លោកប្រធានាធិបតីអាមេរិក បារ៉ាក់ អូបាម៉ា បានសរសើរដល់ «ការជឿនលឿនច្រើនក្រាស់ក្រែល» ដែលប្រទេសជាតិនានាក្នុងពិភពលោកសម្រេចបានអំពីសន្តិសុខបរមាណូ ហើយលោកបានសន្យាថា ស.រ.អា. នឹងបន្តធ្វើកិច្ចសហប្រតិបត្តិការក្នុងកិច្ចខិតខំប្រឹងប្រែងទាំងអស់ដើម្បីកាត់បន្ថយឃ្លាំងសារធាតុបរមាណូ និងធ្វើឱ្យវាមានសុវត្ថិភាពផងដែរ។
ថ្លែងទៅកាន់មេដឹកនាំពិភពលោកជាង៥០នាក់ដែលចូលរួមក្នុងសន្និសីទកំពូលសន្តិសុខបរមាណូក្នុងរដ្ឋធានីវ៉ាស៊ីនតោន លោកអូបាម៉ាបានមានប្រសាសន៍ថា ប្រទេសជាតិជាង១២ បានបោះបង់ចោលសារធាតុអ៊ុយរ៉ាញ៉ូម (Uranium) និង ព្លុយទោញ៉ូម (Plutonium) សម្រិតសម្រាំងរបស់ពួកគេទាំងអស់។ អ៊ុយរ៉ាញ៉ូម និងព្លុយទោញ៉ូម ជាសារធាតុវិទ្យុសកម្មដែលគេត្រូវការជាចាំបាច់ដើម្បីផលិតគ្រាប់បែកបរមាណូ។
នៅក្នុងរយៈពេល៦ឆ្នាំនៃការប្រជុំអន្តរជាតិអំពីសន្តិសុខបរមាណូ ដោយមានរួមបញ្ចូលសន្និសីទកំពូលបួនដែលលោកបានផ្តើមគំនិតផងដែរនោះ លោកប្រធានាធិបតីអាមេរិក បានមានប្រសាសន៍ថា៖ «យើងបានឱបក្រសោបរបៀបគិតថ្មីមួយ និងសកម្មភាពបែបថ្មីមួយផងដែរ»។
លោក អូបាម៉ា បានមានប្រសាសន៍ប្រាប់ពួកមេដឹកនាំទាំងនេះ នៅក្នុងសម័យប្រជុំពេញអង្គនៃសន្និសីទកំពូលនេះ ដែលបានត្រូវផ្សាយនៅទូទាំងពិភពលោកថា៖ «នេះជាឧទាហរណ៍ត្រឹមត្រូវមួយនៃឧបសគ្គខាងសន្តិសុខមួយក្នុងសតវត្សរ៍ទី២១ ដែលគ្មានប្រទេសជាតិណាមួយអាចដោះស្រាយរួចតែឯកឯងទេ។ វាតម្រូវឱ្យមានក្រុមចម្រុះ និងការសម្របសម្រួលប្រកបដោយចីរភាពឆ្លងកាត់ព្រំដែននិងស្ថាប័ន។ ហើយដំណឹងល្អគឺថា យើងបានធ្វើឱ្យមានការជឿនលឿនច្រើនក្រាស់ក្រែលហើយ»។
លោក អូបាម៉ា ក៏បានចូលរួមការប្រជុំតូចមួយនៃប្រទេសជាតិដែលមានទាក់ទិនជិតដិតបំផុតជាមួយកិច្ចព្រមព្រៀងបរមាណូកាលពីឆ្នាំទៅមិញជាមួយប្រទេសអ៊ីរ៉ង់។ លោកបានមានប្រសាសន៍ប្រាប់ក្រុមដែលលោកហៅថាក្រុម P5+1 ថា កិច្ចព្រមព្រៀងជាមួយប្រទេសអ៊ីរ៉ង់បានសម្រេចជោគជ័យច្រើនក្រាស់ក្រែល ហើយកិច្ចព្រមព្រៀងនេះផ្តោតការយកចិត្តទុកដាក់លើគ្រោះថ្នាក់នៃការរីកសាយបរមាណូក្នុងវិធីពិតប្រាកដមួយ»។
លោក អូបាម៉ា បានគូសបញ្ជាក់ថា ទោះជាយ៉ាងណាក៏ដោយក៏ ការអនុវត្តពេញលេញនិងការងារបន្តលើកិច្ចព្រមព្រៀងបរមាណូអ៊ីរ៉ង់នឹងស្ថិតលើកម្រិតកិច្ចសហប្រតិបត្តិការដូចគ្នាពីសហគមន៍អន្តរជាតិ៕