លោកសម រង្ស៊ី អតីតប្រធានគណបក្សប្រឆាំង ដែលកំពុងរស់នៅដោយនិរទេសខ្លួនឯងនៅឯបរទស នៅសប្តាហ៍នេះ បានអំពាវនាវឲ្យសហគមន៍អន្តរជាតិចាត់ទុករដ្ឋាភិបាលក្រុងភ្នំពេញនាពេលបច្ចុប្បន្នថា ជារដ្ឋាភិបាលមិនស្របច្បាប់ ដូចរដ្ឋាភិបាលរបស់ប្រទេសវ៉េណេស៊ុយអេឡារបស់លោកនីកូឡា ម៉ាឌូរ៉ូ (Nicolas Maduro) ដែលកើតចេញពីការបោះឆ្នោតមួយដ៏រឹតត្បិតលើសំឡេងក្រុមអ្នកនយោបាយជំទាស់។
នៅថ្ងៃសុក្រនេះ លោកសម រង្ស៊ី អតីតប្រធានគណបក្សសង្គ្រោះជាតិ ដែលត្រូវបានតុលាការខ្មែររំលាយចោលកាលពីឆ្នាំ២០១៧នោះ បានអធិប្បាយលើទំព័រហ្វេសប៊ុកលោកថា សហរដ្ឋអាមេរិក និងសហភាពអឺរ៉ុបកំពុងដាក់ការគាបសង្កត់ឲ្យលោកនីកូឡា ម៉ាឌូរ៉ូ ដែលប្រទេសនិយមរបបនយោបាយកុម្មុយនីស្តចាត់ទុកជាប្រធានាធិបតីវ៉េណេស៊ុយអេឡានៅឡើយនោះ ធ្វើការបោះឆ្នោតឡើងវិញក្នុងឆ្នាំ២០១៩នេះជំនួសការបោះឆ្នោតក្លែងក្លាយឆ្នាំ២០១៨។ លោក សម រង្ស៊ី បានសរសេរលើទំព័រហ្វេសប៊ុករបស់លោកក្នុងន័យដើមថា៖
«សហរដ្ឋអាមេរិកនិងសហភាពអឺរ៉ុបដាក់ឱសានវាទលើជនផ្តាច់ការ ម៉ាឌូរ៉ូ នៅប្រទេសវ៉េណេស៊ុយអេឡា ឲ្យបោះឆ្នោតឡើងវិញក្នុងឆ្នាំ២០១៩នេះ ជំនួសការបោះឆ្នោតក្លែងក្លាយឆ្នាំ២០១៨»។
ការអធិប្បាយរបស់លោកសម រង្ស៊ី កើតមានឡើង នៅគ្រាដែលរដ្ឋបាលលោក Donald Trump ប្រធានាធិបតីសហរដ្ឋអាមេរិក និងក្រុមសមាជិកសភាសហភាពអឺរ៉ុបជាង៤០០នាក់ បានសម្រេចទទួលស្គាល់លោកJuan Guaidó ដែលជាមេដឹកនាំអ្នកនយោបាយប្រឆាំង និងជាប្រធានសភាប្រទេសវ៉េណេស៊ុយអេឡា ជាប្រធានាធិបតីស្តីទីរបស់ប្រទេសនេះ។
សេចក្តីរាយការណ៍របស់ទីភ្នាក់ងារព័ត៌មាន Reuters បានបញ្ជាក់ឲ្យដឹងកាលពីថ្ងៃទី៣១ ខែមករា ឆ្នាំ២០១៩ ថា តំណាងរាស្ត្រសហភាពអឺរ៉ុប៤៣៩នាក់បានបោះឆ្នោតក្នុងកិច្ចប្រជុំពិសេសមួយក្នុងទីក្រុងព្រុចសែល គាំទ្រលោក Guaidó ជាមេដឹកនាំស្តីទីប្រទេសវ៉េណេស៊ុយអេឡា។ មានតំណាងរាស្ត្រសភាសហភាពអឺរ៉ុប១០៤នាក់បានបោះឆ្នោតជំទាស់ និង៨៨នាក់បានបោះឆ្នោតអនុបវាទ។
