រដ្ឋបាលរាជធានីភ្នំពេញបានណែនាំឲ្យប្រជាពលរដ្ឋបែងចែកសំរាម និងសំណល់រឹងឲ្យបានត្រឹមត្រូវ ដោយមានការកំណត់ប្រភេទថង់ច្រកសំរាម ទៅតាមសំរាមសើម និងស្ងួត។ នេះបើយោងតាមសេចក្តីណែនាំមួយរបស់សាលារាជធានីភ្នំពេញចុះថ្ងៃទី១៦ ខែកញ្ញាឆ្នាំ២០២១។
សេចក្តីណែនាំរបស់សាលារាជធានីភ្នំពេញស្តីពី«ការគ្រប់គ្រងសំរាម សំណល់រឹង» នឹងចាប់ផ្តើមអនុវត្តពីថ្ងៃទី១ខែវិច្ឆិកា ឆ្នាំ២០២១តទៅ។ ហើយក្នុងករណីពលរដ្ឋមិនអនុវត្តតាម នឹងមានការពិន័យទៅតាមច្បាប់។
សេចក្តីណែនាំឲ្យដឹងថាសំរាមស្ងួតដូចជាក្រដាស ក្រដាសកាតុង ឡាំង គ្រឿងប្លាស្ទីក ហ្វូម ជ័រ ដែក កំប៉ុង និងដបជាដើម ត្រូវដាក់ក្នុងថង់ពណ៌ស។ ចំណែកសំរាមសើម ដូចជាសំណល់ម្ហូបអាហារ សំណល់សរីរាង្គ ផ្លែឈើ និងផ្កាជាដើម ត្រូវដាក់ក្នុងថង់ពណ៌ខ្មៅ។ ក្នុងករណីការទុកដាក់សំរាមមិនត្រឹមត្រូវតាមពណ៌ថង់ខ្មៅ និងស ដូចដែលបានកំណត់ខាងលើក្រុមហ៊ុននឹងមិនប្រមូលសំរាមឡើយ។
សេចក្តីណែនាំឲ្យដឹងថា៖ «ការដាក់សំរាម សំណល់រឹងក្នុងថង់ពណ៌ផ្សេងក្រៅពីពណ៌ខ្មៅនិងពណ៌ស ក្រុមហ៊ុននឹងមិនប្រមូលសំរាមឡើយ។ បងប្អូនប្រជាពលរដ្ឋអាចរកទិញថង់ទាំង២ពណ៌ខាងលើនេះនៅតាមបណ្តាទីផ្សារនានា»។
ចំពោះសំណល់ដែលបង្កគ្រោះថ្នាក់មានដូចជា អំបែងកញ្ចក់ និងសំណល់មុតស្រួចនានា មិនត្រូវវេចខ្ចប់លាយឡំនឹងសំរាមសើម និងសំរាមស្ងួតឡើយ ពោលត្រូវដាក់ចូលក្នុងធុងសំរាមឬប្រអប់ដោយឡែកឲ្យបានត្រឹមត្រូវបើមិនដូច្នេះទេត្រូវធ្វើការផាកពិន័យនិងធ្វើកំណត់ហេតុអំពីកំហុសឆ្គងលើកទី១។ ករណីនៅតែបន្តដាក់សំរាមប្រភេទគ្រោះថ្នាក់ពាសវាលពាសការនឹងត្រូវផាកពិន័យនិងលិខិតបទដ្ឋានគតិយុត្តិជាធរមានព្រមទាំងប្តឹងទៅតុលាការតាមកំហុសជាក់ស្តែង។ នេះបើតាមសេចក្តីណែនាំ។
សម្រាប់ការទុកដាក់សំរាមវិញគឺត្រូវទុកដាក់ទៅតាមទីតាំងទុកដាក់សំរាមដែលកំណត់ដោយអាជ្ញាធរមូលដ្ឋាននិងប្រតិបត្តិករប្រមូលសំរាមដោយត្រូវសម្រិតទឹកចេញពីថង់សំរាមចង់មាត់ថង់សំរាមឲ្យជិតត្រឹមត្រូវមុននឹងយកទៅបោះចោលទៅតាមទីតាំងចោលសំរាម។
សាលារាជធានីភ្នំពេញបញ្ជាក់ថា៖ «ក្នុងករណីមិនអនុវត្តតាមសេចក្តីណែនាំនេះ រដ្ឋបាលរាជធានីភ្នំពេញនឹងធ្វើការផាកពិន័យទៅតាមច្បាប់និងលិខិតបទដ្ឋានគតិយុត្តិជាធរមានព្រមទាំងអនុវត្តវិធានការរដ្ឋបាលនិងវិធានការនានាតាមការចាំបាច់ដទៃទៀតដូចជាការបិទការធ្វើអាជីវកម្មបណ្តោះអាសន្ន...»។
លោក ម៉េត មាសភក្តីអ្នកនាំពាក្យសាលារាជធានីភ្នំពេញ ប្រាប់វីអូអេថាលោកមិនមានអ្វីបញ្ជាក់បន្ថែមពីលើសេចក្តីណែនាំរបស់រដ្ឋបាលរាជធានីភ្នំពេញទេ។
គំនរសំរាមដែលប្រជាពលរដ្ឋបានយកមកបោះចោលនៅផ្សារអូរឬស្សី ក្នុងរាជធានីភ្នំពេញ ថ្ងៃទី១៧ កញ្ញា ២០២១ ។ (មាស មល្លិកា/វីអូអេ)
