ពួកមន្ត្រីការពារជាតិតៃវ៉ាន់និយាយថាចិនបានដាក់ពង្រាយនាវានិងនាវាឆ្មាំការពារដែនសមុទ្រជិត៩០គ្រឿងនៅក្នុងផ្ទៃទឹកដែលលាតសន្ធឹងពីប្រជុំកោះនានានៅក្នុងតំបន់ភាគខាងត្បូងប្រទេសជប៉ុនដល់សមុទ្រចិនខាងត្បូង។ មន្ត្រីតៃវ៉ាន់និយាយថាការដាក់ពង្រាយនេះមានទ្រង់ទ្រាយធំបំផុតនៅផ្ទៃទឹកក្នុងតំបន់នៅក្នុងរយៈពេលជិត៣ ទសវត្សរ៍នេះ និងជាផ្នែកមួយនៃអ្វីដែលទំនងជាសមយុទ្ធយោធា។
ចិនមិនបានធ្វើអត្ថាធិប្បាយស្តីពីចលនារបស់នាវាឬបញ្ជាក់ថាខ្លួនកំពុងធ្វើសមយុទ្ធនោះទេ។
ថ្លែងនៅឯសន្និសិទកាសែតប្រចាំថ្ងៃកាលពីថ្ងៃអង្គារ ពួកមន្ត្រីការពារជាតិតៃវ៉ាន់និយាយថាកិច្ចប្រតិបត្តិការរបស់រដ្ឋាភិបាលក្រុងប៉េកាំងមិនត្រឹមតែដៅលើរដ្ឋាភិបាលក្រុងតៃប៉ិទេ ក៏ប៉ុន្តែ មានគោលបំណងបង្ហាញសមត្ថភាពរបស់ខ្លួនដើម្បីរារាំងប្រទេសផ្សេងទៀតនៅក្នុងតំបន់ រួមមានជប៉ុននិងហ្វីលីពីនកុំឱ្យការពារប្រជុំកោះទាំងនោះ។
លោកSun Li-fang អ្នកនាំពាក្យក្រសួងការពារជាតិតៃវ៉ាន់បានប្រាប់ពួកអ្នកកាសែតនៅឯសន្និសីទកាសែតថា «ទំហំនៃនាវានៅពេលបច្ចុប្បន្ននេះមានទំហំធំបំផុតបើប្រៀបធៀបទៅនឹងសមយុទ្ធចិនចំនួន៤កាលពីលើកមុន»។ ចិនបានអះអាងថាតៃវ៉ាន់ដែលគ្រប់គ្រងតាមបែបប្រជាធិបតេយ្យជាផ្នែកមួយនៃទឹកដីរបស់ខ្លួនហើយមិនបានច្រានចោលលទ្ធភាពនៃការប្រើកម្លាំងដើម្បីធ្វើឱ្យសម្រេចគោលដៅរបស់ខ្លួននៃក្នុងការបង្រួបបង្រួមជាតិ។ មានការគាំទ្រតិចតួចចំពោះការបង្រួបបង្រួមជាមួយចិនផ្តាច់ការនៅកោះតៃវ៉ាន់។
លោក Sunបាននិយាយទៀតថាសមយុទ្ធនេះមានទ្រង់ទ្រាយបំផុតចាប់តាំងពីសម យុទ្ធបានត្រូវធ្វើឡើងនៅជុំវិញកោះតៃវ៉ាន់ដើម្បីជាការឆ្លើយតបដល់ការបោះឆ្នោតប្រធានាធិបតីលើកទី១របស់ខ្លួននៅឆ្នាំ១៩៩៦មក៕