កម្ពុជារកឃើញត្រីបបែលយក្សមួយប្រភេទ ទម្ងន់ប្រមាណ៣០០គីឡូក្រាម ក្នុងដែនទឹកទន្លេមេគង្គនៃខេត្តស្ទឹងត្រែង ហើយត្រីបបែលយក្សនេះបានបំបែកកំណត់ត្រាពិភពលោកសម្រាប់ត្រីទឹកសាបធំបំផុត។
ត្រីបបែលយក្សទឹកសាបនេះត្រូវចាប់បានដោយអ្នកនេសាទ ក្នុងភូមិកោះព្រះ ឃុំកោះព្រះ ស្រុកសៀមបូក ខេត្តស្ទឹងត្រែង កាលពីថ្ងៃទី១៣ ខែមិថុនា ហើយអ្នកនេសាទបានរាយការណ៍ជូនអង្គការគម្រោងអច្ឆរិយភាពទន្លេមេគង្គ និងមន្រ្តីពាក់ព័ន្ធ។
អ្នកគ្រប់គ្រង និងសម្របសម្រួលគម្រោងអច្ឆរិយភាពនៃទន្លេមេគង្គ អ្នកស្រី ជា សីលា បានឱ្យដឹងថា ត្រីបបែលយក្សនេះមានទម្ងន់ប្រមាណ៣០០គីឡូក្រាម ទទឹង២ម៉ែត្រ និងប្រវែងពីក្បាលដល់ចុងកន្ទុយជិត៤ម៉ែត្រ។ អ្នកស្រីបន្តថា អ្នកវិទ្យាសាស្រ្តនិងអ្នកសិក្សាស្រាវជ្រាវចាត់ទុកថា ត្រីបបែលយក្សនេះ ជាប្រភេទត្រីទឹកសាបធំបំផុតដែលត្រូវចាប់បានក្នុងកំណត់ត្រាពិភពលោកគិតចាប់តាំងពីឆ្នាំ២០០៥។
នៅក្នុងវីដេអូស្តីពីការប្រលែងត្រីបបែលយក្សនេះចូលក្នុងទន្លេវិញ ដែលត្រូវបង្ហោះលើទំព័រហ្វេសប៊ុករបស់គម្រោងអច្ឆរិយភាពនៃទន្លេមេគង្គ កាលពីថ្ងៃចន្ទ លោក Zeb Hogan ដែលបានចូលរួម បាននិយាយក្នុងន័យដើមជាភាសាអង់គ្លេស និងត្រូវបានប្រែសម្រួលថា៖ «ខ្ញុំមិនធ្លាប់ដែលឃើញអ្វីដូចនេះនោះទេ។ នេះជាត្រីធំបំផុតមួយដែលខ្ញុំបានឃើញក្នុងរយៈពេលជាយូរមកនេះ។ វាពិតជាសត្វដ៏អស្ចារ្យមួយ។ ខ្ញុំគិតថា វាបង្ហាញពីភាពគួរឱ្យភ្ញាក់ផ្អើលដែលត្រូវបានប្រទះឃើញនៅក្នុងគម្រោងផ្សេងៗស្តីពីទន្លេមេគង្គ»។
លោក Zeb Hogan ជាជីវវិទូនៅសកលវិទ្យាល័យ Nevada ទីក្រុង Reno សហរដ្ឋអាមេរិកដែលសិក្សាអំពីត្រី និងជាផលិតករកម្មវិធីទូរទស្សន៍ «Monster Fish» ផ្សាយក្នុងកម្មវិធីឯកសារសត្វ NatGeo Wild។
ក្រុមការងារគម្រោងអច្ឆរិយភាពនៃទន្លេមេគង្គ បានបំពាក់ឧបករណ៍តាមដានលើត្រីបបែលយក្សទន្លេមេគង្គញីនេះ ដែលបានបំបែកកំណត់ត្រាធំជាងគេនៅថ្ងៃទី១៤ ខែមិថុនា និងថា នៅពេលត្រីបបែលយក្សនេះធ្វើដំណើរឆ្លងកាត់បណ្តាញទទួលសូរស័ព្ទសំឡេង ដែលមានឧបករណ៍ទទួលសញ្ញាសរុបចំនួន៣៦ ដែលក្រុមការងារអាចប្រមូលទិន្នន័យស្តីពីការធ្វើចរាចរផ្លាស់ទី និងអាកប្បកិរិយារបស់វាជាលើកដំបូង។ នេះបើយោងតាមសារបង្ហោះលើទំព័រហ្វេសប៊ុករបស់គម្រោងអច្ឆរិយភាពនៃទន្លេមេគង្គកាលពីថ្ងៃចន្ទ។
