ចៅក្រមតុលាការកំពូល នៅថ្ងៃសុក្រនេះ បានប្រកាសសម្រេចឱ្យសាលាដំបូងរាជធានីភ្នំពេញប្រគល់លិខិតឆ្លងដែនឲ្យលោក យាង សុធារិន្ទ អតីតអ្នកសារព័ត៌មានរបស់វិទ្យុអាស៊ីសេរី។
លោក គង់ ស្រ៊ីម ប្រធានក្រុមប្រឹក្សាជំនុំជម្រះនៃតុលាការកំពូល នៅព្រឹកថ្ងៃសុក្រនេះ បានប្រកាសមោឃៈសេចក្តីសម្រេចរបស់សាលាឧទ្ធរណ៍ ដែលមិនព្រមផ្តល់លិខិតឆ្លងដែនដល់លោក យាង សុធារិន្ទ ហើយសម្រេចប្រគល់លិខិតឆ្លងដែនដល់លោក សុធារិន្ទវិញ។ លោកចៅក្រមបន្តថា នៅពេលតុលាការកោះហៅ លោក យាង សុធារិន្ទ ត្រូវចូលខ្លួនបំភ្លឺ។ បើមិនចូលបំភ្លឺទេ នោះតុលាការនឹងចេញដីកាចាប់ខ្លួន។
លោក យាង សុធារិន្ទ ប្រាប់វីអូអេថា តុលាការបានប្រគល់លិខិតឆ្លងដែនឱ្យលោកវិញហើយ នៅរសៀលថ្ងៃសុក្រនេះ។
នៅក្នុងសវនាការតុលាការកំពូល កាលពីថ្ងៃពុធ លោក យាង សុធារិន្ទ បានស្នើសុំចៅក្រមសម្រេចផ្តល់លិខិតឆ្លងដែនដល់រូបលោក ដើម្បីលោកអាចទៅទឹកដីកំណើតនៅកម្ពុជាក្រោម និងសួរសុខទុក្ខឪពុកម្តាយបង្កើត ជាពិសេសបានទៅមើលបងស្រីបង្កើតដែលកំពុងឈឺធ្ងន់។
លោក យាង សុធារិន្ទ ឬហៅ យាង សុជាមេត្តា អាយុ ៣៤ ឆ្នាំ ដែលមានដើមកំណើតនៅភូមិកិង ឃុំឬស្សីស្រុក ស្រុកកំពង់ស្ពាន ខេត្តព្រះត្រពាំង កម្ពុជាក្រោម និងជាអ្នកសារព័ត៌មានមួយរូប ត្រូវបានតុលាការដំបូងរាជធានីភ្នំពេញ ចោទប្រកាន់ពីបទ «ប្រគល់ឱ្យរដ្ឋបរទេសនូវព័ត៌មានជាអាទិ៍ដែលអាចអន្តរាយការពារជាតិ» កាលអំឡុងឆ្នាំ ២០១៧។
លោក យាង សុធារិន្ទ ប្រាប់អ្នកសារព័ត៌មាននៅក្រៅរបងតុលាការ នាថ្ងៃសុក្រនេះថាលោកបានសន្យាជាមួយតុលាការថា លោកនឹងមកតុលាការ តាមការកោះហៅនានា។
លោកបញ្ជាក់ថា លោកនឹងបន្តទាមទារឱ្យតុលាការទម្លាក់ចោលការចោទប្រកាន់លើរូបលោក ដើម្បីលោកអាចមានសេរីភាពពេញលេញឡើងវិញ។
លោកថ្លែងថា៖ «យើងបានទាមទារឱ្យពន្លឿននីតិវិធីហ្នឹងច្រើនដងហើយ [ក្នុងការសម្រេចរបស់តុលាការឱ្យស៊ើបអង្កេត] ប៉ុន្តែអត់មានឃើញការជឿនលឿនអីទៅមុខសោះ ហើយអ៊ីចឹង បើសិនមិនមានការជឿនលឿនទៅមុខ មិនមានភស្តុតាងអីដែលបញ្ជាក់ថាពួកខ្ញុំបានប្រព្រឹត្តបទល្មើសទេ ត្រូវតែទម្លាក់ចោលបទចោទប្រកាន់មកលើពួកខ្ញុំ»។
គួរបញ្ជាក់ថា អតីតអ្នកកាសែតពីររូបរបស់វិទ្យុអាស៊ីសេរី គឺលោក យាង សុធារិន្ទ និងលោក អ៊ួន ឈិន ត្រូវបានចាប់ និងឃុំខ្លួន កាលពីថ្ងៃទី ១៤ ខែវិច្ឆិកា ឆ្នាំ ២០១៧ ដោយតុលាការចោទប្រកាន់ថា ពួកគេទាំងពីរបានផ្តល់ព័ត៌មានឱ្យរដ្ឋបរទេសដែលអាចបង្កឱ្យប៉ះពាល់ដល់សន្តិសុខជាតិ។ ក្នុងការចោទនោះ តុលាការអះអាងថា ពួកគេទាំងពីរបន្តរាយការណ៍ព័ត៌មានឱ្យវិទ្យុអាស៊ីសេរី បន្ទាប់ពីវិទ្យុនេះបានបិទការិយាល័យរបស់ខ្លួននៅកម្ពុជា៕