ប៉ូលិសនិងកងកម្លាំងសន្តិសុខនៅក្នុងទីក្រុងធំបំផុតរបស់ប្រទេសមីយ៉ាន់ម៉ាបានបាញ់ព្រមាន កាលពីថ្ងៃសុក្រ ខណៈពួកគេចាប់បំបែកក្រុមបាតុករប្រហែល ១០០០ នាក់ ដែលបានប្រមូលផ្តុំគ្នានៅផ្សារទំនើបដ៏ពេញនិយមមួយ ក្នុងសង្កាត់ Tamwe ក្នុងទីក្រុង Yangon ទាំងយប់ ដើម្បីតវ៉ាប្រឆាំងនឹងមន្រ្តីដែលតែងតាំងដោយយោធា។
ក្រុមអ្នកតវ៉ាបានកាន់បដា និងស្រែកពាក្យស្លោកប្រឆាំងរដ្ឋប្រហារថ្ងៃទី១ ខែកុម្ភៈ ទោះបីមានការកើនឡើងវត្តមានកម្លាំងសន្តិសុខ រថយន្តបាញ់ទឹកនៅតំបន់នោះក៏ដោយ។ ប្រព័ន្ធផ្សព្វផ្សាយរដ្ឋនិងសាក្សីផ្ទាល់ភ្នែក ឲ្យដឹងថា ប៉ូលិសបង្ក្រាបកុបកម្មប្រហែល ៥០ នាក់ បានធ្វើសកម្មភាពប្រឆាំងក្រុមបាតុករ ហើយបានចាប់ខ្លួនបាតុករយ៉ាងហោចណាស់ ១ នាក់។
ទីភ្នាក់ងារសារព័ត៌មានរ៉យទ័ររាយការណ៍ថា អ្នកកាសែតជប៉ុនម្នាក់ត្រូវបានឃុំខ្លួននៅឯកន្លែងតវ៉ា នៅទីក្រុង Yangon កាលពីថ្ងៃសុក្រ។ បើជាការណ៍ពិតនេះជាការឃុំខ្លួនអ្នកកាសែតបរទេសដំបូងគេ ចាប់តាំងពីរដ្ឋប្រហារ។ កាលពីថ្ងៃព្រហស្បតិ៍ ធនាគារពិភពលោកបាននិយាយថា ខ្លួននឹងមិនផ្តល់លុយទៅប្រទេសមីយ៉ាន់ម៉ាទេ បន្ទាប់ពីការកាន់កាប់យោធា។
វិបត្តិនយោបាយនៅក្នុងប្រទេសនេះបានកើតឡើងជាថ្មី កាលពីថ្ងៃព្រហស្បតិ៍ នៅពេលក្រុមអ្នកគាំទ្ររបបយោធានៅទីក្រុង Yangon បានវាយប្រហារបាតុករ ដែលបានតវ៉ាប្រឆាំងនឹងការផ្តួលរំលំរដ្ឋាភិបាលស៊ីវិល កាលពីថ្ងៃទី១ ខែកុម្ភៈ។
អំពើហិង្សាបានកើតឡើងមួយថ្ងៃ ដែលបានចាប់ផ្តើមនៅពេលអ្នកគាំទ្រយោធារាប់រយនាក់បានប្រមូលផ្តុំគ្នាធ្វើបាតុកម្មនៅកណ្តាលទីក្រុង Yangon។ ក្រុមអ្នកគាំទ្រយោធាដើរក្បួននៅក្បែរស្ថានីយ៍រថភ្លើងកណ្តាលក្រុង នៅពេលពួកគេត្រូវបានក្រុមអ្នកឈរមើលចំអកឲ្យ ហើយពួកគេបានតបតវិញ ដោយការបាញ់ចំពាមនិងគប់ដុំថ្ម។
បាតុកម្មប្រឆាំងរដ្ឋប្រហារកើតមានឡើងនៅទូទាំងប្រទេសមីយ៉ាន់ម៉ាជារៀងរាល់ថ្ងៃ ចាប់តាំងពីយោធាបានឃុំខ្លួនលោកស្រី អោង សានស៊ូជី មេដឹកនាំពិតប្រាកដ និងសមាជិកដទៃទៀតនៃរដ្ឋាភិបាលស៊ីវិល កាលពីថ្ងៃទី១ ខែកុម្ភៈ ដោយអះអាងថា មានការលួចបន្លំយ៉ាងច្រើនក្នុងការបោះឆ្នោត កាលពីខែវិច្ឆិកា ដែលគណបក្សសម្ព័ន្ធជាតិប្រជាធិបតេយ្យរបស់លោកស្រី ស៊ូជី បានឈ្នះភ្លូកទឹកភ្លូកដី។
អង្គការសហប្រជាជាតិបាននិយាយថា មនុស្ស ១៥០ នាក់ ត្រូវបានចាប់ខ្លួន កាលពីថ្ងៃចន្ទនៅក្នុងរដ្ឋធានី៕