ខណៈអង្ករបានឡើងថ្លៃចន្លោះពី២០០រៀល ទៅ៥០០រៀលក្នុងមួយគីឡូក្រាម ពលរដ្ឋមួយចំនួនក្នុងរាជធានីភ្នំពេញបានត្អូញត្អែរថា ការឡើងថ្លៃនេះកាន់តែធ្វើឱ្យប៉ះពាល់ដល់ជីវភាពរបស់ពួកគេ ខណៈតម្លៃសាំង និងទំនិញផ្សេងទៀតក៏កំពុងឡើងថ្លៃ។
កំពុងអង្គុយក្នុងតូបលក់អង្ករ អ្នកស្រី សែន សុខថៃ អាយុ ៦៣ឆ្នាំ ជាអ្នកលក់អង្ករនៅផ្សារបឹងកេងកង ក្នុងរាជធានីភ្នំពេញ ប្រាប់វីអូអេថា អង្ករសឹងតែគ្រប់ប្រភេទទាំងអស់ឡើងថ្លៃចន្លោះពី២០០រៀល ទៅ៥០០រៀលក្នុងមួយគីឡូក្រាម ចាប់តាំងពីខែកក្កដាមក។ អ្នកស្រីថា ការឡើងថ្លៃអង្ករនេះគឺមកពីទិន្នផលស្រូវក្នុងខែនេះ ពុំសូវមានច្រើនដូចខែមុនៗ។
អ្នកស្រីនិយាយថា៖ «បើនិយាយទៅប្រហែល១ខែមុនវាឡើង គ្រប់ប្រភេទតែម្តង។ និយាយទៅពីមុនដូចជា [អង្ករ] នាងមិញអ៊ីចឹង យើងលក់ចេញតែ២ពាន់ ២ពាន់បី(រយ) ឥឡូវដល់លក់២ពាន់៥ [រយរៀល] បានយើងលក់បាន»។
អ្នកស្រីបន្ថែមទៀតថា នៅពេលអង្ករឡើងថ្លៃបែបនេះអ្នកស្រីក៏ពិបាកក្នុងការលក់ដូរផងដែរ។
អ្នកស្រីលើកឡើងថា៖ «ទីផ្សារវាឡើងថ្លៃអ៊ីចឹងហើយ យើងប្រាប់ម៉ូយតាមហ្នឹងទៅ។ ម៉ូយខ្លះទៅក៏យល់ចិត្តយើងក៏យកទៅ ខ្លះទៅក៏សាញ [អត់ទិញ] អ៊ីចឹងដែរ វាមិនមែនចេះតែស្រួលលក់ទាំងអស់ទេ ពេលឡើងអ៊ីចឹងទៅ»។
អ្នកលក់អង្កររូបនេះបន្តថា ភាគច្រើនអង្ករនៅតាមទីផ្សារជាពិសេសក្នុងរាជធានីភ្នំពេញមានកាឡើងថ្លៃពីមួយកម្រិតទៅមួយកម្រិត ប៉ុន្តែអ្នកស្រីថា បើតម្លៃស្រូវរបស់កសិករវិញហាក់ចុះថោកទៅវិញ។
អ្នកស្រីថា៖ «និយាយទៅការចង់បាន យើងអ្នកលក់ចង់បានថោកប៉ុន្តែយើងចង់មិនបានដូចចិត្ត។ តម្លៃស្រូវអង្ករវាឡើងប៉ុណ្ណឹងវាមិនសំខាន់ទេ សម្រាប់កសិករគ្នាធ្វើគ្នាបានហត់នឿយហើយបានតិច។ ហើយគ្នាលក់វិញជួនកាល អ្នកស្រែបើខ្ញុំមានបងប្អូនធ្វើស្រែវិញថា អង្ករឡើងថ្លៃតែអ្នកដែលនៅភ្នំពេញទេ ប៉ុន្តែអ្នកដែលនៅទិញស្រូវនៅឯណោះមិនសូវបានឡើងទេ»។
