ព្រះអង្គម្ចាស់ នរោត្តម ចក្រាវុធ ជាបុត្រាច្បងរបស់ព្រះអង្គម្ចាស់ នរោត្តម រណឫទ្ធិ ត្រូវបានសមាជិករបស់គណបក្សហ៊្វុនស៊ិនប៉ិច ជ្រើសរើសឲ្យធ្វើជាព្រះប្រធានគណបក្សរាជានិយមមួយនេះ ក្នុងពេលធ្វើសមាជបក្សកាលពីព្រឹកថ្ងៃពុធ ក្នុងសង្កាត់វាលស្បូវ ខណ្ឌច្បារអំពៅ រាជធានីភ្នំពេញ។ នេះគឺជាការចាប់ផ្តើមជាផ្លូវការនូវដំណើរនយោបាយនៃអ្នកបន្តវេនរបស់គណបក្សរាជានិយមនេះ បន្ទាប់ពីសម្តេចក្រុមព្រះនរោត្តម រណឫទ្ធិ ដែលជាអតីតនាយករដ្ឋមន្រ្តីមួយរូបរបស់កម្ពុជាផងនោះ។
អង្គសមាជវិសាមញ្ញបក្សដែលមានគ្នាជាង៤០០នាក់ បានសម្រេចជ្រើសរើសជាឯកច្ឆន្ទឱ្យព្រះអង្គម្ចាស់ ចក្រាវុធធ្វើជាព្រះប្រធានបក្ស និងបានជ្រើសតាំងអនុប្រធានបក្សចំនួនបីរូបគឺលោក ឆឹង ចំរើន លោក ប៉ោ ប៊ុនស៊្រឺនិងលោកពៅ អៀងគ្រី។ គណបក្សបានរៀបចំឲ្យមាន សមាជិកគណៈកម្មការនាយកគណបក្សចំនួន៥៤រូបផងដែរ។
ព្រះអង្គម្ចាស់នរោត្តម ចក្រាវុធមានព្រះបន្ទូលទៅកាន់ថ្នាក់ដឹកនាំ និងសមាជិកសមាជិកាគណបក្សថា ព្រះអង្គប្តេជ្ញាការពារការរស់រានមានជីវិតរបស់គណបក្សរាជានិយមហ៊្វុនស៊ិនប៉ិចនៅក្នុងប្រទេស។
«ខ្ញុំក្នុងឋានៈជាព្រះប្រធានគណបក្ស ខ្ញុំសូមប្រកាសជាឱឡារិកនៅចំពោះមុខអង្គសមាជវិសាមញ្ញដ៏ឧត្តុង្គឧត្តមថា ខ្ញុំនៅការពារគណបក្សហ៊្វុនស៊ិនប៉ិចឲ្យគង់វង្សជាអមតៈ»។
សមាជិកសមាជិកាគណបក្សមកពី២៥រាជធានីខេត្ត ចូលរួមបោះឆ្នោត ក្នុងសមាជវិសាមញ្ញរបស់បក្ស រៀបចំឡើងនៅថ្ងៃទី០៩ ខែកុម្ភៈ ឆ្នាំ២០២២ក្នុងខណ្ឌច្បារអំពៅ ទីក្រុងភ្នំពេញ។ (ហ៊ុល រស្មី/វីអូអេ)
ក្នុងការថ្លែងសារនយោបាយទៅកាន់ថ្នាក់ដឹកនាំ និងសមាជិកសមាជិកាបក្ស ព្រះអង្គម្ចាស់នរោត្តម ចក្រាវុធមានព្រះបន្ទូលបន្ថែមថា ព្រះអង្គនឹងដង្ហែតាមព្រះរាជមាគ៌ានយោបាយក្នុងការបង្រួបបង្រួមជាតិរបស់ព្រះអយ្យកោ និងព្រះបិតារបស់ព្រះអង្គ គឺព្រះអង្គម្ចាស់នរោត្តម រណឫទ្ធិ អតីតព្រះប្រធានគណបក្សហ៊្វុនស៊ិនប៉ិច។ ព្រះអង្គក៏ប្តេជ្ញាប្រមូលកម្លាំងអ្នកគាំទ្រគណបក្ស ដើម្បីធ្វើឲ្យគណបក្សរាជានិយមមួយនេះ ទទួលជោគជ័យជាថ្មីម្តងទៀត លើឆាកនយោបាយកម្ពុជា។
ព្រះអង្គម្ចាស់មានព្រះបន្ទូលថា៖ «ដើម្បីគោរពថ្វាយ ព្រះគុណូបការៈរបស់សម្តេចក្រុមព្រះនរោត្តម រណឫទ្ធិ អតីតព្រះប្រធានគណបក្សហ៊្វុនស៊ិនប៉ិច ខ្ញុំនឹងខិតខំប្រមែប្រមូលអតីតអ្នករាជានិយម សីហនុនិយម រណឫទ្ធិនិយម ដើម្បីគណបក្សទទួលបានជោគជ័យសាជាថ្មី»។
