កងកម្លាំងនគរបាលស្ទើរទូទាំងប្រទេស ចាប់ផ្តើមហ្វឹកហាត់ និងបំពាក់ឧបករណ៍បង្ក្រាបបាតុកម្មត្រៀមប្រឆាំងនឹងការតវ៉ាណាមួយ ដែលអាចកើតមានក្នុងថ្ងៃបោះឆ្នោតខាងមុខ។ នេះបើតាមការបញ្ជាក់របស់មន្រ្តីជាន់ខ្ពស់ក្រសួងមហាផ្ទៃ។
ក្នុងគេហទំព័រអគ្គស្នងការដ្ឋាននគរបាលជាតិ មានការផ្សព្វផ្សាយអត្ថបទមួយចំនួនពាក់ព័ន្ធនឹងការហ្វឹកហាត់ និងបំពាក់សម្ភារៈឧបករណ៍បង្រ្កាបបាតុកម្មដល់កងកម្លាំងរាប់ពាន់នាក់ នៅតាមខេត្តជាច្រើនទូទាំងប្រទេសកម្ពុជា ចាប់តាំងពីសប្តាហ៍កន្លងទៅ។
នាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃប្រាប់ VOA នារសៀលថ្ងៃអង្គារនេះថា ការហ្វឹកហាត់ធ្វើឡើងដើម្បីទប់ស្កាត់ និងបង្ក្រាបរាល់ការធ្វើបាតុកម្មតវ៉ាណាមួយ ដែលអាចកើតមានឡើងក្នុងអំឡុង និងក្រោយបោះឆ្នោតដូចបាតុកម្មទ្រង់ទ្រាយធំរបស់គណបក្សសង្គ្រោះជាតិ ក្រោយការបោះឆ្នោតថ្នាក់ជាតិឆ្នាំ២០១៣។
លោកបញ្ជាក់ថា៖
«ព្រោះថាកន្លងមក ក្រោយបោះឆ្នោតឆ្នាំ២០១៣ យើងមានពិសោធន៍ពីកិច្ចការងារហ្នឹង ដូច្នេះបានមានពិសោធន៍ឆ្នាំ២០១៣ បានបង្រៀនសមត្ថកិច្ចយើងឲ្យចេះកិច្ចការងារហ្នឹង ដើម្បីរក្សាបាននូវស្ថិរភាពហ្នឹង»។
អ្នកនាំពាក្យរូបនេះបន្ថែមថា ការហ្វឹកហាត់ដែលធ្វើឡើងតាមបណ្តាខេត្តមួយចំនួនដែលមានប្រជាពលរដ្ឋរស់នៅច្រើនទាំងនោះ ធ្វើឡើងដើម្បីឲ្យសមត្ថកិច្ចអាចបង្រ្កាបបាតុកម្មបានត្រឹមត្រូវតាមក្បួនខ្នាត។ ទោះយ៉ាងណាលោកមិនអាចបញ្ជាក់ថា តើចំនួនសមត្ថកិច្ចដែលកំពុងហ្វឹកហាត់ត្រៀមបង្ក្រាបបាតុកម្មនោះមានចំនួនប៉ុន្មាននោះទេ។
លោកមានប្រសាសន៍ថា៖
«យើងមិនប្រើប្រាស់គ្រាប់ពិតដូចសមរភូមិទេ ចង់និយាយថា វាគ្រាន់តែជាអាវុធឬជាឧបរករណ៍ដែលបានទទួលស្គាល់ដោយសមត្ថកិច្ចទូទាំងសកលលោក ជាពិសេសមានស្តង់ដារជាសកលប៉ុណ្ណឹងឯង។ ឧទាហរណ៍ថាជាដំបង ដំបងហ្នឹងមិនមែនដំបងដែកទេ តែជាដំបងជ័រនិងខែល។ អញ្ចឹងបានថា អង្គភាពប្រឆាំងបាតុកម្មហ្នឹងមានតែដំបងនិងខែល អត់មានកាំភ្លើងទេ។ តែក្នុងករណីចាំបាច់គេមានវិធីរបស់គេឧទាហរណ៍ថា មេខ្លោងណាដែលរឹងរូសអីហ្នឹង គេមានវិធីចាប់មេខ្លោងហ្នឹង»។