សេចក្តីរាយការណ៍ដដែលបានឲ្យដឹងថា សភាសហភាពអឺរ៉ុបបានស្នើឲ្យរដ្ឋាភិបាលនៃប្រទេសចំនួន២៨ក្នុងប្លុកចាត់វិធានការដូចគ្នា និងចាត់ទុកលោក Guaidó ជា«ប្រធានាធិបតីបណ្តោះអាសន្នតែមួយគត់»រហូតទាល់តែមាន«ការបោះឆ្នោតប្រធានាធិបតីថ្មីមួយ ដែលសេរីមានតម្លាភាព និងអាចទុកចិត្តបាន»។
សេចក្តីរាយការណ៍បានបន្តទៀតថា ប្រធានកិច្ចការនយោបាយបរទេសសហភាពអឺរ៉ុប អ្នកស្រី Federica Mogherini បានឲ្យដឹងថា ក្រុមទំនាក់ទំនងអន្តរជាតិមួយត្រូវបានបង្កើតឡើង ដើម្បីអមឲ្យប្រទេសវ៉េណេស៊ុយអេឡាងាកមករករបៀបរបបប្រជាធិបតេយ្យប្រកបដោយសន្តិភាពដើម្បីឆ្ពោះទៅរកការបោះឆ្នោតប្រជាធិបតេយ្យ មួយដោយសេរី និងសន្តិវិធីក្នុងរយៈពេល៩០ថ្ងៃ។
រូបឯកសារ៖ លោក Nicolas Maduro ប្រធានាធិបតីវ៉េណេស៊ុយអេឡា លើកដៃនៅក្នុងកិច្ចប្រជុំមួយជាមួយកងទ័ពយោធានៅឯមូលដ្ឋានយោធាមួយកន្លែងនៅក្នុងទីក្រុង Caracas ប្រទេសវ៉េណេស៊ុយអេឡា កាលពីថ្ងៃទី៣០ ខែមករា ឆ្នាំ២០១៩។
ប៉ុន្តែលោក Maduro បានច្រានចោលសំណើនេះថា ជាការដាក់ឱសានវាទដែលមិនអាចទទួលយកបាន សម្រេចដោយក្រុមវីរជនពុករលួយរបស់ប្រទេសមហាអំណាចអាណានិគមនិយមដែលលែងមានឥទ្ធិពលទៀតទៅហើយនោះ។
លោក Maduro ត្រូវបានស្រង់សម្តីថា៖
«ពួកមេដឹកនាំអឺរ៉ុបគឺជាក្រុមដៃជើង ដែលលត់ជង្គង់មុខគោលនយោបាយរបស់លោក Donald Trump»។
ក្នុងថ្ងៃតែមួយនៃការចេញសេចក្តីរាយការណ៍របស់ទីភ្នាក់ងារព័ត៌មាន Reuters នោះ ទំព័រហ្វេសប៊ុករបស់លោកសម រង្ស៊ី ក៏បានផ្តល់ការអធិប្បាយទាក់ទិនស្ថានការណ៍នយោបាយនៅប្រទេសវ៉េណេស៊ុយអេឡាដែរ។
ទំព័រហ្វេសប៊ុករបស់លោកសម រង្ស៊ី បានសរសេរថា៖
«សហគមន៍អន្តរជាតិត្រូវចាត់ទុករបបខុសច្បាប់ហ៊ុន សែន នៅកម្ពុជា ដូចរបបខុសច្បាប់ នីកូឡា ម៉ាឌូរ៉ូ (Nicolas Maduro) នៅវ៉េណេស៊ុយអេឡា (Venezuela) អ៊ីចឹងដែរ»។
ទំព័រហ្វេសប៊ុករបស់អតីតមេដឹកនាំគណបក្សប្រឆាំងដដែលនេះបានបញ្ជាក់ទៀតថា លោកសម រង្ស៊ី ស្នើសុំឲ្យសហគមន៍អន្តរជាតិប្រកាសថា របបហ៊ុន សែនមិនមានភាពស្របច្បាប់ទេ ពីព្រោះការបោះឆ្នោតនៅកម្ពុជាក្នុងឆ្នាំ២០១៨ក៏មិនមានភាពស្របច្បាប់ដែរ។
ទំព័រហ្វេសប៊ុករបស់លោកសម រង្ស៊ី បានសរសរក្នុងន័យដើមថា៖