ការឡើងធ្វើជាព្រះប្រធានគណបក្សរាជានិយមហ៊្វុនស៊ិនប៉ិចរបស់ព្រះអង្គម្ចាស់ចក្រាវុធកើតមានឡើងក្រោយការសោយទិវង្គតរបស់បិតាព្រះអង្គគឺព្រះអង្គម្ចាស់នរោត្តម រណឫទ្ធិកាលពីចុងខែវិច្ឆិកា ឆ្នាំ២០២១នៅប្រទេសបារាំង ក្នុងជន្មាយុ៧៧ព្រះវស្សា។
ដំណើរនយោបាយរបស់ព្រះអង្គម្ចាស់ចក្រាវុធ បានចាប់ផ្តើមជាមួយនឹងការវិវឌ្ឍចុងក្រោយដ៏គួរឲ្យកត់សម្គាល់នៃស្ថានការណ៍នយោបាយក្នុងប្រទេស ខណៈគណបក្សប្រឆាំងសំខាន់មួយគឺគណបក្សភ្លើងទៀន ដែលកាលពីមុនមានឈ្មោះជាគណបក្សសម រង្ស៊ី បានកម្រើកឡើងវិញ និងការបង្កើតគណបក្សថ្មីៗមួយចំនួនទៀត ដែលជាការផ្ចុងផ្តើមចេញពីអតីតតំណាងរាស្ត្រគណបក្សសង្គ្រោះជាតិ។
អ្នកនាំពាក្យគណបក្សរាជានិយមហ៊្វុនស៊ិនប៉ិច លោក ញឿន រ៉ាដែន ថ្លែងជាមួយអ្នកសារព័ត៌មាននៅក្នុងព្រះរាជដំណាក់វាលស្បូវ ខណ្ឌច្បារអំពៅ ទីក្រុងភ្នំពេញ ថ្ងៃទី៩ ខែកុម្ភៈ ឆ្នាំ២០២២។(ហ៊ុល រស្មី/វីអូអេ)
អ្នកនាំពាក្យគណបក្សរាជានិយមហ៊្វុនស៊ិនប៉ិច លោក ញឿន រ៉ាដែន ជឿថា គណបក្សហ៊្វុនស៊ិនប៉ិចនឹងទទួលបានការគាំទ្រពីប្រជាពលរដ្ឋមកវិញក្នុងការបោះឆ្នោតក្រុមប្រឹក្សាឃុំសង្កាត់ដែលនឹងប្រព្រឹត្តទៅនៅថ្ងៃទី៥ ខែមិថុនា ឆ្នាំ២០២២ ហើយលោកមានសុទិដ្ឋិនិយមថា គណបក្សនឹងទទួលបានអាសនៈសភានៅឆ្នាំ២០២៣ផងដែរ ក្រោមការដឹកនាំរបស់ព្រះអង្គម្ចាស់នរោត្តម ចក្រាវុធដែលជាឈាមថ្មីនៃកម្លាំងរាជានិយម និងជាបណ្ឌិតបញ្ចប់ការសិក្សានៅប្រទេសបារាំង។
«យើងមិនត្រឹមតែសង្ឃឹមទទួលបាននូវអាសនៈក្នុងការជ្រើសរើសក្រុមប្រឹក្សាឃុំសង្កាត់ទេ យើងអាចទទួលនូវសំឡេងនៅក្នុងរដ្ឋសភានៅឆ្នាំ២០២៣ខាងមុខដែរ»។
ព្រះអង្គម្ចាស់នរោត្តម ចក្រាវុធ បដិសេធមិនផ្តល់ការអត្ថាធិប្បាយដល់អ្នកសារព័ត៌មានទេ ក្រោយព្រះអង្គត្រូវបានបោះឆ្នោតជាប់ធ្វើជាព្រះប្រធានគណបក្ស។
ក្នុងពេលធ្វើសមាជវិសាមញ្ញ កាលពីថ្ងៃព្រឹកថ្ងៃពុធដដែលនោះ គណបក្សហ៊្វុនស៊ិនប៉ិច បានឲ្យដឹងពីគោលនយោបាយស្នូល៩ចំណុច ដើម្បីចូលរួមចំណែកក្នុងវិស័យនយោបាយនៅកម្ពុជា ក្នុងនោះគឺមានគោលនយោបាយបង្រួបបង្រួមជាតិ ការបន្តកិច្ចសហប្រតិបត្តិការជាមួយគណបក្សដៃគូផ្សេងទៀត ការការពារបូរណភាពទឹកដី និងការជំរុញឲ្យកម្ពុជាមាននីតិរដ្ឋពិតប្រាកដ។
