ការព្យាយាមរំលាយគណបក្សជំទាស់បានដំណើរការបន្តទៅមុខ បើទោះជាមានការទទូចស្នើសុំពីក្រុមសហគមន៍អន្តរជាតិ និងអ្នកស្រឡាញ់លទ្ធិប្រជាធិបតេយ្យមិនឲ្យរំលាយយ៉ាងណាក៏ដោយ។ នៅព្រឹកថ្ងៃអង្គារនេះ តុលាការកំពូលនៃប្រទេសកម្ពុជាបានទុកពេល២០ថ្ងៃ ឱ្យគណបក្សសង្គ្រោះជាតិត្រៀមឆ្លើយតទល់នឹងបណ្តឹងរំលាយគណបក្សនេះ។
គណបក្សសង្គ្រោះជាតិត្រៀមមេធាវីចំនួន៧រូបដើម្បីតតាំងក្តីនៅតុលាការកំពូលទាក់ទងនឹងបណ្តឹងរបស់ក្រសួងមហាផ្ទៃប្តឹងសុំរំលាយគណបក្សសង្គ្រោះជាតិ ខណៈដែលតុលាការកំពូលចេញដីកាបង្គាប់ឲ្យប្រធានគណបក្សសង្គ្រោះជាតិដាក់ឯកសារ ក្នុងរយៈពេល២០ថ្ងៃ ត្រៀមឆ្លើយតបទៅនឹងបណ្តឹងនោះ។ នេះបើតាមការលើកឡើងរបស់ប្រធានក្រុមតំណាងរាស្រ្តគណបក្សសង្គ្រោះជាតិ។
លោក សុន ឆ័យ ប្រធានក្រុមតំណាងរាស្រ្តគណបក្សប្រឆាំង បានប្រាប់អ្នកសារព័ត៌មាននៅទីស្នាក់ការកណ្តាលគណបក្សសង្គ្រោះជាតិ នៅថ្ងៃអង្គារនេះថា គណបក្សសង្គ្រោះជាតិបានត្រៀមរួចជាស្រេចនូវមេធាវីចំនួន៧រូប ដើម្បីពិភាក្សាក្នុងការទៅតតាំងក្តីនៅតុលាការកំពូលនាពេលខាងមុខ។ លោកបន្ថែមថា គណបក្សនឹងពិភាក្សាបន្ថែមជាមួយមេធាវីដើម្បីទទួលបានយោបល់ផ្លូវច្បាប់ មុននឹងធ្វើការសម្រេចចិត្តណាមួយ។
លោក សុន ឆ័យ បញ្ជាក់ថា៖
«ការងារនេះត្រូវតែពិគ្រោះជាមួយក្រុមមេធាវី តើនីតិវិធីហ្នឹងត្រូវធ្វើបែបម៉េច ព្រោះយើងដឹងហើយបណ្តឹងទៅតុលាការកំពូលហ្នឹង វាជានីតិវិធីមិនធម្មតាទេ មិនមែនជារឿងករណីធម្មតាដែលត្រូវចេញពីសាលាដំបូងទៅតុលាការឧទ្ធរណ៍អីទេ។ អានេះចេញតាមរយៈការប្រើប្រាស់ច្បាប់គណបក្សនយោបាយ»។
នៅព្រឹកនេះដែរ មន្រ្តីនៃតុលាការកំពូលបានយកដីកាបញ្ជាឲ្យដាក់ឯកសារត្រៀម ហើយដីកានេះត្រូវគេយកទៅបិទនៅខាងមុខស្នាក់ការគណបក្សសង្គ្រោះជាតិ។ ដីកាបង្គាប់ចេញដោយលោកស្រី សែម សក្តិកូឡា ចៅក្រមទទួលបញ្ជារបស់ក្រុមប្រឹក្សាជំនុំជម្រះនៃតុលាការកំពូលនោះ បានបញ្ជាឲ្យប្រធានគណបក្សសង្គ្រោះជាតិដាក់ឯកសារត្រៀម ក្នុងអំឡុងពេល២០ថ្ងៃ ដើម្បីឆ្លើយតបទៅនឹងពាក្យបណ្ដឹងរបស់ក្រសួងមហាផ្ទៃដែលបានស្នើសុំរំលាយគណបក្សសង្គ្រោះជាតិ។
លោក សុន ឆ័យ ប្រធានក្រុមតំណាងរាស្រ្តគណបក្សសង្គ្រោះជាតិ ថ្លែងប្រាប់អ្នកសារព័ត៌មាននៅស្នាក់ការកណ្តាលគណបក្សសង្គ្រោះជាតិ នាថ្ងៃទី១០ ខែតុលា ឆ្នាំ២០១៧។ (កាន់ វិច្ឆិកា/VOA)
ដីកាបង្គាប់របស់ចៅក្រមតុលាការកំពូលដែលបញ្ជាឲ្យដាក់ឯកសារត្រៀមនោះ បានបញ្ជាក់ក្នុងន័យដើមថា៖
