នៅថ្ងៃព្រហស្បតិ៍នេះ សហរដ្ឋអាមេរិកនិងប្រទេសហ្វីលីពីនបានប្រកាសកិច្ចព្រមព្រៀងមួយដែលនឹងឱ្យក្រុមយោធាអាមេរិកប្រើប្រាស់មូលដ្ឋានយោធាហ្វីលីពីនថ្មីៗបួនថែមទៀត។
នៅក្នុងសេចក្តីថ្លែងការណ៍រួមមួយ ប្រទេសទាំងពីរនេះមិនបានប្រាប់អំពីទីតាំងជាក់លាក់នៃមូលដ្ឋានសឹកទាំងនេះទេ ដោយនិយាយថា មូលដ្ឋានទាំងនេះស្ថិតនៅក្នុង«តំបន់យុទ្ធសាស្ត្ររបស់ប្រទេស»។
ការពង្រីកនេះជាផ្នែកមួយនៃកិច្ចព្រមព្រៀងពង្រឹងកិច្ចសហប្រតិបត្តិការខាងការការពារប្រទេស (EDCA) ដែលមានរួមទាំងមូលដ្ឋានសឹក៥ដែលមានរួចហើយ។
សេចក្តីថ្លែងការណ៍នេះបាននិយាយថា៖ «ការបន្ថែមកន្លែងថ្មីៗតាមរយៈកិច្ចព្រមព្រៀង EDCA នឹងអនុញ្ញាតឱ្យមានការគាំទ្រលឿនជាងមុននៅពេលមានមហន្តរាយទាក់ទិននឹងមនុស្សធម៌និងធាតុអាកាសនៅក្នុងប្រទេសហ្វីលីពីននិងឆ្លើយតបនឹងឧបសគ្គរួមគ្នាផងដែរ»។
កិច្ចព្រមព្រៀងថ្មីនេះមានឡើងនៅពេលដែលសម្ព័ន្ធមិត្តយូរយាមកហើយទាំងពីរនេះប្រឹងប្រែងទប់ទល់នឹងការអះអាងទាមទារទឹកដីដោយប្រទេសចិនលើកោះតៃវ៉ាន់និងសកម្មភាពចិននៅក្នុងសមុទ្រចិនខាងត្បូង។
នៅមុនសេចក្តីប្រកាសនេះ រដ្ឋមន្ត្រីការពារជាតិស.រ.អ.លោក Lloyd Austin បាននិយាយប្រាប់ប្រធានាធិបតីហ្វីលីពីនលោក Ferdinand Marcos Jr. ថាគោលដៅរបស់ស.រ.អ.គឺពង្រឹងទំនាក់ទំនងជាមួយប្រទេសហ្វីលីពីន«តាមគ្រប់វិធីទាំងអស់តាមអាចធ្វើបាន»និងដើម្បីពង្រឹងសមត្ថភាពយោធារបស់ហ្វីលីពីនផងដែរ។
លោក Marcos បានថ្លែងថា អនាគតរបស់ហ្វីលីពីននិងតំបន់អាស៊ី-ប៉ាស៊ីហ្វិក«តែងតែមានការទាក់ទិនរបស់ស.រ.អ.ដោយសារភាពដៃគូទាំងនោះខ្លាំងណាស់»៕
លោក Jeff Seldin អ្នកឆ្លើយឆ្លងព័ត៌មានសន្តិសុខជាតិនៃ VOA រួមចំណែកក្នុងសេចក្តីរាយការណ៍នេះ។
ព័ត៌មានមួយចំនួននៅក្នុងសេចក្ដីរាយការណ៍នេះត្រូវបានដកស្រង់ចេញពីទីភ្នាក់ងារព័ត៌មានThe Associated Press និងទីភ្នាក់ងារព័ត៌មាន Agence France-Presse។