ប្រធានាធិបតីដែលទើបតែជាប់ឆ្នោតថ្មីនៅកោះតៃវ៉ាន់ទើបតែស្បថចូលកាន់តំណែងនៅថ្ងៃសុក្រនេះ។
លោកស្រី Tsai Ing-wen គឺជាមេដឹកនាំស្រីដំបូងបង្អស់នៅកោះតៃវ៉ាន់។
នៅក្នុងសុន្ទរកថាដំបូងបង្អស់របស់លោកស្រីនៅក្នុងទីក្រុងតៃប៉ិ លោកស្រីបានស្នើឲ្យមានកិច្ចសន្ទនាវិជ្ជមានជាមួយនឹងប្រទេសចិន។
លោកស្រីបានមានប្រសាសន៍យ៉ាងដូច្នេះថា «ភាគីទាំង២ត្រូវតែទុករឿងចាស់ឲ្យនៅ មួយឡែក ហើយចូលរួមក្នុងកិច្ចសន្ទនាវិជ្ជមាន ដើម្បីផ្តល់ជាប្រយោជន៍ដល់ប្រជាជនរបស់ភាគីទាំងសងខាង»។
គណបក្សវឌ្ឍនភាពប្រជាធិបតេយ្យដែលគាំទ្រឯករាជ្យភាពរបស់លោកស្រី Tsai ទទួលបានជ័យជម្នះភ្លូកទឹកភ្លូកដីទៅលើគណបក្សជាតិនិយមនៅក្នុងការបោះឆ្នោតកាលពីដើមឆ្នាំនេះ។ គណបក្សជាតិនិយមបានចំណាយពេល៨ឆ្នាំចុងក្រោយដើម្បីបង្កើនចំណងទាក់ទងជាមួយនឹងរដ្ឋាភិបាលក្រុងប៉េកាំង។
សហរដ្ឋអាមេរិកបានឲ្យដឹងនៅថ្ងៃសុក្រនេះថា ខ្លួនកំពុងតែទន្ទឹងរង់ចាំការសហការជាមួយនឹងរដ្ឋបាលថ្មីមួយនេះ និងជាមួយនឹងគណបក្សនយោបាយទាំងអស់របស់តៃវ៉ាន់និងអង្គការសង្គមស៊ីវិលនានា ដើម្បីពង្រឹងចំណងទាក់ទងរវាងប្រជាជនអាមេរិកនិងប្រជាជនតៃវ៉ាន់»។
គណបក្សវឌ្ឍនភាពប្រជាធិបតេយ្យបានបង្ហាញសញ្ញាកាលពីពេលថ្មីៗនេះថា ខ្លួនមានបំណងនឹងរឹតបន្តឹងការឈ្លបយកការណ៍ពីចិន ដែលបានធ្វើឲ្យការទាក់ទងគ្នារវាងភាគីទាំងពីរកាន់តែងាយស្រួលនិងខ្លាំងក្លាជាងមុន។
សភាដែលត្រួតត្រាដោយគណបក្សវឌ្ឍនភាពប្រជាធិបតេយ្យបានឲ្យដឹងថា ខ្លួនមានផែនការនឹងអនុម័តលើសេចក្តីព្រាងច្បាប់មួយត្រឹមចុងឆ្នាំនេះ ដែលនឹងកាត់បន្ថយប្រាក់បៀវត្សរ៍របស់យោធាតៃវ៉ាន់ដែលបានចូលនិវត្តន៍ ដែលបានឈ្លបយកការណ៍ឲ្យប្រទេសចិន។
ចិននិងតៃវ៉ាន់បានបែងចែកគ្នាចាប់តាំងពីមានសង្គ្រាមស៊ីវិលកាលពីទសវត្សរ៍១៩៤០មកម៉្លេះ។ ចិនទាមទារអធិបតេយ្យភាពលើកោះតៃវ៉ាន់ និងទទូចឲ្យភាគីទាំងអស់បង្រួបបង្រួមគ្នានៅទីបំផុត។ ចិនក៏តម្រូវឲ្យភាគីទាំងសងខាងយល់ថាកោះតៃវ៉ាន់គឺជាផ្នែកមួយនៃប្រទេសចិន មុនពេលបើកកិច្ចប្រជុំណាមួយ។ ប៉ុន្តែលោកស្រី Tsai ចង់ឲ្យកោះតៃវ៉ាន់ពង្រឹងស្វ័យភាពរបស់ខ្លួន ជាជាងងាកទៅរកប្រទេសចិន៕