«បង្គាប់មកប្រធានគណបក្សសង្គ្រោះជាតិ មានទីស្នាក់ការនៅអាស័យដ្ឋានផ្ទះលេខ៥៧៦ ផ្លូវជាតិលេខ២ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ឲ្យដាក់ឯកសារត្រៀមឆ្លើយតបទៅនឹងពាក្យបណ្ដឹងសុំរំលាយគណបក្សសង្គ្រោះជាតិ ចុះថ្ងៃទី៦ ខែតុលា ឆ្នាំ២០១៧ របស់ក្រសួងមហាផ្ទៃ ដែលភ្ជាប់ជាមួយនេះ ជូនតុលាការកំពូលក្នុងអំឡុងពេល ២០ថ្ងៃ គិតចាប់ពីថ្ងៃបានទទួលការបញ្ជូនដីកាបង្គាប់នេះ (ថ្ងៃទី៩ ខែតុលា ឆ្នាំ២០១៧)»។
កាលពីថ្ងៃសុក្រសប្តាហ៍មុន ក្រសួងមហាផ្ទៃបានដាក់ពាក្យបណ្ដឹងទៅតុលាការកំពូល ស្នើឲ្យរំលាយគណបក្សសង្គ្រោះជាតិ ដោយចោទថា គណបក្សនេះឃុបឃិតជាមួយបរទេសដើម្បីផ្ដួលរំលំរដ្ឋាភិបាលរបស់លោក ហ៊ុន សែន។ អ្នកឃ្លាំមើលស្ថានការណ៍នយោបាយ សិទ្ធិមនុស្សលើកឡើងថា ការរំលាយគណបក្សប្រឆាំងនឹងធ្វើឲ្យប៉ះពាល់ធ្ងន់ធ្ងរដល់លទ្ធិប្រជាធិបតេយ្យ ហើយវាបង្ហាញថា កម្ពុជាកំពុងក្លាយទៅជាប្រទេសដែលដឹកនាំដោយជនផ្ដាច់ការយ៉ាងពិតប្រាកដ។
កាលពីថ្ងៃចន្ទកន្លងទៅ សហគមន៍អឺរ៉ុបដែលជាទីផ្សារដ៏សំខាន់មួយសម្រាប់ផលិតផលកម្ពុជា បានស្នើសុំឱ្យរដ្ឋាភិបាលកម្ពុជាពិចារណាឡើងវិញនូវចំណាត់ការរបស់ខ្លួនក្នុងការព្យាយាមរំលាយគណបក្សសង្គ្រោះជាតិ ដោយចាត់ទុកថា រឿងនេះនឹងអាចប៉ះពាល់ដល់ការបោះឆ្នោតជាតិខាងមុខ។
លោកនាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ បដិសេធមិនធ្វើអត្ថាធិប្បាយពាក់ព័ន្ធនឹងបណ្តឹងប្តឹងសុំរំលាយគណបក្សសង្គ្រោះជាតិទេ។
លោក សុន ឆ័យ ប្រធានក្រុមតំណាងរាស្រ្តគណបក្សប្រឆាំង បានប្រាប់ក្រុមអ្នកសារព័ត៌មាននាថ្ងៃអង្គារនេះថា ការរំលាយគណបក្សជំទាស់ដ៏ធំនៅកម្ពុជានេះអាចនឹងធ្វើឱ្យប្រេះឆានយោបាយផ្ទៃក្នុង និងធ្វើឱ្យដំណើរការប្រជាធិបតេយ្យនៅកម្ពុជាដាំក្បាលចុះ។
លោកមានប្រសាសន៍ថា៖
«ការងារនេះមិនចំណេញដល់នរណាទេ។ ដូច្នេះបានជាគណបក្សសង្គ្រោះជាតិបានគិតគូរណាស់ថា តើមានច្រកណាទេ ដែលយើងអាចជជែកជាមួយគណបក្សប្រជាជនកម្ពុជាដើម្បីឲ្យមានការយល់គ្នា ហើយយើងបន្តដំណើរទៅ។ រឿងឈ្នះ រឿងចាញ់មិនសំខាន់ទេ។ រឿងសំខាន់គឺថា យើងមិនឈ្លោះទាស់ទែងរហូតដល់បាត់បង់ផលប្រយោជន៍ជាតិ រហូតដល់មានការបែកបាក់ជាតិ។ ខ្ញុំនិយាយពីរឿងបែកបាក់ជាតិ មិនមែនជាការបែកបាក់ថ្នាក់ដឹកនាំទេ។ រឿងសំខាន់ ពលរដ្ឋយើងកុំឲ្យបែកជាក្រុមនេះ ក្រុមនោះ បង្កើតជាការឈឺចាប់ផ្លូវចិត្ត ផ្លូវកាយ ងាយស្រួលឲ្យមានការអុជអាល បង្កើតឲ្យមានចលាចលក្នុងសង្គម»។
ការព្យាយាមរំលាយគណបក្សជំទាស់ដ៏ធំនៅកម្ពុជាធ្វើឡើងក្រោយពេលដែលរដ្ឋាភិបាលរបស់លោក ហ៊ុន សែន បើកយុទ្ធនាការបង្ក្រាបទ្រង់ទ្រាយធំប្រឆាំងអ្នកនិយាយរិះគន់រដ្ឋាភិបាល អង្គការសង្គមស៊ីវិល និងគណបក្សប្រឆំាង។ ក្រោយការចាប់ខ្លួនលោក កឹម សុខា មេដឹកនាំគណបក្សប្រឆាំង ដែលមានអភ័យឯកសិទ្ធសភានោះ យ៉ាងហោចណាស់ជាងពាក់កណ្តាលនៃតំណាងរាស្ត្រគណបក្សជំទាស់នេះបាន ភៀសខ្លួនចេញពីប្រទេសកម្ពុជា៕