មួយសប្តាហ៍ចុងក្រោយនេះ ផ្ទះរបស់ប្រជាពលរដ្ឋជាង១.២០០ខ្នង រងការខូតខាត ដោយសារតែភ្លៀង លាយឡំដោយខ្យល់កន្ត្រាក់ ដែលជាបាតុភូតនៃការប្រែប្រួលអាកាសធាតុ។ នេះបើយោងតាមការបង្ហោះសារនៅលើទំព័រហ្វេសប៊ុករបស់ក្រសួងធនធានទឹក និងឧតុនិយម គិតចាប់ពីថ្ងៃទី១០ដល់ថ្ងៃទី១៦ ខែមេសា ឆ្នាំ២០២៣។
បើតាមក្រសួងធនធានទឹក ខេត្តដែលរងការខូតខាតនិងប៉ះពាល់ផ្ទះសម្បែង មានដូចជាខេត្តឧត្តរមានជ័យ ស្ទឹងត្រែង ស្វាយរៀង ត្បូងឃ្មុំ ព្រះសីហនុ ព្រះវិហារ ពោធិ៍សាត់ កោះកុង និងខេត្តព្រៃវែង។
ក្រសួងបញ្ជាក់ថា កាលពីថ្ងៃទី១២ ខែមេសា ភ្លៀង និងខ្យល់បានធ្វើឱ្យផ្ទះរហូតដល់២៣៨ខ្នងនៅក្នុងខេត្តឧត្តរមានជ័យរងការខូតខាត។
ក្រសួងធនធានទឹកបន្ថែមថា៖ «នៅថ្ងែទី១៥ ខែមេសា ឆ្នាំ២០២៣ ខេត្តតាកែវមានភ្លៀងធ្លាក់លាយឡំ និងខ្យល់បោកបក់ខ្លាំង រន្ទះបានធ្វើឱ្យខូចខាតផ្ទះ។ ផ្ទះរលំទាំងស្រុង៥៨ខ្នង របើកដំបូល ៥២៨ខ្នង ស្លាប់គោ៤ក្បាល និងរបួសមនុស្សចំនួន៤នាក់»។
វីអូអេមិនទាន់អាចសុំការអត្ថាធិប្បាយពីលោក គន់ គីម អនុប្រធានទីមួយនៃគណៈកម្មាធិការជាតិគ្រប់គ្រងគ្រោះមហន្តរាយ និងលោក សុទ្ធ គឹមកុលមុន្នី អ្នកនាំពាក្យគណៈកម្មាធិការនេះ ដើម្បីសុំរបាយការណ៍សរុបនៃគ្រោះថ្នាក់ខ្យល់កន្រ្តាក់នេះបាននៅឡើយទេ។
ប្រធានមន្ទីរធនធានទឹកខេត្តឧត្តរមានជ័យ លោក ញឺន កួន ប្រាប់វីអូអេថា កាលពីថ្ងៃទី១២ ខែមេសានេះ ភ្លៀងនិងខ្យល់បានធ្វើឱ្យខូតខាតផ្ទះប្រជាពលរដ្ឋជាង ២០០ ខ្នង ប៉ុន្តែមិនប៉ះពាល់អាយុជីវិតរបស់ប្រជាពលរដ្ឋ និងសត្វចិញ្ចឹមឡើយ។
បើតាមប្រធានមន្ទីររូបនេះ ជាទូទៅ នៅអំឡុងខែនេះ វាតែងតែមានភ្លៀង និងខ្យល់ ប៉ុន្តែវានឹងបាត់ទៅវិញនៅក្នុងប៉ុន្មានខែទៅមុខទៀត។
លោកថ្លែងថា៖ «ជាធម្មតានៅពេលភ្លៀងធ្លាក់ដើមឆ្នាំនេះ តែងតែជួបជារៀងរាល់ឆ្នាំ ប៉ុន្តែចាប់ខែ៥ ខែ៦ទៅ វាធូរហើយ។ អ៊ីចឹងប៉ះពាល់តែក្នុងខែ៤ ឬដើមខែ៥។ ដើមឆ្នាំ វាតែងតែអ៊ីចឹង។ វាមិនជាបញ្ហាអីធ្ងន់ធ្ងរប៉ុន្មានទេ។ ភ្លៀងធ្លាក់ដើមឆ្នាំតែងតែមានខ្យល់ មានអីអ៊ីចឹង»។
បើតាមប្រធានមន្ទីរធនធានទឹក និងឧតុនិយម នៅពេលដែលមានបញ្ហាបែបនេះកើតឡើង អាជ្ញាធរតែងតែចុះជួយដល់ប្រជាពលរដ្ឋ ខណៈថា អាជ្ញាធរក៏តែងតែផ្សព្វផ្សាយឱ្យប្រជាពលរដ្ឋមានការប្រុងប្រយ័ត្នផងដែរ។
វីអូអេមិនទាន់អាចសុំការអត្ថាធិប្បាយពីលោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយមបាននៅឡើយទេ។
លោក ហេង គឹមហុង ប្រធានកម្មវិធីផ្នែកស្រាវជ្រាវ និងតស៊ូមតិនៃសមាគមបណ្តាញយុវជនកម្ពុជា (CYN) ប្រាប់វីអូអេថា ការកើនឡើងកម្ដៅ រួមទាំងរដូវមិនទៀង ជាសញ្ញានៃការប្រែប្រួលអាកាសធាតុ។ លោកជំរុញឱ្យមានការយកចិត្តទុកដាក់បន្ថែមពីសំណាក់ភាគីពាក់ព័ន្ធទាំងអស់ ជាពិសេសត្រូវថែរក្សា ការពារធនធានធម្មជាតិ និងកាត់បន្ថយការបំភាយឧស្ម័នពុល។
លោកបញ្ជាក់ថា៖ «ខ្ញុំយល់ថា បើសិនជាមិនគិតគូរអំពីបញ្ហានេះទេ ដំណើរនៃការវិវឌ្ឍនៃបម្រែបម្រួលអាកាសធាតុនៅពេលខាងមុខនេះនឹងបន្តជះផលអវិជ្ជមានខ្លាំងទៅដល់មនុស្ស ដែលអាចធ្វើឱ្យមនុស្សមានគ្រោះថ្នាក់ខ្លាំង ឬក៏បាត់បង់ជីវិតកាន់តែកើនឡើង ដោយសារតែគ្រោះនៃបម្រែបម្រួលអាកាសធាតុ និងកត្តាអវិជ្ជមាននានាដែលកើតឡើងពីការបំផ្លិចបំផ្លាញធនធានធម្មជាតិ និងធ្វើឱ្យលំនឹងនៃធនធានធម្មជាតិមានការប្រែប្រួលហ្នឹង»។
បើតាមលេខាធិការដ្ឋានគ្រោះមហន្តរាយខេត្តសៀមរាប កាលពីថ្ងៃទី២៩ ខែមីនា ឆ្នាំ២០២៣ ភ្លៀងនិងខ្យល់កន្ត្រាក់នៅខេត្តសៀមរាប បណ្ដាលឱ្យមនុស្សម្នាក់ស្លាប់ និងម្នាក់ទៀតរងរបួស ព្រមទាំងរលំបាក់ផ្ទាំងប៉ាណូផ្សាយពាណិជ្ជកម្មផងដែរ៕