ប្រធានាធិបតីសហរដ្ឋអាមេរិកលោកដូណាល់ ត្រាំ កាលពីថ្ងៃចន្ទ បានសន្យាថា នឹងដាក់ទណ្ឌកម្មយ៉ាងធ្ងន់ធ្ងរប្រឆាំងនឹងតួកគីចំពោះការទន្ទ្រានរបស់ប្រទេសនោះចូលក្នុងតំបន់ភាគខាងជើងប្រទេសស៊ីរីប្រឆាំងនឹងពួកអ្នកប្រយុទ្ធជនជាតិភាគតិច Kurds ក៏ប៉ុន្តែ ជាថ្មីម្តងទៀត បានការពារការដកទ័ពរបស់អាមេរិកដែលបានប្រយុទ្ធប្រគៀកស្មាជាមួយជនជាតិភាគតិច Kurds ប្រឆាំងនឹងពួកភេរវជនក្រុមរដ្ឋឥស្លាម។
លោកប្រធានាធិបតីត្រាំ បាននិយាយនៅលើសារតាម Twitter ថា «តើពលរដ្ឋប្រាកដគិតថា យើង ត្រូវទៅច្បាំងតួកគីដែលជាសមាជិករបស់អង្គការអូតង់ឬ?។ សង្គ្រាមដែលគ្មានទីបញ្ចប់នោះ នឹងបញ្ចប់។ មនុស្សដដែលដែលធ្វើឲ្យយើងធ្លាក់ចូលក្នុងភាពស្មុគ្រស្មាញនៅក្នុងតំបន់មជ្ឈឹមបូព៌ានោះ ជាមនុស្សភាគច្រើនដែលចង់ស្ថិតនៅទីនោះ។
លោកប្រធានាធិបតីត្រាំ បានពោលអះអាងថា ពួកអ្នកប្រយុទ្ធជនជាតិភាគតិច Kurds អាចនឹងដោះលែងពួកអ្នកទោសក្រុមរដ្ឋឥស្លាមខ្លះនៅក្នុងការខំប្រឹងប្រែងមួយដើម្បីឲ្យយើងមានការជាប់ពាក់ព័ន្ធនឹងបញ្ហានេះ»។ ក៏ប៉ុន្តែលោកប្រធានាធិបតីត្រាំ និយាយទៀតថា «ពួកអ្នកទោសក្រុមរដ្ឋឥស្លាមទាំងនោះ អាចត្រូវបានចាប់ខ្លួនវិញយ៉ាងស្រួលដោយតួកគី ឬប្រទេសផ្សេងទៀតនៅអឺរ៉ុបជាទីកន្លែងដែលពួកនោះភាគច្រើនបានមក»។
លោកប្រធានាធិបតីត្រាំ បាននិយាយកាលពីថ្ងៃអាទិត្យថា លោក កំពុងធ្វើការជាមួយពួកមេដឹកនាំសភា រួមមានពួកគណបក្សប្រជាធិបតេយ្យដែលជាគណបក្សប្រឆាំងដើម្បីដាក់ទណ្ឌកម្មសេដ្ឋកិច្ចប្រឆាំងនឹងរដ្ឋាភិបាលតួកគី។
កងទ័ពស៊ីរី បានចូលទីប្រជុំជនមួយនៅជិតព្រំដែនតួកគីកាលពីថ្ងៃចន្ទម្សិលមិញ មួយថ្ងៃបន្ទាប់ពីបានធ្វើកិច្ចព្រមព្រៀងជាមួយកងទ័ពស៊ីរី-Kurds ដើម្បីរំកិលចូលក្នុងតំបន់នោះក្នុងការប៉ុនប៉ងមួយដើម្បីទប់ទល់ការវាយប្រហារយ៉ាងខ្លាំងរបស់តួកគី៕