ការហ្វឹកហាត់ត្រៀមបង្រ្កាបបាតុកម្មក្នុងពេលបោះឆ្នោតនេះធ្វើឡើងខណៈពេលដែលគណបក្សនយោបាយចំនួន២០ កំពុងធ្វើយុទ្ធនាការទាក់ទាញរកសំឡេងឆ្នោតនៅទូទាំងប្រទេស ស្របពេលដែលក្រុមអ្នកគាំទ្រគណបក្សសង្គ្រោះជាតិ ដែលជាគណបក្សមិនអាចចូលរួមការបោះឆ្នោត ក្រោយតុលាការកំពូលរំលាយ បានបង្កើតយុទ្ធនាការផ្សេងៗបង្ហាញពីការមិនទៅបោះឆ្នោត។
ក្នុងអត្ថបទមួយដែលត្រូវបានបង្ហោះដោយគេហទំព័ររបស់អគ្គស្នងការដ្ឋាននគរបាលជាតិ កាលពីថ្ងៃទី២០ ខែកក្កដានេះ ផ្សាយអំពីការប្រមូលផ្តុំកងកម្លាំងនគរបាលខេត្តបន្ទាយមានជ័យជាទ្រង់ទ្រាយធំមុនថ្ងៃបោះឆ្នោតឈានមកដល់ ដែលដឹកនាំដោយលោក អាត់ ខែម ស្នងការខេត្តបន្ទាយមានជ័យ។
អត្ថបទនោះត្រូវបានសរសេរក្នុងន័យដើមថា៖
«កម្លាំងសរុប៧៨៩នាក់ បំពាក់ដោយឧបករណ៍សម្ភារៈប្រឆាំងបាតុកម្ម ខែល ដំបង គ្រាប់បែកផ្សែង និងកាំភ្លើងបាញ់គ្រាប់ផ្សែងបង្ហូរទឹកភ្នែក បំពាក់អាវុធធុនស្រាល និងមធ្យោបាយបម្រើការងារចេញប្រតិបត្តិការ ដើម្បីទទួលផែនការគ្រោងចេញប្រតិបត្តិការ ទប់ស្កាត់បង្ក្រាបសកម្មភាពទាំងឡាយណាដែលមានការប៉ុនប៉ងញុះញង់បំផ្លាញការបោះឆ្នោត»។
លោក អាត់ ខែម ស្នងការខេត្តបន្ទាយមានជ័យបានចុចបិទទូរស័ព្ទ ក្រោយទទួលបានសំណួរពីVOA ពាក់ព័ន្ធនឹងការហ្វឹកហាត់របស់កងកម្លាំងក្នុងខេត្តបន្ទាយមានជ័យ។
កងកម្លាំងប្រដាប់អាវុធប្រមាណ៨ម៉ឺននាក់នឹងត្រូវដាក់ពង្រាយនៅទូទាំងប្រទេសដើម្បីការពារសន្តិសុខនិងសណ្តាប់ធ្នាប់ក្នុងអំឡុងនៃការបោះឆ្នោតជ្រើសតាំងតំណាងរាស្ត្រនីតិកាលទី៦ ដែលនឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨។
មន្រ្តីជាន់ខ្ពស់នគរបាលជាតិបានប្រកាសថា កម្លាំងកងយោធពលខេមរភូមិន្ទនិងកម្លាំងកងរាជអាវុធហត្ថសរុបប្រមាណជា៨ម៉ឺននាក់ រួមទាំងកម្លាំងប្រជាការពារប្រមាណជា២ម៉ឺននាក់បន្ថែមទៀតនឹងត្រូវដាក់ពង្រាយដើម្បីការពារសន្ដិសុខ សណ្ដាប់ធ្នាប់សាធារណៈ សម្រាប់ការបោះឆ្នោតជ្រើសរើសតំណាងរាស្ត្រនាថ្ងៃទី២៩ខែកក្កដានេះ។
