ប្រទេសហ្វីលីពីនបានប្រកាសដាក់ប្រទេសឲ្យស្ថិតក្នុងស្ថានភាពអាសន្នដោយសារការរីករាលដាលជំងឺគ្រុនឈាមនៅទូទាំងប្រទេស។ ជំងឺដែលឆ្លងតាមរយៈមូសខាំនេះបានសម្លាប់មនុស្សអស់យ៉ាងហោចណាស់ចំនួន ៦២២នាក់ក្នុងឆ្នាំនេះ។
មានករណីឆ្លងជំងឺគ្រុនឈាមជាង ១សែន៤ម៉ឺន៦ពាន់ករណីក្នុងឆ្នាំនេះ គិតចាប់ពីខែមករាដល់ថ្ងៃទី ២០ ខែកក្កដា ដែលតួលេខនេះកើនឡើង៩៨%ពីឆ្នាំមុន។ នេះបើយោងតាមការបញ្ជាក់របស់លោក Francisco Duque រដ្ឋមន្ត្រីក្រសួងសុខាភិបាល ហ្វីលីពីន ដែលផ្សាយតាមកញ្ចក់ទូរទស្សន៍កាលពីថ្ងៃអង្គារ។
លោកបានថ្លែងថា ការប្រកាសនេះនឹងអនុញ្ញាតឲ្យរដ្ឋាភិបាលក្នុងតំបន់អាចប្រើប្រាស់មូលនិធិសម្រាប់ពេលអាសន្ន ដើម្បីប្រយុទ្ធប្រឆាំងនឹងជំងឺនេះបាន។
ជំងឺគ្រុនឈាមអាចបង្កឲ្យមានអាការៈក្ដៅខ្លួន ឈឺសន្លាក់ដៃជើង វិលមុខ ឡើងកន្ដួល និងអាចបង្កឲ្យពិបាកដកដង្ហើមជាដើម។ ជំងឺនេះភាគច្រើនកើតនៅក្នុងបណ្ដាប្រទេសដែលស្ថិតនៅក្នុងតំបន់ត្រូពិច។
ប្រទេសហ្វីលីពីនជួបការលំបាកក្នុងការទប់ស្កាត់មេរោគនេះ ចាប់តាំងពីប្រទេសនេះឈប់ប្រើប្រាស់វ៉ាក់សាំង Dengvaxia កាលពីចុងឆ្នាំ២០១៧ គឺមានរយៈពេលពីរឆ្នាំបន្ទាប់ពីប្រទេសហ្វីលីពីនក្លាយជាប្រទេសនៅតំបន់អាស៊ីដំបូងគេបង្អស់ដែលអនុញ្ញាតឲ្យប្រើប្រាស់វ៉ាក់សាំងប្រភេទនេះសម្រាប់លក់៕