ពលរដ្ឋរាប់សែននាក់រាប់ចាប់តាំងពីរដ្ឋញូវយ៉កប៉ែកខាងកើតរហូតដល់រដ្ឋកាលីហ្វ័រញ៉ាប៉ែកខាងលិច សហរដ្ឋអាមេរិក បាននាំគ្នាចុះតាមដងផ្លូវនានាក្នុងទីក្រុងធំៗរបស់អាមេរិក រយៈពេលបីថ្ងៃជាប់ៗគ្នាកាលពីថ្ងៃព្រហស្បតិ៍ម្សិលមិញដើម្បីសម្តែងការខកចិត្តរបស់ពួកគេ ទៅនឹងការបោះឆ្នោតឲ្យលោក ដូណាល់ ត្រាំ (Donald Trump) ក្លាយជាប្រធានាធិបតីទី៤៥របស់អាមេរិក។
បាតុកម្មជាច្រើន បានកើតឡើងតាំងពីទីក្រុង Portland នៃរដ្ឋ Oregon រហូតដល់រដ្ឋ Chicago និងNew York និងនៅតំបន់ជាច្រើនទៀតនៅចន្លោះរដ្ឋទាំងនេះ ដោយបាតុកម្មនីមួយៗ ទាក់ទាញអ្នកចូលរួមពីរបីរយនាក់ គឺតិចជាងបាតុកររាប់ពាន់នាក់ ដែលបានប្រមូលផ្តុំគ្នានៅក្នុងការតវ៉ានានា ក្រោយពីលទ្ធផលបង្ហាញច្បាស់ថា លោក ត្រាំ ជាអ្នកឈ្នះការបោះឆ្នោតប្រធានាធិបតីនេះ។
កាលពីយប់ថ្ងៃព្រហស្បតិ៍ លោក ត្រាំ បានសរសេរនៅក្នុងបណ្តាញTwitter ទៅកាន់ក្រុមបាតុករថា «ទើបតែមានការបោះឆ្នោតប្រធានាធិបតីដ៏បើកចំហ និងដ៏ជោគជ័យបំផុតមួយ។ ឥឡូវ បាតុករអាជីព ដែលប្រព័ន្ធផ្សព្វផ្សាយបានញុះញង់នោះ កំពុងនាំគ្នាតវ៉ា។ វាពិតជាមិនយុត្តិធម៌សោះ!»។
នៅក្នុងទីក្រុង Portland កាលពីយប់ថ្ងៃព្រហស្បតិ៍ មនុស្សម្នារាប់ពាន់នាក់ បានដើរតាមផ្លូវនានានៃទីក្រុង នៅពេលដែលការតវ៉ានោះ ចាប់ផ្ដើមមានអំពើហិង្សា ដោយមានមនុស្សវាយកម្ទេចបង្អួចហាង និងដុតផាវជាដើម។ នេះបើយោងតាមអាជ្ញាធរប៉ូលិស។
ប៉ូលិស បានប្រកាសថា ការតវ៉ានេះ គឺជាការបង្កចលាចល ហើយនិយាយថា មានមនុស្សដែលមានដំបងវាយកូនបាល់នៅក្នុងហ្វូងបាតុករ ហើយក៏បានប្រាប់មនុស្សម្នា ឲ្យបន្តដើរទៅមុខរហូត។
មន្ត្រីនៃមន្ទីរដឹកជញ្ជូនក្នុងរដ្ឋ Oregon បានបិទផ្នែកខ្លះនៃផ្លូវឆ្លងរដ្ឋលេខ៥ និងផ្លូវលេខ៨៤នៅក្នុងតំបន់នោះ ជាការបង្ការទុកជាមុន។
ចំណែកនៅឯទីក្រុង Denver នៃរដ្ឋ Coloradoវិញ ក្រុមបាតុករ បានបិទផ្លូវឆ្លងរដ្ឋលេខ២៥ នៅក្បែរទីប្រជុំជនDenver មួយរយៈពេលខ្លី កាលពីយប់ថ្ងៃព្រហស្បតិ៍។
ប៉ូលិសនៅក្នុងរដ្ឋDenver បានសរសេរតាមបណ្តាញ Twitter កាលពីម៉ោងប្រមាណ១០យប់ម្សិលមិញថា ក្រុមបាតករ បានឡើងទៅលើផ្លូវល្បឿនលឿន ហើយធ្វើឲ្យស្ទះចរាចរណ៍នៅលើផ្លូវនោះ។
ប៉ូលិស និយាយថា ផ្លូវឆ្លងរដ្ឋនោះ បានបើកឲ្យមានចរាចរណ៍ធម្មតាឡើងវិញ ប្រហែលជាកន្លះម៉ោងក្រោយមក នៅពេលដែលហ្វូងមនុស្សម្នា បានវិលត្រឡប់មកក្នុងតំបន់ទីប្រជុំជនវិញ៕