ទាហានកូរ៉េខាងជើងប្រហែល ៣០០ នាក់ត្រូវបានសម្លាប់និង ២.៧០០ នាក់ទៀតបានរងរបួសនៅក្នុងសង្គ្រាមរបស់រុស្ស៊ីនៅអ៊ុយក្រែន។ នេះបើតាមការបញ្ជាក់របស់ទីភ្នាក់ងារចារកម្មកូរ៉េខាងត្បូងដែលបានប្រាប់សមាជិកសភាកូរ៉េខាងត្បូងនៅក្នុងការជូនដំណឹងបិទទ្វារមួយកាលពីថ្ងៃចន្ទ។
ទីភ្នាក់ងារស៊ើបការណ៍សម្ងាត់ជាតិរបស់កូរ៉េខាងត្បូងបានបញ្ជាក់ថា ខ្លួនបានចូលរួមនៅក្នុងការសួរចម្លើយទាហានកូរ៉េខាងជើងជាច្រើននាក់ដែលកងទ័ពអ៊ុយក្រែនចាប់ខ្លួនបាន។
ការជូនដំណឹងនេះបានធ្វើឡើងក្នុងពេលប៉ុន្មានថ្ងៃក្រោយមកបន្ទាប់ពីប្រធានាធិបតីអ៊ុយក្រែនលោក Volodymyr Zelenskyy បានប្រកាសអំពីការចាប់ខ្លួនបានទាហានកូរ៉េខាងជើងពីរនាក់ក្នុងអំឡុងការប្រយុទ្ធគ្នានៅក្នុងតំបន់ Kursk នៃប្រទេសរុស្ស៊ី ដែលនៅទីនោះកងទ័ពអ៊ុយក្រែនបានបើកការវាយប្រហារដ៏ភ្ញាក់ផ្អើលកាលពីខែសីហាឆ្នាំមុន។
លោក Zelenskyy បាននិយាយកាលពីយប់ថ្ងៃអាទិត្យថាលោកនឹងបញ្ជូនទាហានកូរ៉េខាងជើងដែលចាប់ខ្លួនបាននោះត្រឡប់ទៅប្រទេសកូរ៉េខាងជើងវិញ ប្រសិនបើមេដឹកនាំកូរ៉េខាងជើងលោក Kim Jong Un រៀបចំការដោះដូរជាមួយទាហានអ៊ុយក្រែនដែលកំពុងជាប់ឃុំនៅរុស្ស៊ី។
លោក Zelenskyy ថា មិនយូរមិនឆាប់អ៊ុយក្រែនគង់នឹងអាចចាប់ខ្លួនទាហានកូរ៉េខាងជើងបានបន្ថែមទៀតតែប៉ុណ្ណោះ និងថាយោធារុស្ស៊ី «ពឹងពាក់លើជំនួយយោធាពីកូរ៉េខាងជើង»៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP ទីភ្នាក់ងារសារព័ត៌មាន AFP និងទីភ្នាក់ងារសារព័ត៌មាន Reuters។
កូរ៉េខាងត្បូងថាទាហានកូរ៉េខាងជើងប្រហែល ៣០០ នាក់ត្រូវបានសម្លាប់នៅក្នុងសង្គ្រាមនៅអ៊ុយក្រែន
ទាហានរុស្ស៊ីបាញ់តម្រង់ទៅកាន់ទីតាំងអ៊ុយក្រែននៅព្រំដែនរុស្ស៊ី។