ឪពុកម្តាយនិងអ្នកលក់ដូរមួយចំនួនបានលើកឡើងអំពីផលប៉ះពាល់នៃអាកាសធាតុក្តៅដែលបណ្តាលឱ្យកូនៗរបស់ពួកគេឈឺថ្កាត់ ហើយការរកស៊ីរបស់ពួកគេធ្លាក់ចុះផងដែរ។
កំពុងបីកូន និងអង្គុយលើកៅអីឈើនៅខាងក្រៅបរិវេណមន្ទីរពេទ្យគន្ធបុប្ផា រាជធានីភ្នំពេញ ដើម្បីរង់ចាំឡានឈ្នួលមកយកត្រឡប់ទៅស្រុកកំណើតក្នុងខេត្តកំពង់ចាមវិញ អ្នកស្រី ស្រ៊ឺ ស៊ីណែត អាយុ៣១ឆ្នាំ បានរៀបរាប់ប្រាប់អ្នកសារព័ត៌មានវីអូអេថា ដោយសារបច្ចុប្បន្ននេះ អាកាសធាតុក្តៅ ទើបបណ្តាលឱ្យកូនរបស់អ្នកស្រីអាយុ១ខួប១៥ថ្ងៃមានជំងឺ«រលាកទងសួត» ដែលតម្រូវអ្នកស្រី និងកូនស្រីធ្វើដំណើរពីខេត្តកំពង់ចាម មកបើកថ្នាំនៅមន្ទីរពេទ្យគន្ធបុប្ផាជាប្រចាំ ក្នុងរយៈពេល៤ឬ៥ថ្ងៃម្តង។
អ្នកស្រីថ្លែងថា៖ «ខែមួយ ខែពីរ នេះវា[កូនស្រី]រៀងឈឺក្អក ហត់ខ្លាំង មកបើកថ្នាំទៅ»។
ស្រ្តីម្នាក់ទៀតមកពីខេត្តកណ្តាល អ្នកស្រី នាង ស្រីខួច អាយុ៣៤ឆ្នាំ ធ្វើការជាអ្នករៀបបន្ទប់នៅខុនដូមួយកន្លែងក្នុងរាជធានីភ្នំពេញ បានយកកូនស្រីអាយុជិត២ខួប មកពិនិត្យព្យាបាលនៅមន្ទីរពេទ្យគន្ធបុប្ផារាជធានីភ្នំពេញដែរ។ អ្នកស្រីបានផ្តល់បទសម្ភាសន៍ដល់អ្នកសារព័ត៌មានវីអូអេ នៅថ្ងៃសុក្រនេះថា ក្នុងរយៈពេលប៉ុន្មានថ្ងៃនេះ អាកាសធាតុក្តៅពេក កូនរបស់អ្នកស្រី បានផ្តាសាយ និងហៀរសំបោរជាដើម។
អ្នកស្រីបញ្ជាក់ថា៖ «ចា៎ហ្នឹងហើយ មកពីក្តៅពេក។ ប៉ុន្មានថ្ងៃនេះក្តៅ ហើយដល់ពេលក្តៅអ៊ីចឹងគាត់លេងទឹកដាក់នឹងកាធុនទៅវាលេងអ៊ីចឹងទៅវាឈ្លក់ទឹក ឈ្លក់អីផងទៅ វាត្រាំយូរ វាក្តៅវាទៅជាផ្តាសាយ»។
អ្នកស្រី នាង ស្រីខួច អាយុ៣៤ឆ្នាំ អង្គុយលើកៅអី ក្បែរមន្ទីរពេទ្យគន្ធបុប្ផា រាជធានីភ្នំពេញ នៅថ្ងៃទី៧ ខែមេសា ឆ្នាំ២០២៣។ (លាស់ លីបលីប/វីអូអេ)
ស្ត្រីដែលមានកូន៤នាក់នេះបន្ថែមថា កូនរបស់អ្នកស្រីបីនាក់ទៀតក៏ផ្តាសាយដែរ តែគ្រាន់តែលេបថ្នាំទៅបាត់។
ប្រធានមន្ទីពេទ្យគន្ធបុប្ផាភ្នំពេញ លោក គី សង់ទី ប្រាប់វីអូអេនៅថ្ងៃសុក្រនេះថា ចំនួនក្មេងៗដែលមកពិនិត្យព្យាបាលជំងឺកើនឡើង បើធៀបនឹងឆ្នាំ២០២១ និង២០២២។ លោកបន្ថែមថាជំងឺភាគច្រើនរបស់កុមារទាំងនោះ គឺរលាកទងសួត និងជំងឺទូទៅផ្សេងៗ។
លោកថ្លែងថា៖ «ឆ្នាំនេះគឺអ្នកជំងឺកុមារមានការកើនឡើង ដែលមកពិគ្រោះព្យាបាលនៅមន្ទីរពេទ្យគន្ធបុប្ផា បើធៀបនឹងបណ្តាឆ្នាំមុនៗ ពីឆ្នាំ២០២១ ឆ្នាំ២០២២នោះគឺ ឆ្នាំ២០២៣នេះយើងមានការកើនឡើង»។
លោកបន្ថែមថា ជំងឺរលាកទងសួតភាគច្រើនកើតមាននៅពេលរដូវរំហើយ និងឈានមកដល់រដូវក្តៅ ដែលជាហេតុធ្វើឱ្យកុមារឆាប់ឈឺ។
បើតាមសេចក្តីប្រកាសព័ត៌មានរបស់មន្ទីរពេទ្យគន្ធបុប្ផា ក្នុងខែកុម្ភៈឆ្នាំ២០២៣ កុមារឈឺមានចំនួនជាង៧ម៉ឺន៣ពាន់នាក់ រីឯខែមីនាថយចុះជាងខែកុម្ភៈប្រមាណ១ពាន់នាក់ ដែលមានចំនួនជាង៦ម៉ឺន៥ពាន់នាក់។
