នាវាផ្ទុកយន្តហោះដែលដើរដោយថាមពលនុយក្លេអ៊ែររបស់សហរដ្ឋអាមេរិកនិងក្រុមនាវាចម្បាំងអមបានចាប់ផ្តើមធ្វើសមយុទ្ធជាមួយនាវាចម្បាំងរបស់កូរ៉េខាងត្បូងនៅថ្ងៃចន្ទនេះ ប៉ុន្មានម៉ោងបន្ទាប់ពីកូរ៉េខាងជើងបានបាញ់កាំជ្រួចបាល់លីស្ទិកវង់ប្រតិបត្តិការចំនួនខ្លី២គ្រាប់ដែលទំនងជាការតវ៉ាប្រឆាំងការធ្វើសមយុទ្ធដ៏ធំរបស់សម្ព័ន្ធមិត្ត។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន AP។
ការសាកល្បងកាំជ្រួចមីស៊ីលលើកទី៧នៅខែនេះបានសង្កត់ពីការតានតឹងនៅក្នុងតំបន់នៅពេលដែលការសាកល្បងអាវុធរបស់កូរ៉េខាងជើងនិងសមយុទ្ធរួមគ្នារវាងសហរដ្ឋអាមេរិកនិងកូរ៉េខាងត្បូងបានរីកកាន់តែធំឡើងនៅក្នុងការឆ្លើយតបទៅវិញទៅមក។
ការបាញ់កាំជ្រួចនេះធ្វើឡើងចំពេលនៃការមកដល់នៃនាវាផ្ទុកយន្តហោះរបស់សហរដ្ឋអាមេរិក USS Nimitz និងក្រុមនាវាចម្បាំងអម រួមទាំងនាវាបំពាក់ដោយកាំជ្រួចមីស៊ីលនិងនាវាពិឃាត២គ្រឿងដែលចូលរួមសមយុទ្ធការពារដែនអាកាសនិងសមយុទ្ធផ្សេងទៀតជាមួយនាវាចម្បាំងរបស់កូរ៉េខាងត្បូងនៅផ្ទៃទឹកជិតកោះ Jeju។
លោក Jang Do Young អ្នកនាំពាក្យកងនាវារបស់កូរ៉េខាងត្បូងបាននិយាយថាសមយុទ្ធនេះមានគោលបំណងបង្កើនសមត្ថភាពកិច្ចប្រតិបត្តិការរួមគ្នានិងបង្ហាញការតាំងចិត្តរបស់សហរដ្ឋអាមេរិកការពារសម្ព័ន្ធមិត្តរបស់ខ្លួនដោយប្រើគ្រប់ជម្រើសទាំងអស់ រួមទាំងនុយក្លេអ៊ែរនៅក្នុងការប្រឈមការគំរាមកំហែងអាវុធនុយក្លេអ៊ែរនិងកាំជ្រួចមីស៊ីលរបស់កូរ៉េខាងជើងនេះ។ ក្រុមនាវាចម្បាំង Nimitz ត្រូវគេរំពឹងថានឹងចូលចតនៅកំពង់ផែ Busan របស់កូរ៉េខាងត្បូងនៅថ្ងៃអង្គារស្អែកនេះ។
នាយអគ្គសេនាធិការរបស់កូរ៉េខាងត្បូងបាននិយាយថាកាំជ្រួចមីស៊ីល២គ្រាប់របស់កូរ៉េខាងជើងត្រូវបានបាញ់ចេញពីតំបន់ដីគោកភាគខាងលិចនៃផ្នែកខាងត្បូងរដ្ឋធានីព្យុងយ៉ាងប្រហែលពីម៉ោង៧:៤៧ ព្រឹកទៅម៉ោង៨ព្រឹកហើយបានហោះចម្ងាយប្រហែល៣៧០គីឡូម៉ែត្រមុនពេលធ្លាក់ចូលក្នុងសមុទ្រ។ យោធាជប៉ុនបាននិយាយថាកាំជ្រួចមីស៊ីលដែលបានធ្លាក់នៅខាងក្រៅតំបន់សេដ្ឋកិច្ចផ្តាច់មុខជប៉ុនបានហោះក្នុងរយៈកម្ពស់៥០គីឡូម៉ែត្រ៕