សាលាដំបូងរាជធានីភ្នំពេញ នៅព្រឹកថ្ងៃពុធនេះ បានបើកសវនាការជំនុំជម្រះលើសកម្មជនបរិស្ថាន៣នាក់ ដែលត្រូវបានចាប់ខ្លួនកាលពីឆ្នាំមុន និងរងបទចោទប្រកាន់ថា«ញុះញង់»។
សកម្មជនបរិស្ថាន៣នាក់ដែលកំពុងជាប់ឃុំនោះ រួមមានលោក ថុន រដ្ឋា កញ្ញា ឡុង គន្ធា និងកញ្ញា ភួន កែវរស្មី ដែលជាសមាជិកនៃចលនាមាតាធម្មជាតិ។ ពួកគេត្រូវបានចាប់ឃុំខ្លួនកាលពីខែកញ្ញា ឆ្នាំ២០២០ ចំពោះសកម្មភាពលើបណ្តាញសង្គមដែលផ្សព្វផ្សាយអំពីគម្រោងដើរថ្មើរជើងទៅកាន់គេហដ្ឋានរបស់លោកនាយករដ្ឋមន្ត្រី ហ៊ុន សែន នៅក្បែរវិមានឯករាជ្យ ដើម្បីបង្ហាញក្តីកង្វល់ពាក់ព័ន្ធនឹងការអភិវឌ្ឍថ្មីៗនៅតំបន់បឹងតាមោក។ ពួកគេត្រូវបានចោទប្រកាន់ពី«បទញុះញង់ឱ្យប្រព្រឹត្តបទឧក្រិដ្ឋជាអាទិ៍» ដែលអាចជាប់ពន្ធនាគាររហូតដល់២ឆ្នាំ បើរកឃើញកំហុស។ នេះជាបទចោទប្រកាន់មួយ ដែលអង្គការសង្គមស៊ីវិលលើកឡើងថាប្រើប្រាស់ ដើម្បីបំបិទសំឡេងប្រឆាំងក្នុងប្រទេសកម្ពុជា។
នៅព្រឹកថ្ងៃពុធនេះ ពួកគេត្រូវបាននាំខ្លួនមកសវនាការជំនុំជម្រះនៅសាលាដំបូងរាជធានីភ្នំពេញ ដោយពួកគេស្ថិតក្នុងសម្លៀកបំពាក់ពណ៌ក្រហម ពាក់ម៉ាស់ពណ៌ស ហើយលោក ថុន រដ្ឋា កោរសក់របស់លោក។
លោក សំ ចំរើន មេធាវីរបស់ជនចាប់ចោទ មានប្រសាសន៍ថាតុលាការមិនទាន់បញ្ចប់សវនាការកាត់ក្តីនៅឡើយទេ ដោយនឹងបន្តការជំនុំជម្រះទៅសប្តាហ៍ក្រោយទៀត គឺនៅថ្ងៃទី៨ ខែមេសា។ លោកបន្តថាសំណុំរឿងនេះ មានជនជាប់ចោទ៥នាក់ ប៉ុន្តែ២នាក់ទៀតមិនជាប់ឃុំនោះទេ រួមមានលោក អាឡិច ហ្គន់សាឡេស ដេវិតសុន (Alejandro Gonzalez Davidson)ស្ថាបនិកនៃអង្គការមាតាធម្មជាតិ ដែលត្រូវបានបណ្តេញចេញពីកម្ពុជាកាលពីឆ្នាំ២០១៥ និងកញ្ញា ជា គន្ធីន វ័យ១៨ឆ្នាំ ជាយុវតីម្នាក់នៃក្រុមយុវជនខ្មែរថាវរៈ។
លោកមេធាវីបន្តថាកូនក្តីរបស់លោក គឺលោក ថុន រដ្ឋា បានបដិសេធបទចោទលើរូបលោកនៅចំពោះមុខតុលាការ។
លោកមេធាវីបានបដិសេធមិនអត្ថាធិប្បាយបន្ថែម ដោយរង់ចាំការសាកសួរបន្តទៀត ហើយលោកថាលោកត្រៀមការពារសំណុំរឿងនេះឲ្យបានល្អ៕