ស្ត្រីម្នាក់ ដើរចេញពីមន្ទីរពេទ្យគន្ធបុប្ផា ក្នុង រាជធានីភ្នំពេញ នៅថ្ងៃទី៧ ខែមេសា ឆ្នាំ២០២៣។ (លាស់ លីបលីប/វីអូអេ)
វីអូអេមិនទាន់អាចសុំការអត្ថាធិប្បាយពីអ្នកស្រី ឱ វណ្ណឌីន និងអ្នកស្រី យក់ សម្បត្តិ ដែលជាអ្នកនាំពាក្យក្រសួងសុខាភិបាលបាននៅឡើយទេ។
ក្រសួងសុខាភិបាលបានបង្ហោះសារលើទំព័រហ្វេសប៊ុករបស់ក្រសួងនៅថ្ងៃទី២ ខែមេសានេះ ដោយប្រាប់ប្រជាពលរដ្ឋឱ្យថែទាំសុខភាព និងបរិភោគទឹកឱ្យបានច្រើននៅក្នុងរដូវក្តៅនេះ។
ក្រសួងបញ្ជាក់ថា៖ «អាកាសធាតុក្តៅទៅក្តៅទៅហើយ! សូមប្រជាជនទាំងអស់ថែរក្សាសុខភាពផ្ទាល់ខ្លួនឱ្យបានល្អ។ សូមពិសាទឹកឱ្យបានគ្រប់គ្រាន់លើសពី២លីត្រក្នុងមួយថ្ងៃ បើទោះជាមិនស្រេកទឹកក៏ដោយ។ កុំស្ថិតនៅក្រោមកម្តៅថ្ងៃផ្ទាល់យូរពេក។ សូមប្រយ័ត្ននូវភាពអាចឆេះផ្ទះសម្បែងផងដែរ!»។
អាកាសធាតុក្តៅនាពេលថ្មីៗនេះ ក៏ប៉ះពាល់ដល់ការរកស៊ីមួយចំនួនផងដែរ ដូចជាអ្នករត់ម៉ូតូឌុប និងអ្នកលក់ដូរតាមផ្លូវជាដើម។
លោក ឆាយ ប៊ីន អាយុ៥៨ឆ្នាំ កំពុងអង្គុយលើម៉ូតូ និងបានបក់ដៃហៅអ្នកជិះ នៅក្បែរវត្តភ្នំ។ ជាអ្នករត់ម៉ូតូឌុប លោកប្រាប់អ្នកសារព័ត៌មានវីអូអេនៅថ្ងៃសុក្រនេះថា បច្ចុប្បន្ននេះ លោករកចំណូលមិនសូវបាននោះទេ ដោយសារពលរដ្ឋមិនសូវជិះម៉ូតូឌុប ក្នុងពេលអាកាសធាតុក្តៅ ហើយពួកគេងាកទៅជិះកង់បីច្រើន។
លោកថ្លែងថា៖ «វាក្តៅពេក ប៉ុន្តែចិត្តមនុស្សវាជិះកង់បីច្រើនជាង។ ដល់ពេលខ្ញុំម៉ូតូឌុប គេ២នាក់មិនសូវឱ្យឌុប ខ្លាចប៉ូលិសដែរ»។
លោកត្អូញត្អែរអំពីការធ្លាក់ចុះចំណូលយ៉ាងដូច្នេះថា៖ «បាត់បង់ចំណូលហើយ ស្ថានការណ៍ដូចថា គ្មានលុយចាក់សាំង ចាក់អីដែរហ្នឹង។ វាអង្គុយ[ចាំក្រែងមានគេជិះ]តែអ៊ីចឹង»។
ចំណែកអ្នកលក់ស៊ុបគុយទាវដឹកតាមរទេះ អ្នកស្រី សួន សំណាង រស់នៅម្តុំផ្សារចាស់ រាជធានីភ្នំពេញ ក៏បានរអ៊ូរទាំថា មួយរយៈនេះ អ្នកស្រីក៏លក់មិនសូវដាច់និងធ្វើឱ្យចំណូលអ្នកស្រីធ្លាក់ចុះផងដែរ។
អ្នកស្រីថា៖ «មួយរយៈនេះរៀងស្ងាត់គ្រប់គ្នា។ បានតែទិញអីវ៉ាន់វិញ ហើយបានតែហូបនៅក្នុងហ្នឹង។ ដល់អ៊ីចឹង វាអត់បានសល់ ទិញអីក្រៅហូបអ៊ីចឹង ហូបតែអាហ្នឹងវិញ[ស៊ុបគុយទាវ]»។
វីអូអេក៏មិនទាន់អាចសុំការបញ្ជាក់ពីលោក នេត្រ ភក្ត្រា អ្នកនាំពាក្យក្រសួងបរិស្ថានបាននៅឡើយទេ។
នៅដើមសប្តាហ៍នេះ លោក នេត្រ ភក្ត្រា ប្រាប់សារព័ត៌មានថ្មីៗថា រដូវប្រាំងបានធ្វើឱ្យកម្រិតនៃខ្យល់ PM2.5 កើតឡើង ហើយខ្យល់ PM2.5 កើនឡើងគឺដោយសារផ្សែងម៉ូតូ និងការដ្ឋានសំណង់ជាដើម។ លោកបន្ថែមថា កម្រិតនៃខ្យល់នេះអាចការពារបានតាមរយៈការពាក់ម៉ាស់ ដែលមិនប៉ះពាល់ដល់សុខភាពឡើយ៕