មន្រ្តីនគរបាលរាជធានីភ្នំពេញអះអាងថាកម្លាំងសមត្ថកិច្ចកំពុងតាមចាប់ខ្លួនលោក លី សាម៉េត ទីប្រឹក្សារបស់អតីតនាយករដ្ឋមន្រ្តី លោក ហ៊ុន សែន ក្រោយសង្ស័យថាលោកបានបោកប្រាស់ប្រាក់របស់គេរាប់ម៉ឺនដុល្លារអាមេរិក។
កាលពីថ្ងៃចន្ទ នគរបាលបានឡោមព័ទ្ធផ្ទះរបស់លោក លី សាម៉េតក្នុងខណ្ឌឫស្សីកែវ រាជធានីភ្នំពេញ ក្រោយលោក ហ៊ុន សែន ប្រតិកម្មនិងថាលោក លី សាម៉េត បានបោកប្រាស់លុយរបស់គេរាប់ម៉ឺនដុល្លារអាមេរិក ដោយយកឈ្មោះរបស់លោកផ្ទាល់ទៅប្រើប្រាស់។
លោក សំ វិច្ឆិកា អ្នកនាំពាក្យស្នងការនគរបាលរាជធានីភ្នំពេញ ប្រាប់វីអូអេវីអូអេនៅថ្ងៃអង្គារថាសមត្ថកិច្ចកំពុងតាមរកលោក លី សាម៉េត ក្រោយឡោមព័ទ្ធផ្ទះរបស់លោកកាលពីថ្ងៃចន្ទ ប៉ុន្តែលោកមិននៅផ្ទះឡើយ។
លោក លី សាម៉េត ជាទីប្រឹក្សាផ្ទាល់របស់លោក ហ៊ុន សែន ហើយតែងតែចេញមុខជាមួយលោក ដួង តារា ជំនួយការផ្ទាល់របស់លោក ហ៊ុន សែន ក្នុងភាពជាតំណាងរបស់លោក ហ៊ុន សែន នៅក្នុងកម្មវិធីមួយចំនួនជាបន្តបន្ទាប់។
លោក ហ៊ុន សែន កាលពីថ្ងៃចន្ទ បានបង្ហោះសារនៅលើហ្វេសប៊ុករបស់លោកថាលោក លី សាម៉េត តែងប្រើឈ្មោះរបស់លោក ដើម្បីបោកប្រាស់លុយគេ ហើយក្នុងនោះក៏មានការបោកលុយពីឈ្មោះសុខ ឡេង ចំនួន១០លានដុល្លារអាមេរិក និងចំនួន២៣ម៉ឺនដុល្លារពីឈ្មោះមួង ឃីម។
លោក ហ៊ុន សែន បន្ថែមថានៅថ្ងៃចន្ទ ទី៧ ខែតុលា លោកបានទទួលវីដេអូពីលោក កន សុខកាយ អភិបាលស្រុកល្វាឯម ដែលថាលោក លី សាម៉េត បានយកប្រាក់ពីលោកចំនួន៣០ម៉ឺនដុល្លារអាមេរិក ដើម្បីរត់ការឱ្យបានតំណែងជាអភិបាលក្រុងអរិយក្សត្រ។
លោក ហ៊ុន សែន បញ្ជាក់ថា៖ «...ខ្ញុំមិនដែលទទួលយកអន្តរាគមន៍ពីអ្នកណានោះឡើយមិនថាតាមការស្នើសុំឬតាមសំណូកណាមួយនោះឡើយ។ ផ្ទុយទៅវិញ មន្ត្រីមួយចំនួនទទួលបានការតែងតាំងហើយទទួលបានការជួយពីខ្ញុំថែមទៀត ដើម្បីឱ្យពួកគាត់មានមធ្យោបាយធ្វើការ»។
បើតាមលោក ហ៊ុន សែន ករណីរបស់លោក លី សាម៉េត អាចនៅមានមនុស្សច្រើនទៀតដែលចាញ់បោកប្រាក់។
លោក ហ៊ុន សែន បានស្នើដល់រដ្ឋមន្ត្រីក្រសួងយុត្តិធម៌ធ្វើការជាមួយតុលាការ ដើម្បីចេញដីកាការពារទ្រព្យសម្បត្តិរបស់លោក លី សាម៉េត ដើម្បីទុកសងដល់អ្នកចាញ់បោកប្រាក់។
