កម្ពុជាកំពុងរៀបចំពិធីបុណ្យអុំទូក បណ្តែតប្រទីប អកអំបុក និងសំពះព្រះខែចំនួនបីថ្ងៃ ចាប់ពីថ្ងៃទី២៦ ដល់ថ្ងៃទី២៨ ខែវិច្ឆិកា ឆ្នាំ២០២៣ ក្រោយអាក់ខានប្រារព្ធពិធីបុណ្យប្រពៃណីជាតិមួយនេះអស់រយៈពេលបីឆ្នាំ ដោយសារផលវិបាកផ្សេងៗដែលបណ្តាលមកពីការឆ្លងរាតត្បាតជំងឺកូវីដ១៩។
ពិធីបុណ្យអុំទូកនេះមានតាំងពីសម័យអង្គររហូតមក ហើយប្រជាពលរដ្ឋខ្មែរជាទម្លាប់បានប្រារព្ធធ្វើពិធីបុណ្យនេះ ដើម្បីធ្វើការប្រណាំងទូកដែលរចនាតាមបែបបុរាណសម័យ ទាំងបុរស និងស្ត្រី ដែលមកពីគ្រប់ខេត្តក្រុងនៅក្នុងប្រទេសកម្ពុជា។
នៅមុខព្រះបរមរាជវាំង ក្នុងរាជធានីភ្នំពេញ គេឃើញមានមនុស្សជាច្រើនចូលរួម និងទស្សនាការប្រណាំងទូក ហើយសំឡេងស្រែកអ៊ូអរក៏បានលេចឡើងចេញទូកកំពុងប្រណាំងដែលអមដោយកាយវិការរបស់កីឡករតាមទូកនីមួយៗដែលកំពុងអុំយ៉ាងញាប់ដៃលើដងទន្លេចតុមុខផងដែរ។
ប្រជាពលរដ្ឋកំពុងអង្គុយចាំទស្សនាការប្រណាំងទូក នៅច្រាំងទន្លេចតុមុខ ក្នុងរាជធានីភ្នំពេញ នាឱកាសពិធីបុណ្យអុំទូក បណ្តែតប្រទីប អកអំបុក និងសំពះព្រះខែ នាថ្ងៃទី២៧ ខែវិច្ឆិកា ឆ្នាំ២០២៣។ (ស៊ឹម ចាន់សំណាង/វីអូអេ)
កំពុងអង្គុយទស្សនាការប្រណាំងទូកនៅច្រាំងទន្លេ ក្បែរព្រះបរមរាជវាំង លោក សែម វិចិត្រ អាយុ៦២ឆ្នាំ មកពីខេត្តក្រចេះ ប្រាប់វីអូអេថា លោកពិតជាមានអារម្មណ៍រីករាយយ៉ាងក្រៃលែងដែលបានអញ្ជើញមកពិធីបុណ្យអុំទូកក្នុងរាជធានីភ្នំពេញនៅឆ្នាំនេះ។ លោកបង្ហាញការដឹងគុណចំពោះរដ្ឋាភិបាលដែលបានរៀបចំពិធីបុណ្យជាតិនេះឡើងវិញ ក្រោយមិនបានប្រារព្ធអស់រយៈពេល៣ឆ្នាំមកហើយនោះ។
លោកថ្លែងថា៖ «ដល់ចាប់ផ្តើមបុណ្យជាលើកដំបូងនៅឆ្នាំ២០២៣ ខ្ញុំអបអរសាទរ និងថ្លែងអំណរគុណដល់អ្នកថ្នាក់ដឹកនាំគ្រប់ស្ថាប័នទាំងអស់»។
សម្រាប់លោក សែម វិចិត្រ លោកចង់ឲ្យមានការប្រារព្ធពិធីបុណ្យអុំទូកនេះជារៀងរាល់ឆ្នាំ ដោយមិនគួរមានការអាក់ខានណាមួយឡើយ ដោយលោកថា ពិធីបុណ្យនេះជាពិធីបុណ្យប្រពៃណីដ៏សំខាន់មួយរបស់ប្រទេសកម្ពុជា។ លោកថ្លែងទៀតថា បើទោះបីជាមិនបានប្រារព្ធឡើងនៅរាជធានីភ្នំពេញក្តី ក៏គួរតែមានការប្រារព្ធនៅតាមបណ្តាខេត្តនានាផងដែរ។
លោកថ្លែងថា៖ «ពិសេសនៅទីក្រុងភ្នំពេញហ្នឹង យើងត្រូវតែធ្វើរៀងរាល់ឆ្នាំមិនឲ្យខានទេ អាហឹ្នងវាជាទំនៀមទម្លាប់ប្រវត្តិការតស៊ូរបស់ខ្មែរយើង ដែលរឿងសំខាន់លើកីឡាទូកងដែលជារបស់ជាតិខ្មែរយើងពីបរមបុរាណមក យើងមិនអាចបោះបង់ចោលបានទេ»។