អ្នកវិភាគនយោបាយលោក សេង សារី យល់ថាវត្តមានរបស់ព្រះអង្គម្ចាស់នរោត្តម ចក្រាវុធ នឹងមិនអាចធ្វើឲ្យកម្លាំងរាជានិយមងើបឡើងខ្លាំងមកវិញទេ ប្រសិនបើគណបក្សនេះមិនមានភាពសកម្មក្នុងការចុះជួបប្រាស្រ័យទាក់ទងជាមួយប្រជាពលរដ្ឋ និងដោះស្រាយទុក្ខលំបាករបស់ប្រជាពលរដ្ឋនោះ។
លោកប្រាប់វីអូអេថា៖ «ក៏ប៉ុន្តែការប្រឹងប្រែងរបស់ព្រះអង្គនឹងអាចធ្វើឲ្យរបបរាជានិយមរស់ឡើងវិញ។ បើសិនជាករណីវត្តមានរបស់ព្រះអង្គក្នុងនាមជាប្រធានគណបក្សហ៊្វុនស៊ិនប៉ិច មិនមានសកម្មភាពអីទេ អសកម្មដូចដែលមេដឹកនាំមុនៗទេ ខ្ញុំគិតថា គ្មានប្រយោជន៍ហ្នឹង អាចធ្វើឲ្យរបប[គណបក្ស] រាជានិយមអាចងើបឡើងវិញបានឡើយ»។
ព្រះអង្គម្ចាស់នរោត្តម ចក្រាវុធ មានព្រះរាជបន្ទូលទៅកាន់ថ្នាក់ដឹកនាំ និងសមាជិកសមាជិកា គណបក្សនៅក្នុងព្រះរាជដំណាក់វាលស្បូវ ខណ្ឌច្បារអំពៅ ទីក្រុងភ្នំពេញ ថ្ងៃទី៩ ខែកុម្ភៈ ឆ្នាំ២០២២។ (ហ៊ុល រស្មី/វីអូអេ)
ចំណែកអ្នកវិភាគនយោបាយមួយរូបទៀតគឺលោកឡៅ ម៉ុងហៃ ប្រាប់វីអូអេនៅថ្ងៃពុធថា ព្រះអង្គម្ចាស់នរោត្តម ចក្រាវុធ ទំនងជាត្រូវការពេលច្រើន ក្នុងការឆ្វេងយល់ពីរបបនយោបាយនៅកម្ពុជា ប្រសិនបើព្រះអង្គមិនទាន់បានជ្រាបនូវរបៀបរបបនៃការដឹកនាំរដ្ឋបច្ចុប្បន្ន។
លោកផ្តល់ការអត្ថាធិប្បាយក្នុងន័យដើមថា៖ «ជាពិសេសលោកត្រូវអត់ធន់ព្យាយាម និងក្លាហានននៀលពុះពារឧបសគ្គគ្រប់បែបយ៉ាង។ ហើយនេះជាវិញ្ញាសាសម្គាល់ថា លោកជាមនុស្សបែបណា ជាអ្នកនយោបាយដឹកនាំមួយរូប ស័ក្តិសមឲ្យប្រជារាស្ត្រខ្មែរគាំទ្រឬទេ»។
លោកបន្ថែមថា៖ «សុំសង្កត់ធ្ងន់ថា ប្រជារាស្ត្រខ្មែរចេះដឹងជាងមុន យល់ដឹងអំពីអ្នកនយាបាយ កិច្ចការសង្គម ជាតិនិងអន្តរជាតិច្រើន និងមានការរំពឹងទុកខ្ពស់និងច្រើនជាងមុនពីអ្នកនយោបាយ។ ពួកគេទាំងនោះលែងជាទំនិញសម្រាប់អ្នកនយោបាយទិញឲ្យគាំទ្រនិងបោះឆ្នោតឲ្យទៀតហើយ។ ហើយនេះឃើញជាក់ស្តែងក្នុងការបោះឆ្នោតឆ្នាំ២០១៣»។
