លោកប្រធានាធិបតីសហរដ្ឋអាមេរិក ដូណាល់ ត្រាំ បានទទួលការស្វាគមន៍ពីពួកគណបក្សសាធារណរដ្ឋ ហើយនិងការស្វាគមន៍ប្រកបដោយការគួសមពីពួកគណបក្សប្រជាធិបតេយ្យនៅពេលដែលលោកប្រធានាធិបតីគូសសង្កត់ពីអាទិភាពនៃគោលនយោបាយរបស់លោក រួមមានការសន្យាក្នុងពេលយុទ្ធនាការឃោសនាបោះឆ្នោតរបស់លោកដើម្បីការពារព្រំដែនសហរដ្ឋអាមេរិក។ លោកប្រធានាធិបតី ដូណាល់ ត្រាំ បានថ្លែងថា៖ «យើងចង់ឲ្យប្រជាពលរដ្ឋអាមេរិកាំងទាំងអស់ទទួលបានជោគជ័យ ក៏ប៉ុន្តែភាពជោគជ័យនេះមិនអាចកើតមានឡើងក្នុងបរិយាកាសនៃការច្របូកច្របល់គ្មានច្បាប់ទម្លាប់នោះទេ។ យើងត្រូវតែធ្វើឲ្យមានសុច្ចរិតភាព និងនីតិរដ្ឋឡើងវិញដល់ព្រំដែនរបស់យើង។ ដោយមូលហេតុនេះ យើងនឹងចាប់ផ្តើមស្ថាបនារបងដ៏ធំមួយនៅតាមបណ្តោយព្រំដែនភាគខាងត្បូងរបស់យើងនាពេលឆាប់ៗនេះ»។
លោកប្រធានាធិបតីត្រាំ បានមានប្រសាសន៍ទៀតថា របៀបវារៈរបស់លោក នឹងប្រាប់ឲ្យដឹងជាមុននូវអ្វីដែលលោកប្រធានាធិបតីហៅថា «ទំព័រប្រវត្តិសាស្រ្តថ្មីនៃភាពដ៏អស្ចារ្សរបស់ប្រទេសអាមេរិក» ដែលនឹងរួមមានការធ្វើកំណែទម្រង់ពន្ធដារ ធ្វើឲ្យប្រសើរឡើងនូវកិច្ចព្រមព្រៀងពាណិជ្ជកម្មសម្រាប់កម្មករអាមេរិកាំងហើយនិងលុបចោល និងជំនួសច្បាប់ថែទាំសុខភាពរបស់ប្រធានាធិបតីបារ៉ាក់ អូបាម៉ា។ លោកប្រធានាធិបតីត្រាំ បានមានប្រសាសន៍ទៀតថា៖ «ច្បាប់ថែទាំសុខភាព Obamacare កំពុងដួលរលំ ហើយយើងត្រូវតែចាត់វិធានការប្រកបដោយភាពម៉ឺងម៉ាត់ដើម្បីការពារប្រជាពលរដ្ឋអាមេរិកាំងទាំងអស់»។ លោកប្រធានាធិបតីត្រាំក៏បានសន្យាធ្វើឲ្យប្រទេសអាមេរិកមានសុវត្ថិភាពពីពួកភេរវជន ក៏ប៉ុន្តែ ក៏បានស្នើផ្តល់អ្វីដែលលោកប្រធានាធិបតី បានហៅថា ការចូលរួមដោយផ្ទាល់ ដោយខ្លាំង និងប្រកបដោយអត្ថន័យជាមួយពិភពលោកដែរ។ «អាមេរិកកំពុងមានឆន្ទៈស្វែងរកមិត្តភក្តិថ្មី ហើយធ្វើដៃគូថ្មី ដែលចែករំលែកផលប្រយោជន៍គ្នា។ យើងចង់បានភាពស្រុះស្រួលគ្នា និងស្ថិរភាពមិនមែនសង្គ្រាម និងជម្លោះទេ»។