ក្រោយពីការរកឃើញត្រីបបែលយក្សខាងលើនេះ អ្នកគ្រប់គ្រង និងសម្របសម្រួលគម្រោងអច្ឆរិយភាពនៃទន្លេមេគង្គ អ្នកស្រី ជា សីលា បាននិយាយថា គម្រោងអច្ឆរិយភាពនៃទន្លេមេគង្គរំពឹងថា តាមរយៈការសហការជាមួយអ្នកនេសាទ ការណ៍នេះនឹងជួយជ្រោមជ្រែងក្នុងការតាមដាននិងអភិរក្សប្រភេទត្រីទឹកសាបធំៗនៅកម្ពុជានាពេលអនាគត។
អ្នកស្រីថ្លែងថា៖ «យើងនឹងពង្រឹងទំនាក់ទំនងជាមួយអ្នកនេសាទ។ ពួកយើងបានកសាងទំនាក់ទំនងហ្នឹងហើយ ពួកយើងនឹងពង្រឹងទំនាក់ទំនងជាមួយនឹងអ្នកនេសាទទូទាំងប្រទេសកម្ពុជា។ បើសិនជាគាត់ចាប់បានប្រភេទត្រីធំៗ ឬក៏បបែលយក្សហ្នឹងតទៅទៀត គាត់ធ្វើការរាយការណ៍មកក្រុមការងារគម្រោងអច្ឆរិយភាពនៃទន្លេមេគង្គ រដ្ឋបាលជលផល ហើយយើងនឹងធ្វើការបំពាក់ស្លាក និងដោះលែងចូលក្នុងទន្លេមេគង្គវិញ»។
កន្លងមកនេះ គម្រោងអច្ឆរិយភាពនៃទន្លេមេគង្គ បានសហការជាមួយរដ្ឋបាលជលផលកម្ពុជា ដោយបង្កើតជាបណ្តាញអ្នកនេសាទ ដែលយល់ព្រមរាយការណ៍អំពីការចាប់បានប្រភេទត្រីធំៗ និងជិតផុតពូជ។
ប្រធាននាយកដ្ឋានអភិរក្សជលផលនៃក្រសួងកសិកម្មលោក អ៊ុក វិបុល បានសាទរ និងបង្ហាញអំណរគុណចំពោះអ្នកនេសាទដែលបានរាយការណ៍ជូនអាជ្ញាធរពាក់ព័ន្ធនៅពេលចាប់បានត្រីបបែលយក្សទឹកសាបនេះ ដើម្បីអាចឱ្យមានការប្រលែងត្រឡប់ចូលទន្លេវិញ។
លោកបន្តថាជាផ្នែកក្នុងការកិច្ចអភិរក្សប្រភេទត្រីទឹកសាប និងធនធានជលផលនានាដែលកំពុងរងការគំរាមកំហែង រដ្ឋាភិបាលបានដាក់ចេញជាវិធានការការពារក្នុងទម្រង់ជាអនុក្រឹត្យផ្សេងៗកាលពីពេលកន្លងមកផងដែរ។
លោកថ្លែងថា៖ «អ៊ីចឹងយោងទៅលើការអនុវត្តជាក់ស្តែង យោងទៅលើការគាំទ្រពីបទដ្ឋានច្បាប់ផង យើងប្រឹងប្រែងស្តារប្រភេទ មិនទាំងអស់ទេ ប៉ុន្តែបានច្រើន មួយចំនួនកំពុងតែឱ្យកើតឡើងវិញ»។
បើតាមគម្រោងអច្ឆរិយភាពនៃទន្លេមេគង្គ ត្រីបបែលយក្សខាងលើនេះគឺជាត្រីបបែលយក្សធំជាងគេបង្អស់ដែលត្រូវបានរកឃើញ បន្ទាប់ពីមានការរកឃើញត្រីបបែលទឹកសាបមួយផ្សេងទៀតកាលពីពេលមុននេះ ដែលមានទម្ងន់១៨០គីឡូក្រាម ទទឹង១,៨៥ម៉ែត្រ និងប្រវែងពីក្បាលដល់កន្ទុយ៣,៩៣ម៉ែត្រ ដែលត្រូវអ្នកនេសាទចាប់បានដោយចៃដន្យនៅទន្លេមេគង្គ ក្នុងភូមិកោះព្រះ ឃុំកោះព្រះ ស្រុកសៀមបូក ខេត្តស្ទឹងត្រែងដូចគ្នា៕