លោកក៏បានអំពាវនាវឱ្យអ្នកចាញ់បោកលោក លី សាម៉េត ទាំងអស់ដាក់ពាក្យប្តឹងឬទាមទារសំណងទៅកាន់មេធាវីរបស់លោក។ លោក ហ៊ុន សែន ក៏បានស្នើស្នើសុំសមត្ថកិច្ចតាមឃ្លាំមើលលោក លី សាម៉េត កុំឱ្យរត់ចេញផុតពីសំណាញ់ច្បាប់។
វីអូអេមិនទាន់អាចសុំការអត្ថាធិប្បាយពីលោក កន សុខកាយ អភិបាលស្រុកល្វាឯម បាននៅឡើយទេ។
នៅថ្ងៃអង្គារទី៨ ខែតុលា ឆ្នាំ២០២៤ លោក កន សុខកាយ ត្រូវបានបញ្ចប់តំណែងពីអភិបាលស្រុកល្វាឯម ក្រោមហេតុផលថា«ប្រព្រឹត្តកំហុសក្រុមសីលធម៌ និងវិជ្ជាជីវៈធ្ងន់ធ្ងរ»។ នេះបើយោងតាមអនុក្រឹត្យចុះហត្ថលេខាដោយលោកនាយករដ្ឋមន្ត្រី ហ៊ុន ម៉ាណែត។
លោក ជិន ម៉ាលីន អ្នកនាំពាក្យក្រសួងយុត្តិធម៌ ប្រាប់វីអូអេថាតុលាការកំពុងតែពិនិត្យលើករណីនេះ។
កាលពីថ្ងៃទី២២ ខែកុម្ភៈ ឆ្នាំ២០២២ លោក ហ៊ុន សែន ប្រធានគណបក្សប្រជាជនកម្ពុជា បានតែងតាំងលោក លី សាម៉េត ជាទីប្រឹក្សារបស់លោក។
ក្នុងពេលជាទីប្រឹក្សា លោក លី សាម៉េត បាននាំយកអំណោយរបស់លោក ហ៊ុន សែន ចុះទៅប្រគល់ជូនប្រជាពលរដ្ឋជាបន្តបន្ទាប់។ នៅលើបណ្តាញសង្គមហ្វេសប៊ុក លោក លី សាម៉េត ក៏បានបង្ហោះសារមួយចំនួនអំពីការដែលលោកចុះទៅសំណេះសំណាលជាមួយអតីតសមាជិករបស់គណបក្សសង្រ្គោះជាតិដែលចុះចូលជាមួយគណបក្សប្រជាជនកម្ពុជាជាបន្តបន្ទាប់។
លោក សម រង្ស៊ី មេដឹកនាំគណបក្សប្រឆាំងដែលកំពុងនិរទេសខ្លួននៅក្រៅប្រទេស បានបង្ហោះសារនៅលើហ្វេសប៊ុករបស់លោកនាថ្ងៃអង្គារ ដោយចាត់ទុកករណីលោក លី សាម៉េត គឺជា«ករណីពាលស៊ីពាល»។ លោកបញ្ជាក់ថា៖ «ពេលដែលពួកពាលឈ្លោះគ្នា និងលែងមានប្រយោជន៍ហើយ ហ៊ុន សែន នឹងកម្ចាត់ចោល។ ឥឡូវនេះ សួរថាតើលុយរាប់សិបលានដុល្លារ និងទ្រព្យរបស់ឧកញ៉ា លី សាម៉េត នឹងក្លាយទៅជាយ៉ាងណា»?
នាយកអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ ប្រាប់វីអូអេថាការធានាអះអាងពីការផ្ទេរតំណែង និងការយកឈ្មោះរបស់មន្ត្រីសាធារណៈទៅប្រើ ដើម្បីបានបោកប្រាស់គេ គឺជាទម្រង់នៃអំពើពុករលួយ រំលោភអំណាច និងខុសច្បាប់។
លោកបញ្ជាក់ថា៖ «អ៊ីចឹងការវែកមុខទៅលើបុគ្គលម្នាក់បែបនេះ ខ្ញុំគិតថាគឺជាចំណុចមួយនៃការចាប់ផ្តើមដែរ ហើយយើងចង់ឱ្យមានការអនុវត្តច្បាប់ឱ្យបានម៉ឺងមាត់»។
បើតាមលោក សន ជ័យ អ្នកស៊ី និងអ្នកសូកស្ថិតនៅក្នុងសកម្មភាពនៃការរំលោភអំណាចដូចគ្នា ហេតុនេះលោកស្នើឱ្យចាត់វិធានការផ្លូវច្បាប់ដូចគ្នា៕