កាលពីថ្ងៃអង្គារមហាគណៈវិនិច្ឆ័យសហព័ន្ធមួយបានចោទប្រកាន់ជាផ្លូវការស្ត្រីរុស្សីមា្នក់ពីបទរួមគំនិតប្រព្រឹត្តអំពើទុច្ចរិតប្រឆាំងនឹងស.រ.អា.និងពីបទធ្វើការដោយខុសច្បាប់ជាភ្នាក់ងារម្នាក់របស់រដ្ឋាភិបាលបរទេសដោយទាក់ទិនជាមួយគម្រោងការណ៍សម្ងាត់មួយដើម្បីឱ្យមានឥទ្ធិពលលើវិស័យនយោបាយអាមេរិកាំងនៅមុនការបោះឆ្នោតប្រធានាធិបតីស.រ.អា.កាលពីឆ្នាំ២០១៦។
អ្នកស្រី Maria Butina អ្នកការពារសិទ្ធិខាងការមានកាំភ្លើងដែលមានចំណងទាក់ទងជិតស្និទ្ធជាមួយសមាគមកាំភ្លើងវែងជាតិភាសាអង់គ្លេសហៅថា National Rifle Association ហៅកាត់ថា NRA បានត្រូវចាប់ខ្លួនកាលពីថ្ងៃអាទិត្យពីបទចោទប្រកាន់ថាបម្រើការជាភ្នាក់ងារមិនចុះឈ្មោះម្នាក់របស់រដ្ឋាភិបាលបរទេសមួយនៅខាងក្នុងស.រ.អា.ដោយមិនបានប្រាប់រដ្ឋមន្ត្រីយុត្តិធម៌អាមេរិកាំងដូចដែលមានតម្រូវតាមច្បាប់។ការចោទប្រកាន់ទីពីរបានត្រូវបន្ថែមនៅក្នុងការចោទប្រកាន់ជាផ្លូវការដែលបានត្រូវប្រកាសកាលពីថ្ងៃអង្គារ។
អ្នកស្រី Butina អាយុ២៩ឆ្នាំ បានត្រូវចោទប្រកាន់ពីបទធ្វើការដោយសម្ងាត់ដើម្បីអភិវឌ្ឍទំនាក់ទំនងផ្ទាល់ខ្លួនជាមួយពួកអាមេរិកាំងមានឥទ្ធិពលនិងជ្រៀតចូលទៅក្នុងអង្គការនយោបាយដូចជាសមាគម NRA ជាដើមក្នុងគោលបំណងជំរុញផលប្រយោជន៍រុស្សីនៅក្នុងស.រ.អា.។
បើតាមការចោទប្រកាន់ជាផ្លួវការនេះថាអ្នកស្រី Butina បានធ្វើគម្រោងការសម្ងាត់នេះតាមការណែនាំនៃមន្ត្រីជាន់ខ្ពស់ម្នាក់របស់រដ្ឋាភិបាលរុស្សី។ សេចក្តីថ្លែងជាលាយលក្ខណ៍អក្សរមិនបានបង្ហាញឈ្មោះមន្ត្រីរុស្សីដែលអ្នកស្រីធ្វើការឱ្យនោះទេ ក៏ប៉ុន្តែការពណ៌នាអំពីមន្ត្រីនេះត្រូវគ្នានឹងភិនភាគលោក Alexander Torshin អភិបាលរងម្នាក់នៃធនាគារកណ្តាលរុស្សីនិងជាអតីតសមាជិកម្នាក់នៃព្រឹទ្ធសភារុស្សីខាងគណបក្ស United Russia របស់ប្រធានាធិបតី Vladimir Putin។
អ្នកស្រី Butina និងលោក Torshin បានបង្កើតអង្គការសិទ្ធិកាន់កាំភ្លើងដែលជាអង្គការលម្អៀងទៅខាងការប្រើប្រាស់កាំភ្លើងដោយយកគម្រូតាមសមាគម NRA របស់ស.រ.អា.កាលពីឆ្នាំ២០១២។
បើតាមគណនីបណ្តាញសង្គមរបស់ជនជាតិរុស្សីទាំងពីរនាក់នេះថាលោក Torshin បានក្លាយជាសមាជិកមួយជីវិតនៃសមាគម NRA ហើយជនទាំងពីរនាក់នេះបានចូលរួមជាទៀងទាត់ដល់ការប្រជុំប្រចាំឆ្នាំនៃក្រុមការពារសិទ្ធិខាងការមានកាំភ្លើងនៅក្នុងស.រ.អា.កាលពីប៉ុន្មានឆ្នាំមុននេះ។
ពួករដ្ឋអាជ្ញាស.រ.អា.បានចោទប្រកាន់ថាអ្នកស្រី Butina បានស្វះស្វែងឱ្យមានចំណងទាក់ទងជិតស្និទ្ធជាមួយសមាគម NRA ជាវិធីមួយដើម្បីជ្រៀតចូលទៅក្នុងគណបក្សសាធារណរដ្ឋនៅក្នុងការបោះឆ្នោតប្រធានាធិបតីស.រ.អា.កាលពីឆ្នាំ២០១៦។ បើតាម email មួយពីអ្នកស្រី Butina ដែលបានត្រូវស្ទាក់ដោយ FBI និងបានត្រូវនិយាយយោងនៅក្នុងការចោទប្រកាន់ជាផ្លូវការនេះថាគោលដៅគឺធ្វើឱ្យផ្លាស់ប្តូរអ្វីដែលរុស្សីបានឃើញថាជាគោលនយោបាយ«អវិជ្ជមាននិងគឃ្លើន» របស់គណបក្សសាធារណរដ្ឋចំពោះប្រទេសរុស្សី៕