តុលាការក្រុងភ្នំពេញ នាថ្ងៃពុធនេះបានសម្រេចចោទជនសង្ស័យមួយរូប ដែលបានបាញ់សម្លាប់លោកកែម ឡី អ្នកវិភាគ និងស្រាវជ្រាវសង្គម។ ការចោទប្រកាន់នេះមានពីរបទគឺ «ឃាតកម្មគិតទុកជាមុននិងបទកាន់កាប់អាវុធដោយគ្មានការអនុញ្ញាត»។ នេះបើតាមការបញ្ជាក់របស់លោកលី សុផាន់ណា អ្នកនាំពាក្យនៃតុលាការក្រុងភ្នំពេញ។
អ្នកនាំពាក្យរូបនេះក៏បានឲ្យដឹងផងដែរថា តុលាការក៏បានចោទជនមួយរូបផ្សេងទៀតពីបទលក់អាវុធដោយគ្មានច្បាប់អនុញ្ញាត ឲ្យទៅជនជាប់ចោទដែលអះអាងថា ខ្លួនឈ្មោះជួប សម្លាប់ អាយុ៣៨ឆ្នាំ។ ក៏ប៉ុន្តែអ្នកនាំពាក្យរូបនេះមិនបានបញ្ជាក់ឲ្យច្បាស់ពីភិនភាគរបស់ជនដែលផ្តល់អាវុធដល់ឃាតករឈ្មោះជួប សម្លាប់នោះទេ។
លោកនាយឧត្តមសេនីយ៍ជួន សុវណ្ណ ក្នុងសំលៀកបំពាក់ខ្មៅ ធ្វើសន្និសីទព័ត៌មាននៅថ្ងៃទី១០ ខែកក្កដា ឆ្នាំ២០១៦ អំពីការបាញ់សម្លាប់លោកកែម ឡី។ លោកព្រះរាជអាជ្ញារង លី សុផាន់ណា ឈរនៅក្បែរលោកនាយឧត្តមសេនីយ៍ជួន សុវណ្ណ។ (ហ៊ុល រស្មី/VOA)
ក្នុងសារអេឡិចត្រូនិចមកកាន់ក្រុមអ្នកសារព័ត៌មានតាមបណ្តាញទំនាក់ទំនងសង្គម លោកលី សុផាន់ណាបានសរសេរក្នុងន័យដើមយ៉ាងដូច្នេះ៖
«ក្រោយពីការសួរចម្លើយ ការពិនិត្យឯកសារ និងភស្តុតាងនៅក្នុងសំណុំរឿងឃាតកម្មទៅលើលោកបណ្ឌិតកែម ឡី តំណាងអយ្យការបានសម្រេចចោទប្រកាន់ជនល្មើសពីបទឃាតកម្មគិតទុកជាមុន និងបទកាន់កាប់អាវុធដោយគ្មានការអនុញ្ញាត តាមមាត្រា២០០និង៤៩០នៃក្រមព្រហ្មទណ្ឌ និងចោទប្រកាន់លើបុគ្គលដែលបានលក់អាវុធឲ្យជនល្មើសពីបទលក់អាវុធដោយគ្មានការអនុញ្ញាត ដោយយោងតាមមាត្រា២០នៃច្បាប់ស្តីពីការគ្រប់គ្រងអាវុធគ្រឿងផ្ទុះនិងគ្រាប់រំសេវ។ សំណុំរឿងនេះបានបញ្ជូនទៅចៅក្រមស៊ើបសួរដើម្បីចាត់ការបន្តតាមនីតិវិធី»។
យោងតាមច្បាប់ក្រមព្រហ្មទណ្ឌរបស់ប្រទេសកម្ពុជា អំពើឃាតកម្មគិតទុកជាមុនគឺត្រូវផ្តន្ទាទោសដាក់ពន្ធនាគារអស់មួយជីវិត រីឯមាត្រា៤៩០នៃក្រមព្រហ្មទណ្ឌចែងថា ជនល្មើសកាន់កាប់អាវុធដោយខុសច្បាប់ត្រូវផ្តន្ទាទោសជាប់ពន្ធនាគារពី៦ខែទៅ៣ឆ្នាំ និងពិន័យជាទឹកប្រាក់ពីមួយលានរៀលទៅប្រាំមួយលានរៀល។
