ប្រធានាធិបតីរុស្ស៊ីលោក Vladimir Putin កាលពីថ្ងៃព្រហស្បតិ៍បានថ្លែងថា លោកបានត្រៀមខ្លួនរួចរាល់ដើម្បីចរចារឿងសង្គ្រាមអ៊ុយក្រែនក្នុងករណីមានការពិភាក្សាកើតឡើងជាមួយប្រធានាធិបតីជាប់ឆ្នោតអាមេរិកលោក Donald Trump អំពីការបញ្ចប់សង្គ្រាម និងគ្មានលក្ខខណ្ឌក្នុងការចាប់ផ្តើមពិភាក្សាជាមួយអាជ្ញាធរអ៊ុយក្រែននោះទេ។
លោក Trump ដែលហៅខ្លួនឯងថាជាអ្នកពូកែចរចានិងជាអ្នកនិពន្ធសៀវភៅ « Trump: the Art of the Deal» បោះពុម្ពឆ្នាំ១៩៨៧ បានប្តេជ្ញាបញ្ចប់ជម្លោះយ៉ាងឆាប់រហ័ស ប៉ុន្តែលោកមិនទាន់បានប្រាប់លម្អិតថាតើលោកនឹងសម្រេចទៅបានដោយរបៀបណានៅឡើយទេ។
លោក Putin ដែលឆ្លើយសំណួរលើទូរទស្សន៍រដ្ឋក្នុងអំឡុងកម្មវិធីសំណួរចម្លើយជាមួយរុស្ស៊ី បានប្រាប់អ្នកសារព័ត៌មានអាមេរិកមួយថា លោកត្រៀមខ្លួនជាស្រេចដើម្បីជួបលោក Trump ដែលលោកថាលោកមិនបាននិយាយជាមួយជាច្រើនឆ្នាំមកហើយ។
ពេលត្រូវបានសាកសួរថាតើលោកប្រហែលអាចផ្តល់អ្វីដល់លោក Trump លោក Putin ច្រានចោលការអះអាងដែលថារុស្ស៊ីស្ថិតក្នុងស្ថានភាពទន់ខ្សោយ ដោយនិយាយថា រុស្ស៊ីកាន់តែខ្លាំងជាងមុន តាំងពីខ្លួនបានបញ្ជាទ័ពឱ្យវាយអ៊ុយក្រែនក្នុងឆ្នាំ២០២២។
បន្ទាប់ពីបាននិយាយថាកងកម្លាំងរុស្ស៊ីបានរុលទៅមុខនៅសមរភូមិទាំងស្រុងនោះ លោក Putin បានថ្លែងថា ខ្លួនកំពុងឆ្ពោះទៅសម្រេចគោលដៅចម្បងរបស់ខ្លួននៅអ៊ុយក្រែន។ លោកថ្លែងថា៖«យើងតែងនិយាយថាយើងត្រៀមខ្លួនរួចរាល់ដើម្បីចរចានិងសម្រួលគ្នា»។
លោកបន្ថែមថា៖«ក្នុងពេលឆាប់ៗ ខ្ញុំគិតថាពលរដ្ឋអ៊ុយក្រែនដែលចង់វាយប្រយុទ្ធនឹងលែងមាន។ ឆាប់ៗខាងមុខ នឹងមិនមានអ្នកចង់ចេញប្រយុទ្ធទៀតទេ។ យើងត្រៀមខ្លួនរួចរាល់ ប៉ុន្តែភាគីម្ខាងទៀតក៏ត្រូវត្រៀមខ្លួនសម្រាប់ការចរចានិងសម្រួបសម្រួលផងដែរ»។
ទីភ្នាក់ងារសារព័ត៌មាន Reuters បានរាយការណ៍កាលពីខែមុនថា លោក Putin បើកចំហក្នុងការពិភាក្សាអំពីកិច្ចព្រមព្រៀងបទឈប់បាញ់ជាមួយលោក Trump ប៉ុន្តែលើកឡើងថា លោកច្រានចោលការធ្វើសម្បទានទឹកដីធំៗណាមួយ និងបានទទូចឱ្យអ៊ុយក្រែនបោះបង់ចោលមហិច្ឆតាចូលជាសមាជិកអូតង់៕