ជនបរទេសចំនួន ៦ នាក់ត្រូវបានចាប់ខ្លួនពីការសង្ស័យកាប់ឈើខុសច្បាប់នៅរដ្ឋ Eastern Equatoria ក្នុងប្រទេសស៊ូដង់ខាងត្បូង និងត្រូវបានគេរំពឹងថា នឹងឡើងសវនាការនៅសប្តាហ៍នេះដើម្បីប្រឈមមុខនឹងការចោទប្រកាន់នេះ។
ការកាប់ឈើខុសច្បាប់គឺជាបញ្ហារ៉ាំរ៉ៃមួយ នៅក្នុងតំបន់ដែលសម្បូរព្រៃក្រាស់ក្បែរព្រំដែនប្រទេសស៊ូដង់ខាងត្បូងជាមួយនឹងប្រទេសអ៊ូហ្គាន់ដា។ នៅទីនោះ មិនមានផ្លូវ ឬមន្ត្រីសន្តិសុខអនុវត្តច្បាប់នោះទេ។ នេះបើយោងតាមស្នងការស្រុក Magwi លោក David Otto។
លោកOtto បាននិយាយថា មន្ត្រីនៃតំបន់ Magwi កាលពីសប្តាហ៍មុនទទួលបានការបង្ហើបព័ត៌មានពីកសិករដែលកំពុងរៀបចំដី ឬប្រមូលយកអុស នៅពេលពួកគេឮសំឡេងម៉ាស៊ីនធំៗកំពុងកាត់ឈើ។
លោកបាននិយាយថា មនុស្សទាំង ៦ នាក់ដែលត្រូវបានឃាត់ខ្លួនមកពីតំបន់ Mugali។
លោក Otto បានប្រាប់កម្មវិធី South Sudan in Focus របស់ VOA ថា៖ «អ្នកទាំងនោះជាអ្នកជិតខាងរបស់យើងមកពីប្រទេសអ៊ូហ្គាន់ដា និងជាប្រជាពលរដ្ឋនៅក្នុងស្រុក Amuru»។
លោកOtto មិនបានបញ្ជាក់ទេ ថាតើអ្នកលួចកាប់ឈើទាំងនោះនឹងប្រឈមមុខនឹងបទចោទអ្វីខ្លះនៅក្នុងតុលាការ ដោយលោកបាននិយាយថា វាអាស្រ័យលើការស៊ើបអង្កេតបន្តទៀត។ លោកបាននិយាយទៀតថា អភិបាលរដ្ឋ Eastern Equatoria លោក Louis Lobong បានបញ្ជាឱ្យអាជ្ញាធរធ្វើការបង្ក្រាបលើការកាប់ឈើខុសច្បាប់។
លោក Otto បានប្រាប់ VOA ថា «នេះផ្ទុយពីច្បាប់ ហើយរដ្ឋតាមរយៈលោកអភិបាលក៏បានចេញដីកាប្រឆាំងនឹងការកាប់ឈើខុសច្បាប់នៅក្នុងរដ្ឋនេះផងដែរ។ នៅក្នុងដីកានោះ សហគមន៍ទាំងមូល ប្រជាពលរដ្ឋនៅក្នុងរដ្ឋ Eastern Equatoria ត្រូវបញ្ឈប់ការកាប់ឈើខុសច្បាប់»។
ឈើជាធនធានធម្មជាតិមានតម្លៃ ដែលងាយនឹងត្រូវបានយកធ្វើអាជីវកម្ម ដោយសារតែប្រាក់ចំណេញខ្ពស់។ ការកាប់ឈើខុសច្បាប់គឺជាបទឧក្រិដ្ឋពាក់ព័ន្ធនឹងធនធានធម្មជាតិដែលរកប្រាក់បានច្រើនបំផុតមួយ ដែលបច្ចុប្បន្នមានតម្លៃចន្លោះពី ៥២ ពាន់លានដុល្លារ ទៅដល់ ១៥៧ ពាន់លានដុល្លារក្នុងមួយឆ្នាំ នៅទូទាំងពិភពលោក នេះបើយោងតាមអង្គការ C4ADS ដែលជាអង្គការមិនស្វែងរកប្រាក់ចំណេញ និងផ្តល់ការវិភាគ និងរាយការណ៍ពីបញ្ហាជម្លោះសាកលលោក និងសន្តិសុខឆ្លងប្រទេស។