យ៉ាងណាក៏ដោយចំពោះការស៊ើបអង្កេតរបស់អាជ្ញាធរកម្ពុជា លោកនាយឧត្តមសេនីយ៍ខៀវ សុភ័ក អ្នកនាំពាក្យក្រសួងមហាផ្ទៃ បានបញ្ជាក់ប្រាប់ VOA ថា មន្ត្រីនគរបាលបានប្រមូលភស្តុតាងក្នុងកន្លែងកើតហេតុ រួមទាំងកាមេរ៉ាសុវត្ថិភាពក្នុងហាងកាហ្វេនោះផងដែរ។
មុនពេលសុំបង្វែរសំណួរទៅកាន់អ្នកនាំពាក្យតុលាការក្រុងភ្នំពេញ លោកនាយឧត្តមសេនីយ៍ខៀវ សុភ័គបានបញ្ជាក់ថា៖
«កាលដែលយើងនៅក្រសួងមហាផ្ទៃ ហ្នឹងយើងគ្រាន់តែបានប្រមូល ពិនិត្យកន្លែងកើតហេតុ ប្រមូលនិងចាប់បានជនដៃដល់ យកបានកាមេរ៉ាសុវត្ថិភាព ព្រមទាំងបានសាកសួរនាំព័ត៌មានមួយចំនួន យកបានសាវតាជាតិរបស់វាពិតប្រាកដហើយ។ ហើយក្នុងរយៈពេលដែលយើងនៅហ្នឹងគឺរយៈពេល២៤ម៉ោង។ ថ្ងៃច័ន្ទ ចង់និយាយថា ថ្ងៃច័ន្ទ យើងបានបញ្ជូនទៅសាលាដំបូងរាជធានីភ្នំពេញដើម្បីបន្តនីតិវិធី។ អញ្ចឹងសំណុំរឿងគឺបញ្ជូនទៅហ្នឹង។ អញ្ចឹងថា អូនទាក់ទងទៅអ្នកនាំពាក្យនៃសាលាដំបូង»។
លោកលី សុផាន់ណា អ្នកនាំពាក្យតុលាការក្រុងភ្នំពេញ បានបញ្ជាក់ប្រាប់អ្នកសារព័ត៌មានថា មកដល់ថ្ងៃពុធនេះថា តុលាការបានចាត់ការសំណុំរឿងនេះ តាមសាវតានិងភស្តុតាងដែលមាន ហើយជនជាប់ចោទបានបញ្ជាក់អះអាងថាខ្លួនឈ្មោះជួប សម្លាប់ អាយុ៣៨ឆ្នាំ។
លោក កែម ឡី អ្នកវិភាគសង្គមកម្ពុជា ផ្តល់បទសម្ភាសន៍ជូនអ្នកសារព័ត៌មានអំពីករណីស្នេហាលួចលាក់របស់លោក កឹម សុខា កាលពីអង្គារ ទី១៩ ខែមេសា ឆ្នាំ២០១៦។ (ហ៊ុល រស្មី/VOA)
លោកកែម ឡី អ្នកវិភាគ និងជាអ្នកស្រាវជ្រាវសង្គមដ៏ល្បីល្បាញ ដែលធ្លាប់តែនិយាយវិភាគនយោបាយតាមបណ្តាញសារព័ត៌មាននានា ត្រូវបានខ្មាន់កាំភ្លើងបាញ់សម្លាប់នៅហ្នឹងកន្លែងកាលពីព្រឹកថ្ងៃអាទិត្យកន្លងទៅ។ សមត្ថកិច្ចឲ្យដឹងថា ជនសង្ស័យដែលបានបាញ់សម្លាប់លោក កែម ឡីជាច្រើនគ្រាប់ និងបណ្ដាលឲ្យស្លាប់នៅហ្នឹងកន្លែងក្នុងស្ថានីយប្រេងឥន្ធនៈនោះ គឺមានឈ្មោះជួប សម្លាប់ ហើយជនរូបនេះអះអាងថា ខ្លួនសម្លាប់លោកកែម ឡីដោយសារតែរឿងលុយជំពាក់ចំនួន៣ពាន់ដុល្លារ។