ចំណែកអ្នកស្រី ថៃ ចាន់ធី អាយុ៤៨ឆ្នាំប្រាប់វីអូអេថា ស្របពេលដែលអង្ករឡើងថ្លៃនេះបានធ្វើឱ្យអ្នកស្រីជួបការលំបាកក្នុងការរកស៊ី ដោយអ្នកស្រីថាទំនិញសព្វថ្ងៃគឺមានការឡើងថ្លៃច្រើន។
អ្នកស្រីថ្លែងថា៖ «ពិបាកការរកស៊ី ឥឡូវវារកអីក៏វារៀងតឹងជាងមុន ហើយរបស់[របរ] ឡើងថ្លៃទាំងអស់ លក់អត់បានទេ។ ទើបតែខែនេះហ្នឹងគេថាឡើងថ្លៃ មុនយើងទិញ[មួយបេ] តែ១១ម៉ឺន[រៀល] ឥឡូវឡើងដល់ ១២ម៉ឺនអ៊ីចឹងហាស»។
ខណៈចំណូលមានការធ្លាក់ចុះ អ្នកស្រីថៃ ចាន់ធី ចង់ឲ្យតម្លៃអង្ករក៏ដូចជាទំនិញផ្សេងៗទៀតមានការថយជាងមុន។
អ្នកស្រីថា៖ «ឱ្យអង្ករចុះថោក និយាយរួមទំនិញអីទាំងអស់ឱ្យវាចុះថោក រៀងធូរថ្លៃបន្តិចទៅ។ យើងប្រកបរបររកស៊ី របស់ឡើងថ្លៃទៅយើងពិបាករកឥឡូវ។ អ្នករកលុយក៏ពិបាករកដែរ»។
ស្រដៀងគ្នានេះ លោកយី យ៉ុន អាយុ៥៥ឆ្នាំ ជាអ្នករត់រម៉កកង់បីប្រាប់វីអូអេដែរថា សព្វថ្ងៃនេះ លោកពិបាកក្នុងការផ្គត់ផ្គង់ការចំណាយក្នុងជីវភាពប្រចាំថ្ងៃ ដោយសារចំណូលពីរបររត់រម៉កកង់បីត្រូវធ្លាក់ចុះ ហើយស្របពេលដែលអង្ករក៏ឡើងថ្លៃ។
លោកបញ្ជាក់ថា៖ «រត់រម៉ករត់កង់បីនេះ គឺថាពិបាកមែនទែន យ៉ាប់មែនទែន រកមួយថ្ងៃអត់ចង់បាន១ម៉ឺនផងក្នុងមួយថ្ងៃ។ បើសិនជាចំណាយទៅលើថ្លៃទិញម្ហូបអាហារឬក៏ថាទិញបាយ ជួនកាលទិញអង្ករយកទៅដាំឬមួយក៏ថ្លៃចាក់សាំងអ៊ីចឹង គឺរត់អត់រួចទេខ្ញុំ។ ជួនកាល២ថ្ងៃ ទៅ៣ថ្ងៃអត់ទាន់បានសល់អី១ម៉ឺនទេ។ សូម្បីតែម៉ូយធ្លាប់ជិះលែងសូវមានជិះអ៊ីចឹងគឺថា យ៉ាប់មែនទែនពិបាកមែនទែន រកអត់សូវបានហើយត្រូវចំណាយច្រើន»។
ពួកគេចង់ឱ្យរដ្ឋាភិបាលទប់ស្កាត់តម្លៃអង្ករ និងទំនិញលើទីផ្សារ ដើម្បីជួយដល់ជីវភាពរស់នៅរបស់ប្រជាពលរដ្ឋដែលកំពុងប្រឈមបញ្ហាស្រាប់។
វីអូអេមិនទាន់អាចសុំការអត្ថាធិប្បាយពីលោក ប៉ែន សុវិជាតិ អនុរដ្ឋលេខាធិការនិងជាអ្នកនាំពាក្យក្រសួងពាណិជ្ជកម្ម និងអ្នកនាំពាក្យក្រសួងកសិកម្ម កញ្ញា អ៊ឹម រចនា បាននៅឡើយទេ គិតត្រឹមល្ងាចថ្ងៃពុធនេះ។
