ព្រះរាជបុត្រគ្រងរាជសម្បត្តិអារ៉ាប៊ីសាអូឌីត ព្រះអង្គ Mohammed bin Salman បានចូលរួមក្នុងសន្និសីទវិនិយោគរបស់អារ៉ាប៊ីសាអូឌីត ដែលមេដឹកនាំពាណិជ្ជកម្មពិភពលោក និងអ្នកនយោបាយបានធ្វើពហិការមិនចូលរួម បន្ទាប់ពីមានការធ្វើឃាតកម្មអ្នកកាសែត និងជាអ្នករិះគន់រដ្ឋាភិបាលលោក Jamal Khashoggi រួចមក។
ព្រះរាជបុត្រ ដែលត្រូវបានសង្ស័យថា មានពាក់ព័ន្ធនឹងអំពើឃាតកម្មនេះ បានមកដល់សន្និសីទនេះកាលពីល្ងាចថ្ងៃអង្គារ និងបានមានប្រសាសន៍ ខណៈពេលដែលព្រះអង្គដើរមើលបរិវេណសន្និសីទនោះទេ «ល្អណាស់។ មានមនុស្សកាន់តែច្រើន និងរកចំណូលបានកាន់តែច្រើន»។
ប្រទេសអារ៉ាប់ប៊ីសាអូឌីតបានចុះហត្ថលេខាកាលពីថ្ងៃអង្គារទៅលើកិច្ចព្រមព្រៀងមួយចំនួនដែលមានតម្លៃ៥០ពាន់លានដុល្លារ។ នេះគឺជាការចង្អុលបង្ហាញថា សន្និសីទនេះនៅតែអាចទាក់ទាញការវិនិយោគ បើទោះជាមានភាពចម្រូងចម្រាសជុំវិញឃាតកម្មរបស់លោក Khashoggi នៅក្នុងស្ថានកុងស៊ុលអារ៉ាប់ប៊ីសាអូឌីតក្នុងប្រទេសតួកគី ក៏ដោយ។ មនុស្សជាច្រើនក្នុងចំណោមអ្នកចូលរួមសន្និសីទនោះប្រមាណ២០០០នាក់បានទះដៃស្វាគមន៍ព្រះអង្គ ខណៈដែលព្រះអង្គដើរចូលទៅកាន់សាលធំ។
ការធ្វើពហិការមិនចូលរួមក្នុងសន្និសីទគំនិតផ្តួចផ្តើមវិនិយោគនាពេលអនាគតរបស់អារ៉ាប់ប៊ីសាអូឌីតក្នុងទីក្រុង Riyadh គឺដើម្បីឆ្លើយតបទៅនឹងការស្លាប់របស់លោក Khashoggi និងការពន្យល់ម្តងអញ្ចេះម្តងអញ្ចុះរបស់អារ៉ាប់ប៊ីសាអូឌីតអំពីអ្វីដែលបានកើតឡើង។ ក្នុងចំណោមអ្នកដែលបានបាត់វត្តមានគឺមានដូចជាលោក Steven Mnuchin រដ្ឋមន្ត្រីក្រសួងសេដ្ឋកិច្ចអាមេរិក លោកស្រី Christine Lagarde នាយិកាមូលនិធិរូបិយប័ណ្ណអន្តរជាតិ IMF និងមេដឹកនាំសហគ្រាសដូចជាក្រុមហ៊ុន JP Morgan Chase ជាដើម៕