ឧបនាយករដ្ឋមន្ត្រីលោក ស ខេង ដែលត្រូវអ្នកតាមដាននយោបាយកម្ពុជាខ្លះមើលឃើញថា ជាបេក្ខជនម្នាក់ដែលមានសក្តានុពលអាចក្លាយជានាយករដ្ឋមន្ត្រីកម្ពុជាដែរនោះ នៅថ្ងៃអង្គារ បានប្រកាសជាសាធារណៈតាមទំព័រហ្វេសប៊ុករបស់លោកថាលោកនឹងគោរពតាមការសម្រេចរបស់គណបក្សប្រជាជនកម្ពុជាក្រោមការដឹកនាំរបស់លោក ហ៊ុន សែន ចំពោះការជ្រើសរើសបេក្ខភាពនាយករដ្ឋមន្ត្រីនាពេលអនាគត។
ការថ្លែងរបស់លោក ស ខេង បែបនេះធ្វើឡើង ក្រោយពីលោកនាយករដ្ឋមន្ត្រីហ៊ុន សែន កាលពីសប្តាហ៍មុន បានប្រកាសជាសាធារណៈគាំទ្រកូនប្រុសច្បងរបស់ខ្លួន គឺលោក ហ៊ុន ម៉ាណែត ជាបេក្ខជនម្នាក់សម្រាប់តំណែងជានាយករដ្ឋមន្ត្រីនៅពេលខាងមុខ បន្តពីរូបលោក។
ក្រោយពីការប្រកាសរបស់លោក ហ៊ុន សែននោះ មានការចេញសារអបអរសាទរព្រោងព្រាតពីក្រុមអ្នកគាំទ្រលោកហ៊ុន សែន និងលោក ហ៊ុន ម៉ាណែត ប៉ុន្តែមិនមានការចេញសារណាមួយពីលោក ស ខេងនិងក្រុមអ្នកគាំទ្រលោក ស ខេង ទៅលើបេក្ខភាពរបស់លោក ហ៊ុន ម៉ាណែត ជានាយករដ្ឋមន្ត្រីនេះទេ រហូតមកត្រឹមល្ងាចថ្ងៃអង្គារនេះ។
នៅថ្ងៃចន្ទ លោក ហ៊ុន សែន ក៏បានថ្លែងជាសាធារណៈម្តងទៀត ដោយលើកឡើងថាការប្រកាសបេក្ខភាពលោក ហ៊ុន ម៉ាណែត ដែលបច្ចុប្បន្នមានតួនាទីជាអគ្គមេបញ្ជាការរងកងទ័ពនិងជាមេបញ្ជាការកងទ័ពជើងគោក គឺដើម្បីប្រកួតប្រជែងជាមួយកូនៗថ្នាក់ដឹកនាំគណបក្សប្រជាជនកម្ពុជាក្នុងជំនាន់ថ្មី មិនមែនប្រកួតជាមួយអ្នកដឹកនាំចាស់ៗក្នុងជំនាន់រូបលោកនោះទេ។
នៅក្នុងសេចក្តីប្រកាសរបស់លោក ស ខេង ដែលផ្ញើ«ជូនជនរួមជាតិ»នៅថ្ងៃអង្គារនេះ លោក ស ខេង ដែលជារដ្ឋមន្ត្រីក្រសួងមហាផ្ទៃ និងត្រូវជាប្អូនថ្លៃរបស់អតីតប្រធានគណបក្សប្រជាជនកម្ពុជាគឺលោក ជា ស៊ីមផងនោះ បានសរសេរថា លោកក៏តែងតែគោរពសេចក្តីសម្រេចរបស់មហាសន្និបាតនិងសន្និបាតគណបក្សរបស់លោកក្នុងការតែងតាំងលោក ហ៊ុន សែន ជានាយករដ្ឋមន្ត្រីសម្រាប់អាណត្តិនេះនិងអាណត្តិបន្តបន្ទាប់ទៀត។
ប៉ុន្តែលោកឧបនាយករដ្ឋមន្ត្រីរូបនេះ មិនបានបញ្ជាក់ថាតើលោកគាំទ្របេក្ខភាពលោក ហ៊ុន ម៉ាណែត សម្រាប់តំណែងជានាយករដ្ឋមន្ត្រីនាពេលអនាគត ដូចដែលលោក ហ៊ុន សែន បានប្រកាសគាំទ្រដែរឬអត់នោះទេ៕