«ករណីនេះគឺដូចករណីវ៉េណេស៊ុយអេឡា (Venezuela) អ៊ីចឹងដែរ ដែលប្រទេសប្រជាធិបតេយ្យទាំងអស់ក្នុងពិភពលោកបានដកភាពស្របច្បាប់ពីរបបនីកូឡា ម៉ាឌូរ៉ូ (Nicolas Maduro) ដែលបានរារាំងមិនឲ្យគណបក្សប្រឆាំងចូលរួមក្នុងការបោះឆ្នោតក្នុងឆ្នាំ២០១៨ ដូចនៅកម្ពុជាអ៊ីចឹងដែរ។ តែលើសពីប្រទេសវ៉េណេស៊ុយអេឡា (Venezuela) ទៅទៀត ប្រទេសកម្ពុជាមានកិច្ចព្រមព្រៀងទីក្រុងប៉ារីសឆ្នាំ១៩៩១ ដែលតម្រូវឲ្យមានការបោះឆ្នោតត្រឹមត្រូវ ដោយសេរី និងយុត្តិធម៌ ហើយឲ្យមានប្រព័ន្ធប្រជាធិបតេយ្យ សេរី ពហុបក្ស គឺមិនមែនដូចរបបផ្តាច់ការបក្សតែមួយ ដែលមានសព្វថ្ងៃនេះទេ»។
លោកផៃ ស៊ីផាន អ្នកនាំពាក្យរដ្ឋាភិបាលខ្មែរ មានប្រសាសន៍ប្រាប់ VOA នៅថ្ងៃសុក្រនេះថា ស្ថានភាពនៅប្រទេសវ៉េណេស៊ុយអេឡាគឺខុសគ្នានឹងស្ថានភាពនៅប្រទេសកម្ពុជា ដែលពលរដ្ឋជាង៨៣ភាគរយបានចេញទៅបោះឆ្នោត។ លោកថា ការអធិប្បាយរបស់លោកសម រង្ស៊ី មានចរិតជាជនឧទ្ទាម។
«គាត់និយាយនៅក្នុងលក្ខណៈឧទ្ទាម! ការគាំទ្រ មិនគាំទ្រ អាហ្នឹងជាអធិបតីភាពរបស់ប្រជាពលរដ្ឋរបស់កម្ពុជា។ យើងឃើញការបោះឆ្នោតបានបញ្ចប់ នៅក្នុងបរិយាកាសសន្តិភាព និងបរិយាកាសសុវត្ថិភាពក្នុងកិច្ចថែរក្សាសេរីភាពរបស់ប្រជាពលរដ្ឋចេញទៅបោះឆ្នោត ដែលមាន៨៣ភាគរយនៃចំនួនមនុស្សដែលចុះដែលនៅក្នុងបញ្ជីការបោះឆ្នោតនេះឯង»។
លោកអះអាងថា រដ្ឋាភិបាលកម្ពុជាក៏កំពុងមានប្រតិបត្តិការយ៉ាងរលូនផងដែរ។ លោកផៃ ស៊ីផានមានប្រសាសន៍បន្ថែមថា៖
«ដំណើរការរាជរដ្ឋាភិបាលបានចាប់ផ្តើមដំណើរការដោយរលូន ដំណើរការរដ្ឋនៅតែបន្តការងារត្រឹមត្រូវ សកម្មភាពជាមួយវេទិកាអន្តរជាតិ នៅតែរាជរដ្ឋាភិបាលហ្នឹងតំណាងផលប្រយោជន៍របស់កម្ពុជា អធិបតេយ្យភាពរបស់កម្ពុជា ដែលបានទៅធ្វើ។ ដូច្នេះ ការលើកឡើងហ្នឹង គ្រាន់តែឲ្យគេចាប់អារម្មណ៍ ដែលខ្ញុំហៅថា សម រង្ស៊ី ជាត្លុករបស់អ្នកសារព័ត៌មានប៉ុណ្ណោះ»។
លោក George Edgar ឯកអគ្គរដ្ឋទូតសហភាពអឺរ៉ុបប្រចាំកម្ពុជា មិនទាន់ឆ្លើយតបសំណួររបស់ VOA ដែលបានផ្ញើជូនលោកតាមសារអេឡិចត្រូនិក ឬ Email នោះទេ មកដល់លា្ងចថ្ងៃសុក្រនេះ។
