អតីតរដ្ឋមន្ត្រីការបរទេសអាមេរិក លោកស្រី Hillary Clinton កាលពីថ្ងៃអង្គារ បានខិតកាន់តែកៀកទៅរកការតែងតាំង ដែលស្ទើរតែប្រាកដប្រជាទៅហើយ ជាបេក្ខជនតំណាងគណបក្សប្រជាធិបតេយ្យ ដើម្បីប្រកួតយកតំណែងជាប្រធានាធិបតីអាមេរិក។
ដោយទទួលបានសំឡេងឆ្នោតភាគច្រើនដែលគេបានរាប់រួចហើយនៅក្នុងការបោះឆ្នោតបឋមក្នុងរដ្ឋ Kentucky នោះ លោកស្រី គ្លីនតុន បាននាំមុខជិត២.០០០សំឡេងលើសមាជិកព្រឹទ្ធសភាមកពីរដ្ឋ Vermont គឺលោកBernie Sanders។
មន្ត្រីរៀបចំការបោះឆ្នោតនិយាយថា ពួកគេមិនទាន់ប្រកាសនរណាជាអ្នកឈ្នះនៅឡើយទេ ប៉ុន្តែលោកស្រីគ្លីនតុនបានអះអាងពីជ័យជម្នះរបស់លោកស្រីរួចទៅហើយ។
លទ្ធផលចុងក្រោយ មានសារៈសំខាន់តិចតួចណាស់ ដោយសារគណបក្សប្រជាធិបតេយ្យ ផ្ដល់ចំនួនប្រតិភូតាមបែបសមាមាត្រ ពោលគីមានន័យថា បេក្ខជនទាំងពីរ នៅទីចុងបញ្ចប់ នឹងចែកចំនួនប្រតិភូគ្នាពីរដ្ឋ Kentucky ស្ទើរតែស្មើគ្នា។
នៅក្នុងការប្រកួតប្រជែងគ្នាមួយទៀតកាលពីថ្ងៃអង្គារ លោក Sanders បានឈ្នះនៅក្នុងការបោះឆ្នោតបឋមនៅរដ្ឋ Oregon ប៉ែកនិរតីសហរដ្ឋអាមេរិក។
តទៅមុនទៀត លោក Sanders ត្រូវយកឲ្យបានប្រតិភូប្រមាណ៨៥ភាគរយនៃចំនួនប្រតិភូដែលនៅសល់ ដើម្បីឲ្យលោក អាចវ៉ា លោកស្រី គ្លីនតុន និងអាចទទួលបានការតែងតាំងពីគណបក្សប្រជាធិបតេយ្យបាន។ ប៉ុន្តែ រហូតមកដល់ពេលនេះ លោកទទួលបានជ័យជម្នះបែបនេះ តែនៅក្នុងរដ្ឋមួយប៉ុណ្ណោះ គឺរដ្ឋVermont របស់លោកផ្ទាល់៕