាមួយនឹងគម្រោងថ្មីនេះ យើងពង្រីកសកម្មភាពជំនួយរបស់យើង ហើយ Harvest III នឹងអនុវត្តទូទាំងប្រទេស»៕