ក៏ប៉ុន្តែអត្តសញ្ញាណរបស់ជនល្មើសរូបនេះនិងមូលហេតុនៃការសម្លាប់លោកកែម ឡីនៅតែជាក្តីមន្ទិលរបស់ក្រុមគ្រួសារនិងអ្នកគាំទ្រលោកកែម ឡី។ ព័ត៌មាននិង អត្តសញ្ញាណរបស់ជនល្មើសរូបនេះត្រូវបានគេរាយការណ៍ខុសៗគ្នាពីសមត្ថកិច្ច។
សារព័ត៌មានក្នុងស្រុកនានា ដែលចេញផ្សាយនាថ្ងៃអង្គារនេះបានឲ្យដឹងថា ជនជាប់ចោទមានឈ្មោះអឿត អាង អាយុ៤៤ឆ្នាំ មានទីលំនៅ ឃុំនគរភៀស ស្រុកអង្គរជុំ ខេត្តសៀមរាប ដែលធ្លាប់ធ្វើជាមន្ត្រីយោធា អ្នកការពារបរិស្ថាន និងសង្ឃផងដែរ។ ហើយជនរូបនេះត្រូវបានគេរាយការណ៍ ថាបានចេញពីខេត្តសៀមរាប មកកាន់ក្រុងភ្នំពេញ កាលពីប៉ុន្មានសប្តាហ៍មុន។
ក្នុងការចុះផ្សាយមួយរបស់បណ្តាញព័ត៌មាន Associated Press (AP) ដែលបានធ្វើបទសម្ភាសន៍ជាមួយនារីម្នាក់នៅខេត្តសៀមរាបដែលអះអាងថាជាភរិយារបស់ជនជាប់ចោទនោះ បានបញ្ជាក់ថា ជនជាប់ចោទឈ្មោះអឿត អាង អាយុ៤៤ឆ្នាំ មានទីលំនៅ ឃុំនគរភៀស ស្រុកអង្គរជុំ ខេត្តសៀមរាប។ ស្ត្រីដដែលអះអាងបន្តថា ប្តីរបស់អ្នកស្រី ដែលបានចាកចេញមកកាន់ក្រុងភ្នំពេញគឺមិនអាចមានថវិកាដល់ទៅ៣ពាន់ដុល្លារសម្រាប់ឲ្យគេខ្ចីនោះទេ។
លោកស្រីហឿម ហុត វ័យ៤៥ឆ្នាំ ត្រូវបានបណ្តាញព័ត៌មាន Associated Press (AP)ដកស្រង់សម្តីដើមយ៉ាងដូច្នេះ៖
«ខ្ញុំការរន្ធត់យ៉ាងខ្លាំង ពេលដែលឃើញរូបគាត់នៅក្នុងទូរទស្សន៍ ហើយគេថា គាត់គឺជាឃាតករ»។
លោកស្រីហឿម ហុតបន្តថា ចាប់តាំងពីរៀបការជាមួយអឿត អាងនាខែឧសភាកន្លងទៅ បុរសម្នាក់នេះមិនដែលមានការប្រទូសហិង្សាណាមួយនោះទេ។
នាថ្ងៃពុធនេះ VOA មិនអាចទំនាក់ទំនងលោកជួន សុវណ្ណ ស្នងការប៉ូលិសក្រុងភ្នំពេញ និងលោក គៀត ច័ន្ទថារិទ្ធ អ្នកនាំពាក្យនៃនគរតបាលជាតិកម្ពុជា ដើម្បីសុំសេចក្តីអធិប្បាយបន្ថែមលើករណីនេះបានទេ។
ស្របពេលដែលស្ថានទូត អង្គការសង្គមស៊ីវិលនានា បានអំពាវនាវសុំឲ្យមានការស៊ើបអង្កេតលើការបាញ់ប្រហារលោកកែម ឡីឲ្យបានហ្មត់ចត់ និងត្រឹមត្រូវនោះ គណបក្សជំទាស់គឺគណបក្សសង្គ្រោះជាតិបានចេញសេចក្តីថ្លែងការណ៍នាថ្ងៃនេះដែរ ដោយអំពាវនាវឲ្យអាជ្ញាធរកម្ពុជាចាប់«ឃាតករពិតប្រាកដ ឬអ្នកនៅពីក្រោយឃាតកម្ម»នេះផងដែរ៕