កងកម្លាំងត្រៀមសម្រាប់ការបោះឆ្នោតថ្នាក់ជាតិដោយមិនមានគណបក្សសង្គ្រោះជាតិ ក្នុងអាណត្តិនេះមានចំនួនច្រើនជាងកាលពីការបោះឆ្នោតក្រុមប្រឹក្សាឃុំ-សង្កាត់ដែលមានការចូលរួមពីគណបក្សសង្រ្គោះជាតិកាលពីឆ្នាំ២០១៧ ដោយពេលនោះរដ្ឋាភិបាលដាក់ពង្រាយកម្លាំងត្រឹមតែជាង៥ម៉ឺននាក់ប៉ុណ្ណោះ។
បន្ទាប់ពីការបោះឆ្នោតជ្រើសតាំងតំណាងរាស្រ្តឆ្នាំ២០១៣ គណបក្សសង្គ្រោះជាតិដែលដឹកនាំដោយលោក កឹម សុខា និងលោក សម រង្ស៊ី នាពេលនោះបានដឹកនាំបាតុកម្មទ្រង់ទ្រាយធំមួយទាមទារឲ្យលោកនាយករដ្ឋមន្រ្តី ហ៊ុន សែន ចុះចេញពីតំណែង។ ក្រោយមកគណបក្សកាន់អំណាចនិងគណបក្សប្រឆាំងបានបង្កើតក្រុមវប្បធម៌សន្ទនានិងសម្រេចធ្វើការរួមគ្នារហូតដល់ការបោះឆ្នោតជ្រើសតាំងក្រុមប្រឹក្សាឃុំ-សង្កាត់ ឆ្នាំ២០១៧។
ក្នុងការបោះឆ្នោតនាឆ្នាំ២០១៧នោះ គណបក្សសង្គ្រោះជាតិទទួលបានសំឡេងគាំទ្រជាង៤០ភាគរយនៅទូទាំងប្រទេសនិងដឹកនាំក្រុមប្រឹក្សាឃុំសង្កាត់ចំនួនជាង៥ពាន់។
យ៉ាងណាក៏ដោយ គណបក្សសង្គ្រោះជាតិត្រូវបានតុលាការកំពូលរំលាយដោយចោទថា បានឃុបឃិតជាមួយបរទេស រៀបចំគម្រោងផ្តួលរំលំរដ្ឋាភិបាលដែលដឹកនាំដោយលោកនាយករដ្ឋមន្រ្តី ហ៊ុន សែន។
លោក ហង្ស វិទូ ប្រធានក្រុមអ្នកវិភាគវ័យក្មេងលើកឡើងថា ការបោះឆ្នោតខាងមុខនេះនឹងមិនអាច មានការតវ៉ាណាមួយនោះទេដូច្នេះលោកថា ការហ្វឹកហាត់ដោយបង្ហាញពីការត្រៀមទប់ស្កាត់បង្ក្រាបបាតុកម្ម គឺជាការគំរាមកំហែងដល់គ្រប់ភាគីឲ្យមានការភ័យខ្លាចប៉ុណ្ណោះ។
លោកបញ្ជាក់ថា៖
«ប្រហែលជាគេធ្វើនេះគឺដើម្បីគំរាមទាំងអ្នកដែលគាំទ្រគណបក្សប្រជាជនកម្ពុជាដែលមានគំនិតចង់រើបម្រះផងនិងគំរាមអ្នកដែលចង់ប្រឆាំងនឹងលទ្ធផលនៃការបោះឆ្នោតផង។ អញ្ចឹងគំរាមទាំងពីរ ទាំងគ្នាឯងផង ទាំងអ្នកដទៃទៀត។ ប៉ុន្តែខ្ញុំយល់ថា បើសិនជាលេសដែលថា រៀបចំកងកម្លាំងប្រដាប់អាវុធហ្វឹកសមនេះ បង្រ្កាបទៅលើអ្នកណាដែលធ្វើបាតុកម្ម ខ្ញុំគិតថាអានេះវាគ្រាន់តែជាលេសមួយទេ»។
អវត្តមានគណបក្សសង្គ្រោះជាតិក្នុងការបោះឆ្នោតអាណត្តិនេះកំពុងត្រូវបានស្ថាប័នជាតិនិងអន្តរជាតិធំៗមួយចំនួនចាត់ទុកថា ជាការបោះឆ្នោតដែលមិនមានភាពសេរីយុត្តិធម៌និងមិនអាចទទួលយកបាន៕