លោកប្រធានាធិបតីត្រាំ ក៏បានគោរពវិញ្ញាណក្ខន្ធលោក Ryan Owens កងទ័ពជើងទឹកពិសេស Navy Seal ដែលត្រូវបានស្លាប់កាលពីខែមករាក្នុងអំឡុងនៃការវាយឆ្មក់ទៅលើទីតាំងរបស់ក្រុម al-Qaida នៅក្នុងប្រទេសយ៉េម៉ែន ដោយមានលោកស្រី Carryn ភរិយាមេម៉ាយរបស់លោកជាភ្ញៀវស្ថិតនៅក្នុងសាលរដ្ឋសភា។ លោកប្រធានាធិបតីត្រាំបានថ្លែងបន្តទៀតថា៖ «លោក Ryan បានស្លាប់ដូចជាលោកនៅរស់អញ្ចឹង លោកជាអ្នកធ្វើសង្គ្រាម និងជាវីរជនដែលប្រយុទ្ធប្រឆាំងភេរវកម្មហើយនិងការពារប្រទេសរបស់យើង»។
លោកប្រធានាធិបតីត្រាំបានបន្តអំពាវនាវឲ្យមានសាមគ្គីភាពបន្ទាប់ពីការបោះឆ្នោតដ៏បែកបាក់មួយ ហើយលោកប្រធានាធិបតីបានជំរុញឲ្យពលរដ្ឋអាមេរិកាំងគិតពីបញ្ហាធំៗ។ លោកប្រធានាធិបតីត្រាំថ្លែងថា៖ «ពេលវេលាគិតគូរបញ្ហាតូចតាច បានចប់ហើយ។ ពេលវេលាសម្រាប់ការប្រយុទ្ធរឿងកំប៉ិកកំប៉ុកត្រូវទុកនៅពីក្រោយយើង។យើងត្រូវការភាពក្លាហានដើម្បីចែករំលែកសុបិន្តដែលបំពេញបេះដូងរបស់យើង។ភាពក្លាហានដើម្បីសម្តែងនូវក្តីសង្ឃឹមដែលជំរុញស្មារតីរបស់យើង។ ហើយទំនុកចិត្តនេះនឹងធ្វើឲ្យក្តីសង្ឃឹម និងសុបិន្តទាំងនេះទៅជាសកម្មភាពមួយ»។
លោក Steve Beshear អតីតអភិបាលរដ្ឋ Kentucky បានធ្វើការឆ្លើយតបសម្រាប់គណបក្សប្រជាធិបតេយ្យ ហើយបានរិះគន់ប្រធានាធិបតីត្រាំចំពោះចំណាត់ការរបស់លោកដើម្បីលុបចោលច្បាប់ថែទាំសុខភាពObamacareនិងរឹតត្បិតជនអន្តោប្រវេសន៍។ លោក Steve Beshearនិយាយថា៖ «លោកប្រធានាធិបតីអាច និងត្រូវតែពង្រឹងច្បាប់អន្តោប្រវេសន៍។ ក៏ប៉ុន្តែ យើងអាចការពារប្រទេសអាមេរិកដោយគ្មានបោះ បង់ចោលនូវគោលការណ៍ និងកាតព្វកិច្ចខាងសីលធម៌របស់យើងដើម្បីជួយអ្នកដែលរត់គេចខ្លួនពីសង្គ្រាម និងភេរវកម្ម ហើយដោយគ្មានធ្វើឲ្យក្រុមគ្រួសារខ្ចាត់ព្រាត់ និងដោយគ្មានផ្តល់ភាពគ្រោះថ្នាក់ដល់កងទ័ពរបស់យើងដែលកំពុងប្រយុទ្ធនៅឯបរទេស»។
ហើយឥឡូវនេះ ការខិតខំធ្វើការងារបានចាប់ផ្តើម នៅពេលដែលលោកប្រធានាធិបតីត្រាំ និងសមាជិកសភារបស់សហរដ្ឋអាមេរិកចាប់ផ្តើមការងារដើម្បីព្យាយាមអនុវត្តរបៀបវារៈដ៏ធំនេះ៕
ប្រែសម្រួលដោយ ជឹង ប៉ូជីន