ចំណែកប្រជាពលរដ្ឋមួយរូបទៀតដែលកំពុងអង្គុយសម្រាកពិសារអាហារថ្ងៃត្រង់ជាមួយក្រុមគ្រួសារ នៅពីមុខព្រះបរមរាជវាំង អ្នកស្រី អូក សាវី អាយុ២៥ឆ្នាំ មកពីក្រុងអរិយក្សត្រ ក៏មានអារម្មណ៍សប្បាយចិត្តជាខ្លាំងផងដែរ ដោយបានមកចូលរួមពិធីបុណ្យអុំទូកនេះ។ អ្នកស្រីលើកឡើងថា ពិធីបុណ្យអុំទូកឆ្នាំនេះមានលក្ខណៈខុសប្លែកពីពេលកន្លងទៅ ក្រោយកម្ពុជាបានធូរស្បើយពីជំងឺឆ្លងកូវីដ១៩។
អ្នកស្រីថ្លែងថា៖ «ដូចថាយើងទើបរួចពីកូវីដ អ៊ីចឹងមានអារម្មណ៍ថាប្លែក ហើយចង់ឲ្យប្រារព្ធរាល់ឆ្នាំ។ ដូចរាល់ឆ្នាំសប្បាយហើយមានអ្នកចូលរួមច្រើន»។
លោក សែម វិចិត្រ អាយុ៦២ឆ្នាំ ប្រជាពលរដ្ឋមកពីខេត្តក្រចេះ ផ្តល់កិច្ចសម្ភាសន៍ឱ្យវីអូអេ នៅរាជធានីភ្នំពេញ អំឡុងពិធីបុណ្យអុំទូក បណ្តែតប្រទីប អកអំបុក និងសំពះព្រះខែ នាថ្ងៃទី២៧ ខែវិច្ឆិកា ឆ្នាំ២០២៣។
អ្នកស្រី អូក សាវី អាយុ២៥ឆ្នាំ មកពីក្រុងអរិយក្សត្រ ផ្តល់កិច្ចសម្ភាសន៍ឱ្យវីអូអេ នៅមុខព្រះបរមរាជវាំង ក្នុងរាជធានីភ្នំពេញ អំឡុងពិធីបុណ្យអុំទូក បណ្តែតប្រទីប អកអំបុក និងសំពះព្រះខែ នាថ្ងៃទី២៧ ខែវិច្ឆិកា ឆ្នាំ២០២៣។ (ស៊ឹម ចាន់សំណាង/វីអូអេ)
វីអូអេមិនទាន់សុំការអត្ថាធិប្បាយពីលោក ឈិន កេតនា អនុប្រធានអចិន្រ្តៃយ៍ និងជាអគ្គលេខាធិការនៃគណៈកម្មាធិការជាតិរៀបចំបុណ្យជាតិ-អន្តរជាតិបាននៅឡើយទេ។
អ្នកនាំពាក្យក្រសួងទេសចរណ៍ លោក តុប សុភ័ក ប្រាប់វីអូអេតាមប្រព័ន្ធទំនាក់ទំនងតេឡេក្រាមថា ពិធីបុណ្យអុំទូកបានកំពុងប្រារព្ធឡើងនៅបណ្តារាជធានីខេត្តនានាដែលមានដងទន្លេ និងបឹង ដើម្បីជាការអបអរ និងជាការទាក់ទាញភ្ញៀវទេសចរឲ្យទៅកម្សាន្តនៅទីកន្លែងទាំងអស់នោះ។
កាលពីឆ្នាំ២០១៩ ដែលជាឆ្នាំចុងក្រោយដែលកម្ពុជាបានរៀបចំពិធីបុណ្យអុំទូក កម្ពុជាទទួលបានភ្ញៀវទេសចរជាតិ និងអន្តរជាតិប្រមាណ ៥លាន៨សែននាក់ ហើយក្នុងឆ្នាំ២០២៣នេះ ចំនួនភ្ញៀវទេសចរក៏ត្រូវបានប៉ានស្មានថាអាចប្រហាក់ប្រហែលនឹង២០១៩ដែរ។ នេះបើតាមការបញ្ជាក់របស់អ្នកនាំពាក្យក្រសួងទេសចរណ៍ លោក តុប សុភ័ក។
លោកថ្លែងថា៖ «ជាការយល់ឃើញរបស់ខ្ញុំអាចថាប្រហាក់ប្រហែលគ្នានឹងតួរលេខ២០១៩ ព្រោះអាចថាយើងខានប្រារព្ធនូវព្រះរាជពិធីបុណ្យអុំទូកនេះ៣ឆ្នាំហើយ២០២០ ២០២១ ២០២២។ អ៊ីចឹងបងប្អូនប្រជាពលរដ្ឋរបស់យើង ក៏ដូចជាទេសចរហ្នឹងអាចដើរលេងកម្សាន្តច្រើន អាចខ្ទង់ប្រហាក់ប្រហែលនឹងឆ្នាំ ២០១៩ ដែរ»។
គួររំឭកថា កម្ពុជាបានខកខានមិនបានប្រារព្ធពិធីបុណ្យអុំទូកនេះអស់រយៈពេលបីឆ្នាំមកហើយគិតចាប់តាំង ២០២០ មក ដោយរដ្ឋាភិបាលបានលើកឡើងហេតុផលនៃបញ្ហាប្រឈមនានាដែលកើតចេញពីវិបត្តិកូវីដ១៩ ហើយកាលពីឆ្នាំ ២០២២ ការអាក់ខានប្រារព្ធពិធីនេះ គឺដោយសារកម្ពុជាបានធ្វើជាមា្ចស់ផ្ទះរៀបចំកិច្ចប្រជុំកំពូលអាស៊ាន៕