ប្រធានាធិបតីសហរដ្ឋអាមេរិកលោក Donald Trump ត្រូវគេរំពឹងថានឹងចុះហត្ថលេខាលើបទបញ្ជាប្រធានាធិបតីថ្មីមួយទាក់ទងនឹងបញ្ហាអន្តោប្រវេសន៍ និងការធ្វើដំណើរចូលមកក្នុងទឹកដីសហរដ្ឋអាមេរិក នៅថ្ងៃច័ន្ទស្អែកនេះ បន្ទាប់ពីតុលាការសហព័ន្ធមិនគាំទ្រចំពោះបទបញ្ជារបស់លោក Donald Trump ពាក់ព័ន្ធនឹងការធ្វើដំណើរនេះកាលពីលើកមុន។ នេះបើតាមការបញ្ជាក់របស់ប្រព័ន្ធផ្សព្វផ្សាយនៅក្នុងសហរដ្ឋអាមេរិក។
ខ្លឹមសារលម្អិតរបស់បទបញ្ជាថ្មីនេះមិនទាន់ត្រូវបានប្រកាសឲ្យដឹងនោះទេ គិតមកត្រឹមល្ងាចថ្ងៃសៅរ៍ម្សិលមិញនេះ។ ប៉ុន្តែ កាលពីដើមសប្ដាហ៍នេះ ទីភ្នាក់ងារសារព័ត៌មាន AP បានរាយការណ៍ថា បទបញ្ជារារាំងការធ្វើដំណើរថ្មីនេះ បានដកប្រទេសអ៊ីរ៉ាក់ចេញពីបញ្ជីប្រទេសដែលមានប្រជាជនកាន់សាសនាឥស្លាមច្រើនបំផុតទាំង ៧ ប្រទេស ដែលបទបញ្ជានេះផ្ដោតលើនោះ។
តុលាការសហព័ន្ធបានរារាំងបទបញ្ជាហាមឃាត់ការធ្វើដំណើររបស់រដ្ឋបាលលោកប្រធានាធិបតី Donald Trump កាលពីលើកមុន ដែលបទបញ្ជានេះមានគោលបំណងរារាំងជាបណ្ដោះអាសន្នចំពោះជនជាតិមកពីប្រទេសចំនួន ៧ ដូចជាប្រទេសអ៊ីរ៉ាក់ អ៊ីរ៉ង់ លីប៊ី សូម៉ាលី ស៊ូដង់ ស៊ីរី និងយេម៉ែន មិនឲ្យចូលមកក្នុងទឹកដីសហរដ្ឋអាមេរិក។ បទបញ្ជានេះក៏បង្អាក់ដល់កម្មវិធីជនភៀសខ្លួនរបស់សហរដ្ឋអាមេរិកផងដែរ។
លោក Trump បានលើកយកបញ្ហាព្រួយបារម្ភផ្នែកភេរវកម្មមកធ្វើជាមូលហេតុចម្បងសម្រាប់ការចុះហត្ថលេខាលើការហាមឃាត់ការធ្វើដំណើរបណ្ដោះអាសន្ននេះ។
ទោះបីជាបទបញ្ជាប្រធានាធិបតីនេះមិនទទួលបានការគាំទ្រខ្លាំងក្លានៅឯបរទេសក៏ដោយ ក៏ទទួលបានការគាំទ្រពីប្រជាពលរដ្ឋអាមេរិកាំងប្រហែលពាក់កណ្ដាលផងដែរ។ នេះបើតាមការស្ទង់មតិនានា ដែលបានចេញផ្សាយភ្លាមៗ បន្ទាប់ពីបទបញ្ជានេះត្រូវបានណែនាំមក៕