ការត្អូញត្អែររបស់អាជីវករ និងពលរដ្ឋទាំងនេះ ធ្វើឡើងខណៈដែលតម្លៃទំនិញលើទីផ្សារបន្តកើនឡើង ជាពិសេសតម្លៃប្រេងសាំងដែលជាទំនិញចាំបាច់ក្នុងជីវភាពរស់នៅរបស់ប្រជាពលរដ្ឋ ក៏ឡើងថ្លៃជាបន្តបន្ទាប់។
អគ្គលេខាធិការសហព័ន្ធស្រូវអង្ករកម្ពុជា លោក លន់ យ៉េង ប្រាប់វីអូអេនៅថ្ងៃពុធនេះថា នាពេលបច្ចុប្បន្ននេះ តម្លៃអង្ករនៅលើទីផ្សារឡើងថ្លៃ ដោយសារការប្រមូលផលស្រូវដើមដៃមិនទាន់ផ្គត់ផ្គង់គ្រប់តម្រូវប្រើប្រាស់។ ប៉ុន្តែលោកថា តម្លៃអង្ករនឹងចុះថ្លៃមកវិញបន្តិចនៅពេលដែលប្រជាកសិករចាប់ផ្តើមប្រមូលផលស្រូវបានច្រើន។
លោកបញ្ជាក់ថា៖ «ស្រូវឥឡូវនេះ គាត់ទើបតែដល់ដំបូងតិចៗគឺថាវាអត់ទាន់ដល់ពេញ ដល់ពេញចុងខែ៨ អី។ អ៊ីចឹងធម្មតាបរិមាណផ្គត់ផ្គង់តិចតម្រូវការច្រើនតម្លៃវាឡើងថ្លៃ។ នៅពេលការប្រមូលផលច្រើនទៅ...អ៊ីចឹងតម្លៃវានឹងវិលត្រឡប់មកវិញ ស្រូវចុះថោកអង្ករក៏វាចុះថោកដែរ»។
យ៉ាងយូរចុងខែសីហាខាងមុខនេះបូករួមប្រទេសវៀតណាម ក៏នឹងប្រមូលផលស្រូវស្របពេលជាមួយគ្នានឹងកម្ពុជា ដែលធ្វើឱ្យការនាំចេញ និងតម្លៃស្រូវនឹងធ្លាក់ចុះបន្តិចវិញ។
កាលពីថ្ងៃទី៧ ខែសីហា ឆ្នាំ២០២៣ នៅក្នុងខេត្តមួយចំនួន ដូចជានៅខេត្តកំពង់ធំ ខេត្តកំពង់ឆ្នាំង ខេត្តតាកែវ ខេត្តព្រៃវែង ខេត្តពោធិ៍សាត់ ខេត្តបន្ទាយមានជ័យ និងខេត្តបាត់ដំបង គឺតម្លៃស្រូវ លក់ចេញក្នុងតម្លៃ១២០០រៀល ទៅ១៣០០រៀលក្នុងមួយគីឡូក្រាម។ នេះបើតាមសហព័ន្ធស្រូវអង្ករកម្ពុជា ដែលបានផ្សព្វផ្សាយលើគណនីហ្វេសប៊ុក កាលពីថ្ងៃទីចន្ទ ទី៧ ខែសីហានេះ។
បើតាមតម្លៃស្រូវសើមក្នុងខែសីហានេះ គឺមានតម្លៃខ្ពស់ជាងក្នុងខែកក្កដា ព្រោះនៅថ្ងៃទី៧ ខែកក្កដា តម្លៃស្រូវសើម ក្នុងខេត្តទាំងនោះ ទទួលបានតម្លៃចន្លោះពី១០០០រៀល ទៅ១១០០រៀល ក្នុងមួយគីឡូក្រាម។ នេះបើតាមព័ត៌មានរបស់សហព័ន្ធស្រូវអង្ករ៕