នៅក្នុងប្រទេសស៊ូដង់ខាងត្បូង អ្នកកាប់ឈើខុសច្បាប់យកដើមឈើម៉ៃសាក់នៅក្នុងប្រទេសជាគោលដៅ។ ដើមឈើម៉ៃសាក់ជាប្រភេទឈើត្រូពិកដែលត្រូវបានប្រើប្រាស់សម្រាប់ចម្លាក់ឈើ គ្រឿងសង្ហារឹម និងធ្វើកប៉ាល់។ នៅក្នុងប៉ុន្មានឆ្នាំចុងក្រោយនេះ ដើមឈើម៉ៃសាក់ភាគច្រើននៅក្នុងពិភពលោកយកមកពីប្រទេសស៊ូដង់ខាងត្បូង ដោយសារតែដើមឈើនៅក្នុងប្រទេសនេះត្រូវបានដាំដោយអាណានិគមអង់គ្លេសនៅទសវត្សរ៍១៩៤០ និងមានអាយុអាចកាប់បាននៅពេលជាមួយគ្នាដែលប្រទេសនេះទទួលបានឯករាជ្យ។
ការកើនឡើងតម្រូវការដើមឈើម៉ៃសាក់នៅក្នុងប្រទេសស៊ូដង់ខាងត្បូងបណ្តាលឲ្យការធ្វើអាជីវកម្មព្រៃឈើប៉ះពាល់ដល់បរិស្ថាននិងគ្មានចីរភាព។ ប្រសិនបើគ្រប់គ្រងបានល្អ វាអាចផ្តល់ផលប្រយោជន៍រយៈពេលវែងសម្រាប់សេដ្ឋកិច្ច និងប្រជាពលរដ្ឋស៊ូដង់ខាងត្បូង។
លោក Otto បាននិយាយថា ការកាប់ឈើទ្រង់ទ្រាយធំក៏មានផលអវិជ្ជមានដល់កសិករនៅក្បែរនោះផងដែរ ដោយសារតែការកាប់បំផ្លាញព្រៃឈើប៉ះពាល់ដល់ប្រភពទឹកសាប និងកាត់បន្ថយទឹកភ្លៀង ដែលប៉ះពាល់ដល់ការផលិតអាហារ។
លោក Otto បានប្រាប់ VOA ថា «ព្រៃឈើទាំងនោះមានវត្តមានជាយូរមកហើយ និងអាចជួយយើងបាន។ វាប៉ះពាល់ដល់ការសិក្សា។ ព្រៃឈើទាំងនេះជាមជ្ឈមណ្ឌលនៃការសិក្សារបស់យើង»។
លោកបាននិយាយថា ព្រៃឈើជា «សម្រស់នៃប្រទេស» និងត្រូវតែថែរក្សា។
លោកអភិបាលរដ្ឋបានព្រមានអ្នកវិនិយោគដែលចង់វិនិយោគនៅក្នុងវិស័យកាប់ឈើម៉ៃសាក់ខុសច្បាប់ឱ្យគិតឡើងវិញម្តងទៀត មុនចូលទៅក្នុងតំបន់ Magi។
លោក Otto បាននិយាយក្នុងន័យដើមថា «នៅពេលអ្នកគិតពីរឿងនេះ រដ្ឋាភិបាលនឹងមិនអនុញ្ញាតនោះទេ ជាពិសេសខ្ញុំតែម្តង ខ្ញុំមិននិយាយលែងទេ ហើយខ្ញុំនឹងមិនអនុញ្ញាតឱ្យសកម្មភាពទាំងនោះកើតឡើងនៅកន្លែងខ្ញុំនោះទេ»។
នៅក្នុងឆ្នាំ២០១៩ ប្រជាពលរដ្ឋនៅស្រុក Ayaci នៃតំបន់ Magwi បានលើកឡើងនូវក្តីបារម្ភស្រដៀងនេះអំពីការកាប់ឈើខុសច្បាប់នៅក្នុងស្រុក Obbo-Kalishoni ស្រុកPalwa ស្រុក Pajok ស្រុក Agoro ស្រុក Afiriha ស្រុក Owiny Kibul និងស្រុក Obbo។ អតីតអភិបាលរដ្ឋលោក Alberio Tobiolo បានឆ្លើយតបភ្លាមៗដោយរឹបអូសយកឈើទាំងនោះ និងលក់ដេញថ្លៃដើម្បីផ្តល់មូលនិធិទៅឱ្យគម្រោងអភិវឌ្ឍន៍សហគមន៍។
ការកាប់បំផ្លាញព្រៃឈើនៅស៊ូដង់ខាងត្បូងបានក្លាយជាបញ្ហាមួយ ដែលនៅក្នុងឆ្នាំ២០១៨ រដ្ឋាភិបាលស៊ូដង់ខាងត្បូងបានហាមឃាត់ការនាំចេញធ្យូងថ្ម ក្នុងកិច្ចខិតខំប្រឹងប្រែងមួយដើម្បីទប់ស្កាត់ការកាប់ឈើខុសច្បាប់នៅក្នុងប្រទេសនេះ រួមទាំងការកាប់ដើមឈើម៉ៃសាក់ផងដែរ៕
ប្រែសម្រួលដោយអ្នកស្រី ស៊ូ ពេជ្រចិន្តា