លោកឡៅ ម៉ុងហៃ ផ្តល់ការកត់សម្គាល់ទៀតថា ព្រះអង្គម្ចាស់ ចក្រាវុធ ក៏អាចត្រូវការពេលវេលានិងមធ្យោបាយ ដើម្បីកសាងគុណសម្បត្តិឲ្យបានច្រើនស័ក្តិសមជាអ្នកនយោបាយដឹកនាំសង្គមខ្មែរ ចាប់ពីការនិយាយទាក់ទងជាភាសាខ្មែរឲ្យប្រជាពលរដ្ឋសាមញ្ញងាយស្តាប់បាន។ លោកបន្ថែមថា ព្រះអង្គម្ចាស់ក៏ត្រូវយល់ដឹងឲ្យច្បាស់ថា បារមីរបស់ក្សត្រ(royal aura)សាបរលាបសឹងអស់ទៅហើយ ជាពិសេសក្រោយពេលដែលបិតាព្រះអង្គបរាជ័យទាំងស្រុងក្នុងការគ្រប់គ្រងដឹកនាំប្រទេស និងគណបក្សហ៊្វុនស៊ិនប៉ិច។
ប៉ុន្តែសមាជិកគណបក្សមួយចំនួនយល់ថា ព្រះវត្តមានរបស់ព្រះអង្គម្ចាស់នរោត្តម ចក្រាវុធ អាចធ្វើឲ្យគណបក្សរាជានិយមមួយនេះ ទទួលបានអាសនៈឃុំសង្កាត់ក្នុងបោះឆ្នោតឃុំសង្កាត់នាពេលខាងមុខ និងថា មន្ត្រីគណបក្សរាជានិយមនឹងផ្តល់សេវារដ្ឋបាលសាធារណៈ ដោយមិនប្រកាន់និន្នាការនយោបាយនៅមូលដ្ឋាន។
លោកញ៉ែម សុខួយ អាយុ៥២ឆ្នាំ ប្រធានប្រតិបត្តិបក្សហ៊្វុនស៊ិនប៉ិចខេត្តស្ទឹងត្រែង និយាយជាមួយអ្នកកាសែត នៅក្នុងព្រះរាជដំណាក់វាលស្បូវ ខណ្ឌច្បារអំពៅ ទីក្រុងភ្នំពេញ ថ្ងៃទី៩ ខែកុម្ភៈ ឆ្នាំ២០២២។(ហ៊ុល រស្មី/វីអូអេ)
លោកញ៉ែម សុខួយ អាយុ៥២ឆ្នាំ ប្រធានប្រតិបត្តិគណបក្សហ៊្វុនស៊ិនប៉ិចខេត្តស្ទឹងត្រែង និយាយថា ក្រោមការដឹកនាំរបស់ព្រះអង្គម្ចាស់ចក្រាវុធ គណបក្សហ៊្វុនស៊ិនប៉ិចអាចប្រមូលសំឡេងគាំទ្រនៅក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់ឆ្នាំ២០២២នេះ។ លោកអះអាងថា ប្រជាពលរដ្ឋនឹងទទួលបានសេវារដ្ឋបាលសាធារណៈ ដោយគ្មានការរើសអើងនិន្នាការនយោបាយ បើមានមន្ត្រីហ៊្វុនស៊ិនប៉ិចបម្រើការនៅថ្នាក់មូលដ្ឋាន។
«យើងក្នុងនាមក្រុមប្រឹក្សាឃុំដែលឈរបេក្ខជននីមួយៗចេញពីកូតាគណបក្ស អ៊ីចឹង យើងទៅចូលធ្វើការបម្រើប្រជាពលរដ្ឋក្រោយពីយើងជាប់ឆ្នោត គឺយើងមិនត្រូវរើសអើងប្រជាពលរដ្ឋទេ ...អត់មានរើសអើងតាមទម្រង់ណាមួយ...ត្រូវតែបម្រើគាត់ឲ្យតម្លាភាព ឲ្យយុត្តិធម៌ ឲ្យមានគណនេយ្យភាពឲ្យឆ្លើយតបនឹងគោលនយោបាយជាតិ»។
គួររំឭកផងដែរថា គណបក្សហ៊្វុនស៊ិនប៉ិចទទួលបានការគាំទ្រដោយសំឡេងច្រើនលើសលប់នៅក្នុងការបោះឆ្នោតដែលរៀបចំដោយអង្គការសហប្រជាជាតិ កាលពីឆ្នាំ១៩៩៣ ដោយទទួលបានអាសនៈចំនួន៥៨នៃអាសនៈសរុបចំនួន១២០។
អាសនៈរបស់គណបក្សនយោបាយរាជានិយមមួយនេះបានថយចុះជាបន្តបន្ទាប់រហូតដល់សូន្យ នៅក្នុងការបោះឆ្នោតនាឆ្នាំ២០១៣ និងការបោះឆ្នោតជាតិចុងក្រោយឆ្នាំ២០១៨ ខណៈគណបក្សនេះបានបែកបាក់ផ្ទៃក្នុងយ៉ាងធ្ងន់ធ្ងរ និងកម្សោយនៃការដឹកនាំរបស់គណបក្ស៕