អ្នកស្រី ចឹម ស័ក្ត ដែលជាអ្នកលក់បាយម្ហូបនៅម្តុំផ្សារអូរឫស្សី បានប្រាប់វីអូអេនៅថ្ងៃសុក្រថាជាធម្មតា អ្នកស្រីខ្ចប់សំរាមលាយចូលគ្នាមិនថាសំរាមរឹងស្ងួត ឬសើម ដូចជាបាយដែលសល់ពីការលក់មិនអស់ជាដើម។ ប៉ុន្តែអ្នកស្រីតែងមានទម្លាប់វេចខ្ចប់សំរាមដាក់ពីរជាន់ចំពោះសំរាមរាវហើយក៏មិនបានកំណត់ថាដាក់ថង់ពណ៌អីនោះដែរ។
អ្នកស្រីថ្លែងថា៖ «រាល់ថ្ងៃសំរាមបងដាក់ចូលគ្នាទាំងអស់ប្រសិនជាសំរាមដូចថាវាជាសំរាមដូចថាទឹកលំហូរសំរាមអីណានី បងចងពីរជាន់ប៉ុន្តែគាត់អត់បានបែងចែករឿងថង់ខ្មៅថង់សទេ»។
ចំណែកអ្នកស្រី ពៅ ណាម ដែលជាអាជីករលក់ផ្លែចេកនៅមុខផ្សារអូរឫស្សីបានសម្តែងក្តីត្រេកអរនិងពេញចិត្តចំពោះការគោលការណ៍បែងចែកសំរាម វេចខ្ចប់ដាក់តាមពណ៌ថង់ស និងខ្មៅ ដែលកំណត់ដោយសាលារាជធានីភ្នំពេញ។
អ្នកស្រីបញ្ជាក់ថា៖ «ខ្ញុំអរគុណគេ ព្រោះអីអនាម័យយើងសុខភាពយើងកំពុងកូវីដចឹងផងយើងមានការអនាម័យចឹងទៀតយើងល្អ! កាលណាយើងអត់អនាម័យជំងឺអស់នឹងវាដូចរុកចូលយើងដែរនឹងហា៎ ធ្វើចឹងល្អ» ។
លោក ឆេង សុភ័ក្ត្រ ជាអាជីករលក់ដូងចល័តដឹកតាមរម៉ក សំចតនៅទល់មុខផ្សារអូរឫស្សី បានប្រាប់វីអូអេនៅថ្ងៃសុក្រនេះថារូបលោកតែងតែប្រើប៉ាវដែលលោកតែងទៅសុំបានដោយឥតគិតថ្លៃពីកន្លែងលក់ទឹកកកទុកដាក់សំបកដូង។ លោកយល់ថាការបែងចែកសំរាមដោយកំណត់តាមប្រភេទសំរាម ជាការងាយស្រួលម៉្យាងដែរ ប៉ុន្តែលោកយល់ថានឹងត្រូវចំណាយ១៥០០រៀលទៅលើការទិញថង់ប្លាស្ទីកពណ៌ខ្មៅទំហំធំចំនួន៣ជាប្រចាំថ្ងៃ ក្នុងការខ្ចប់សំបកផ្លែដូង។
គំនរសំរាមដែលប្រជាពលរដ្ឋបានយកមកបោះចោលនៅផ្សារអូរឬស្សី ក្នុងរាជធានីភ្នំពេញ ថ្ងៃទី១៧ កញ្ញា ២០២១ ។ (មាស មល្លិកា/វីអូអេ)
លោក សឿន សារ៉ន នាយកប្រតិបត្តិនៃសមាគមធាងត្នោត បានប្រាប់វីអូអេថាប្រទេសជិតខាងក៏ដូចជាបណ្តាទីក្រុងនៃប្រទេសអភិវឌ្ឍន៍បានរើសយកវិធីសាស្រ្តបែងចែកសំរាមបែបនេះមកអនុវត្ត ដើម្បីធានាដល់ការប្រមូលសំរាមប្រសើរឡើង ទៅតាមបច្ចេកទេសនៃបទដ្ឋានរបស់បរិស្ថាន។
លោកបន្ថែមថា៖ «ប៉ុន្តែអ្វីដែលយើងគួរតែគិតពិចារណាឡើងវិញថែមនោះគឺនៅបន្តអប់រំបន្ថែមឲ្យប្រជាពលរដ្ឋទូទៅគាត់បានយល់ដឹងអំពីការទុកដាក់សំរាមឲ្យបានបន្ថែមទៀតមុននឹងចូលដល់វិធានការនៃការផាកពិន័យ» ។
យោងតាមអនុក្រឹត្យស្តីពី«ការគ្រង់គ្រងសំរាមសំណល់រឹងទីប្រជុំជន» មាត្រា៣៩ចែងថា៖ «ការមិនអនុវត្តតាមការកំណត់របស់រដ្ឋបាលរាជធានីភ្នំពេញ ក្រុង ស្រុក ខណ្ឌ ក្នុងការញែក និងការវេចខ្ចប់ដោយឡែកនូវសំរាមសំណល់រឹងទីប្រជុំជនដែលអាចប្រើប្រាស់ឡើងវិញឬកែច្នៃបាន ដូចមានចែងក្នុងអនុក្រឹត្យនេះ ត្រូវទទួលការពិន័យអន្តរការណ៍ជាប្រាក់ចន្លោះពី១ម៉ឺនរៀលទៅដល់២០ម៉ឺនរៀល។ ក្នុងករណីមិនរាងចាល ត្រូវទទួលការពិន័យអន្តរការណ៍ជាប្រាក់ទ្វេដងនៃប្រាក់ពិន័យអន្តរការណ៍លើកមុន»៕