ប្រទេសកូរ៉េខាងជើងបានបរិហាររិះគន់យ៉ាងខ្លាំងមកលើស.រ.អា.ពាក់ព័ន្ធនឹងការដាក់ទណ្ឌកម្មថ្មីៗ ដែលជាការផ្តន្ទាទោសមកលើខ្លួនចំពោះការលបលួចចូលក្នុងបណ្តាញ កុំព្យូទ័ររបស់ក្រុមហ៊ុនផលិតខ្សែភាពយន្ត Sony Pictures។
ទីភ្នាក់ងារព័ត៌មានផ្លូវការនៃប្រទេសកូរ៉េខាងជើងបានដកស្រង់ពាក្យសម្តីអ្នកនាំពាក្យក្រសួងការបរទេស ដែលបានហៅការដាក់ទណ្ឌកម្មទាំងនោះថាប្រកបដោយ «ភាពគឃ្លើន និងសង្កត់សង្កិន» ហើយបានបន្តថាការដាក់ទណ្ឌកម្មទាំងនោះគ្រាន់តែពង្រឹងឆន្ទៈនិងការប្តេជ្ញាចិត្តរបស់រដ្ឋាភិបាលក្រុងព្យុងយ៉ាង (Pyongyang) ក្នុងការការពារអធិបតេយ្យភាពរបស់ប្រទេសតែប៉ុណ្ណោះ។
កាលពីថ្ងៃសុក្រលោកប្រធានាធិបតីស.រ.អា.បារ៉ាក់ អូបាម៉ា (Barack Obama) បានចុះហត្ថលេខាលើបទបញ្ជានីតិប្រតិបត្តិមួយ ដែលអនុញ្ញាតឲ្យមានការដាក់ទណ្ឌកម្មថ្មីៗមកលើអង្គការចំនួនបីនិងបុគ្គលចំនួន១០នាក់។ក្រុមមន្ត្រីសេតវិមានបាននិយាយថាការដាក់ទណ្ឌកម្មទាំងនោះគ្រាន់តែជាជំហានទីមួយក្នុងការស្វះស្វែងដាក់ទោសកូរ៉េខាងជើងចំពោះការបង្កបញ្ហាជាច្រើនដោយមានរួមបញ្ចូលទាំងការវាយប្រហារលើបណ្តាញអ៊ីនធឺណែតផងដែរ។
សេចក្តីថ្លែងការណ៍របស់ក្រសួងហិរញ្ញវត្ថុស.រ.អា.បាននិយាយថាការដាក់ទណ្ឌកម្មថ្មីៗទាំងនោះនឹងពង្រឹងការដាក់ទណ្ឌកម្មដែលមានពីមុនរួចមកហើយប្រឆាំងនឹងកូរ៉េខាងជើង តាមរយៈការហាមឃាត់ក្រុមជនដែលត្រូវបានកត់សម្គាល់មិនឲ្យចូលពាក់ព័ន្ធនឹងប្រព័ន្ធហិរញ្ញវត្ថុស.រ.អា. ក៏ដូចជារារាំងប្រជាពលរដ្ឋអាមេរិកមិនឲ្យទាក់ទងធ្វើជំនួញជាមួយកូរ៉េខាងជើង៕