ប៉ូលិសហ្វីលីពីនបានចាប់ខ្លួនបុរស៣នាក់ដែលបានរៀបចំធ្វើការវាយប្រហារដោយការដាក់គ្រាប់បែក ក្នុងការប្រឆាំងតវ៉ានិងអ្វីដែលពួកគេចាត់ទុកថាជាជំហរទន់ខ្សោយរបស់រដ្ឋាភិបាលក្រុងម៉ានីល ចំពោះប្រទេសចិន។
លោកស្រីរដ្ឋមន្ត្រីក្រសួងយុត្តិធម៌ Leila de Lima ថ្លែងថា បុរសទាំង៣នាក់ត្រូវបានចាប់ខ្លួនកាលពីថ្ងៃច័ន្ទ ជាមួយនិងរថយន្ត van មួយគ្រឿងផ្ទុកដោយគ្រឿងផ្ទុះនៅឯអាកាសយានដ្ឋានអន្តរជាតិនៃទីក្រុងម៉ានីល ដែលជាគោលដៅមួយក្នុងចំណោមគោលដៅ៤របស់បុរសទាំងនេះ។
ផែនទីទីតាំងអាកាសយានដ្ឋានអន្តរជាតិ Ninoy Aquino
លោកស្រី De Lima ថ្លែងថា បុរសទាំងនេះក៏មានផែនការដើម្បីវាយប្រហារទៅលើស្ថានទូតចិន ព្រមទាំងក្រុមហ៊ុនសំណង់ DMCI និង ផ្សារលក់ទំនិញ SM Mall of Asia ដែលជាកម្មសិទ្ធិរបស់ក្រុមអ្នកជំនួញហ្វីលីពីនកាត់ចិន។
លោកស្រីថ្លែងថា បុរសទាំង៣នាក់នេះ អះអាងថា ពួកគេស្ថិតនៅក្នុងក្រុមមួយ របស់មន្ត្រីប៉ូលិស យោធា និង អ្នកដទៃទៀត ដែលចង់ការពារប្រទេសហ្វីលីពីន ពីប្រទេសចិន ដែលកំពុងមានជម្លោះដែនដីជាមួយនឹងក្រុងម៉ានីលនោះ៕