ចំណែកស្ថានទូតសហរដ្ឋអាមេរិកប្រចាំកម្ពុជា មិនឆ្លើយតបទៅនឹងសារអំពាវនាវរបស់លោកសម រង្ស៊ី អតីតប្រធានគណបក្សប្រឆាំងនោះទេ តែសហរដ្ឋអាមេរិករក្សាជំហរគាំទ្រមេដឹកនាំក្រុមប្រឆាំងគឺលោក Juan Guaidó។
អ្នកស្រី Emily Zeeberg អ្នកនាំពាក្យស្ថានទូតសហរដ្ឋអាមេរិកប្រចាំកម្ពុជា បានបញ្ជាក់ឲ្យ VOA ដឹងតាមសារអេឡិចត្រូនិក ឬ Email នៅថ្ងៃសុក្រនេះថា សហរដ្ឋអាមេរិកទទួលស្គាល់លោក Juan Guaidó ជាប្រធានាធិបតីស្តីទីរបស់ប្រទេសវ៉េណេស៊ុយអេឡា។ អ្នកស្រីបានបន្តថា សភាវ៉េណេស៊ុយអេឡា ក្នុងតួនាទីស្របច្បាប់របស់ខ្លួន បានប្រើអំណាចរដ្ឋធម្មនុញ្ញដើម្បីប្រកាសថា របបលោក Nicolas Maduro ជារបបខុសច្បាប់។ ដោយហេតុនេះ ការិយាល័យប្រធានាធិបតេយ្យត្រូវនៅទំនេរ។
អ្នកស្រីបានបន្តថា ប្រជាជនវ៉េណេស៊ុយអេឡាបាននិយាយយ៉ាងក្លាហានប្រឆាំងនឹងលោក Maduro និងរបបរបស់គាត់ ហើយទាមទារ «សេរីភាព និងនីតិរដ្ឋ»។
អ្នកស្រី Emily Zeeberg បានសរសេរជាភាសាអង់គ្លេស និងត្រូវបានប្រែសម្រួលជាភាសាខ្មែរក្នុងន័យដើមថា៖
«យើងនឹងបន្តប្រើអានុភាពការទូតនិងដាក់ទម្ងន់នៃសេដ្ឋកិច្ចរបស់សហរដ្ឋអាមេរិកដើម្បីជំរុញបន្ថែមឲ្យមានការស្ដារឡើងវិញនូវលទ្ធិប្រជាធិបតេយ្យក្នុងប្រទេសវ៉េណេស៊ុយអេឡា។ យើងនឹងនៅតែដាក់របបមិនស្របច្បាប់របស់ Maduro ក្នុងការទទួលខុសត្រូវលើការគំរាមកំហែងណាមួយចំពោះសុវត្ថិភាពរបស់ប្រជាជនវ៉េណេស៊ុយអេឡា»។
អ្នកស្រីបានបន្ថែមថា៖
«ទង្វើទាំងនេះនឹងរារាំងមិនឲ្យលោក Maduro និងមន្រ្តីពុករលួយផ្សេងទៀតបំប៉នខ្លួនឯងដែលបង្កឲ្យប្រជាជនវ៉េណេស៊ុយអេឡារងគ្រោះយូរអង្វែង។ វានឹងរក្សាទ្រព្យសម្បត្តិជាតិរបស់វ៉េណេស៊ុយអេឡាសម្រាប់ប្រជាជន និងរដ្ឋាភិបាលដែលជាប់ឆ្នោតតាមលទ្ធិប្រជាធិបតេយ្យ។ សហរដ្ឋអាមេរិកនឹងបន្តចាត់វិធានការជាក់លាក់ប្រឆាំងនឹងអ្នកដែលប្រឆាំងនឹងការប្រឹងប្រែងស្តារលទ្ធិប្រជាធិបតេយ្យឡើងវិញដោយសន្តិវិធីនៅក្នុងប្រទេសវ៉េណេស៊ុយអេឡា និងប្រឆាំងនឹងអ្នកដែលបម្រើប្រយោជន៍ខ្លួនឯងជាជាងប្រយោជន៍របស់រាស្រ្ត»៕