ប្រធានាធិបតីតៃវ៉ាន់អ្នកស្រី Tsai Ing Wen នៅថ្ងៃពុធនេះ បានសន្យារៀបចំគម្រោងផ្ដល់ជំនួយមនុស្សធម៌ដល់អ្នកដែលពាក់ព័ន្ធទៅនឹងការតវ៉ា ដើម្បីប្រជាធិបតេយ្យនៅក្នុងទីក្រុងហុងកុង។
សំណើច្បាប់សន្តិសុខថ្មីរបស់ចិនសម្រាប់ទីក្រុងហុងកុង បានជំរុញឲ្យមានការតវ៉ានៅក្នុងទីក្រុងហុងកុង និងការថ្កោលទោសពីបណ្ដារដ្ឋាភិបាលបស្ចិមប្រទេសនានា ទាក់ទិននឹងការយល់ឃើញថា សំណើច្បាប់នេះនឹងប៉ះពាល់ដល់សេរីភាពរបស់ទីក្រុងហុងកុង។
ក្រុមអ្នកតវ៉ានៅទីក្រុងហុងកុងទទួលបានការអាណិតអាសូរយ៉ាងទូលំទូលាយពីកោះតៃវ៉ាន់ ដែលកោះតៃវ៉ាន់នេះត្រូវបានចិនចាត់ទុកថាជាដែនដីរបស់ខ្លួន។
អ្នកស្រី Tsai Ing Wen បានប្រាប់អ្នកកាសែតនៅក្នុងទីក្រុងតៃប៉ិថា៖ «យើងនឹងស្នើផែនការសកម្មភាពមួយនៃជំនួយមនុស្សធម៌សម្រាប់មិត្តភ័ក្ដិរបស់យើងមកពីទីក្រុងហុងកុង។ យើងនឹងបន្តគាំទ្រការតាំងចិត្តរបស់ពលរដ្ឋហុងកុងនៅក្នុងការប្រឹងប្រែងដើម្បីលទ្ធិប្រជាធិបតេយ្យ និងសេរីភាព»។
អ្នកស្រីមិនបានផ្ដល់ព័ត៌មានលំអិត ឬក៏ពេលវេលាដែលត្រូវធ្វើរឿងនេះទេ ប៉ុន្តែបាននិយាយថា ក្រុមប្រឹក្សាកិច្ចការចិនដីគោក ដែលជាកន្លែងធ្វើគោលនយោបាយរបស់តៃវ៉ាន់អំពីប្រទេសចិន នឹងដឹកនាំគម្រោងផ្ដួចផ្ដើមនេះ ចំណែកឯក្រុមការងារពិសេសមួយរបស់រដ្ឋាភិបាលតៃវ៉ាន់នឹងរៀបចំចាត់ចែងនូវថវិកា និងធនធានចាំបាច់នានា ដែលក្នុងនោះមានទាំងការស្នាក់នៅ និងការងារផងដែរ៕