ប្រទេសកូរ៉េខាងត្បូងនិយាយកាលពីថ្ងៃចន្ទថា រឿងរ៉ាវដែលរៀបរាប់ដោយអតីតទីប្រឹក្សាសន្តិសុខជាតិសហរដ្ឋអាមេរិកលោក John Bolton អំពីការពិភាក្សាគ្នារវាងមេដឹកនាំសហរដ្ឋអាមេរិក និងមេដឹកនាំកូរ៉េទាំងពីរ ដែលនឹងត្រូវចេញផ្សាយនៅក្នុងសៀវភៅថ្មីរបស់លោកមិនសុក្រឹត្យ និងបំភ្លៃហេតុការណ៍។
នៅក្នុងសៀវភៅថ្មី The Room Where It Happened: A White House Memoir ដែលនឹងចេញផ្សាយនៅថ្ងៃអង្គារ ទី២៣ ខែមិថុនា លោក Bolton បានកត់ត្រាសេចក្តីលម្អិតនៃកិច្ចប្រជុំ៣រវាងលោកប្រធានាធិបតីសហរដ្ឋអាមេរិក ដូណាល់ ត្រាំ និងមេដឹកនាំកូរ៉េខាងជើងលោក Kim Jong Un។ លោក Bolton សរសេរថាប្រធានាធិបតីកូរ៉េខាងត្បូងលោក Moon Jae-in ដែលខ្នះខ្នែងចង់ធ្វើឲ្យទំនាក់ទំនងជាមួយកូរ៉េខាងជើងកាន់តែប្រសើរនោះ មានការរំពឹងទុកខ្ពស់ពេកពីទាំងលោកត្រាំ និងលោក Kim ដើម្បីបម្រើដល់ប្រយោជន៍នយោបាយបង្រួបបង្រួមកូរ៉េរបស់លោក Moon ខ្លួនលោកផ្ទាល់។
លោក Chung Eui-yong ទីប្រឹក្សាសន្តិសុខជាតិកូរ៉េខាងត្បូងប្រតិកម្មនៅក្នុងសេចក្តីថ្លែងការណ៍មួយថា ការពិពណ៌នារបស់លោក Bolton អំពីកិច្ចប្រជុំថ្នាក់កំពូលនេះថា មិនបង្ហាញពីការពិតដែលបានកើតឡើង និងបានបំភ្លៃការពិត។ លោកថាការបោះពុម្ពសៀវភៅនេះបង្កើតជាគំរូដ៏គ្រោះថ្នាក់មួយដែលប៉ះពាល់ដល់ទំនុកចិត្តក្នុងការចរចាការទូតទៅពេលអនាគត។
លោក ត្រាំ និងលោក គីមបានជួបគ្នាជាលើកដំបូងនៅប្រទេសសិង្ហបុរីកាលពីខែមិថុនា ឆ្នាំ២០១៨ ដែលនេះបានបង្កើនក្តីសង្ឃឹមចំពោះកិច្ចប្រឹងប្រែងដើម្បីដាក់សម្ពាធឲ្យកូរ៉េខាងជើងលះបង់កម្មវិធីនុយក្លេអ៊ែររបស់ខ្លួន ជាថ្នូរនឹងការដកទណ្ឌកម្ម។
ឆ្នាំ២០១៩ បានបរាជ័យនៅពេលលោកត្រាំបដិសេធសំណើរបស់លោក គីម ថានឹងលះបង់គម្រោងនុយក្លេអ៊ែរខ្លះថ្នូរនឹងការដកទណ្ឌកម្មសេដ្ឋកិច្ច៕